ប្រទេសស៊ុយអែត បានផ្តល់ថវិកាចំនួន២៣លានក្រោន ឬស្មើប្រមាណ២,៥លានដុល្លារអាមេរិក ដើម្បីពង្រឹងការអភិវឌ្ឍប្រព័ន្ធផ្សព្វផ្សាយនិងសេរីភាពនៃការបញ្ចេញមតិនៅកម្ពុជា។
ការផ្តល់ថវិកានេះបានធ្វើឡើងតាមរយៈការចុះហត្ថលេខារវាងតំណាងប្រទេសស៊ុយអែត និងអង្គការយូណេស្កូ លើកិច្ចព្រមព្រៀង ដើម្បីចាប់ផ្តើមគម្រោងថ្មីមួយដែលមានឈ្មោះថា «ការពង្រឹងកិច្ចអភិវឌ្ឍន៍ប្រព័ន្ធផ្សព្វផ្សាយនិងសេរីភាពនៃការបញ្ចេញមតិ» នៅថ្ងៃទី៨ ខែមេសា ឆ្នាំ២០២១នេះ។
សេចក្តីប្រកាសព័ត៌មានរួមរបស់ស្ថានទូតស៊ុយអ៊ែតប្រចាំនៅកម្ពុជា និងអង្គការយូណេស្កូ បានឱ្យដឹងថា កិច្ចព្រមព្រៀងនេះមានរយៈពេល៣ឆ្នាំ ក្នុងគោលបំណងដើម្បីជំរុញឱ្យមានបរិយាកាសប្រព័ន្ធផ្សព្វផ្សាយប្រកបដោយសុវត្ថិភាព សេរី ពហុនិយម និងឯករាជ្យ ដែលនឹងជួយធ្វើឱ្យមានភាពប្រសើរឡើងនូវសេរីភាពនៃការបញ្ចេញមតិ និងការទទួលបានព័ត៌មាននៅក្នុងប្រទេសកម្ពុជា។
លោក ប៊្យន ហេកម៉ាក ឯកអគ្គរាជទូតស៊ុយអែតប្រចាំកម្ពុជា បានថ្លែងតាមរយៈសេចក្តីប្រកាសព័ត៌មាននោះថា ការគាំទ្រនេះជាផ្នែកដ៏សំខាន់មួយនៃកិច្ចសហប្រតិបត្តិការអភិវឌ្ឍន៍អន្តរជាតិរបស់ប្រទេសស៊ុយអែត ជាមួយប្រទេសកម្ពុជា ដែលផ្តោតលើសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ។
លោកបានបន្តដូច្នេះថា៖ «យើងរីករាយដែលធ្វើការជាដៃគូជាមួយអង្គការយូណេស្កូប្រចាំប្រទេសកម្ពុជា ដើម្បីកសាងសមត្ថភាពលើវិស័យប្រព័ន្ធផ្សព្វផ្សាយ ដើម្បីលើកកម្ពស់ស្តង់ដារវិជ្ជាជីវៈសារព័ត៌មាន និងបង្កើតយន្តការសម្រាប់សុវត្ថិភាពអ្នកសារព័ត៌មាន ហើយការយកចិត្តទុកដាក់ ជាពិសេសនឹងត្រូវបានផ្តល់ជូនអ្នកសារព័ត៌មានជាស្ត្រីដែលងាយទទួលរងគ្រោះក្នុងវិជ្ជាជីវៈសារព័ត៌មាន ហើយខ្វះឱកាសស្មើភាពគ្នាក្នុងការទទួលបានការអភិវឌ្ឍវិជ្ជាជីវៈរបស់ខ្លួននៅក្នុងវិស័យសារព័ត៌មាននេះ»។
ចំណែក តំណាងអង្គការយូណេស្កូប្រចាំកម្ពុជា លោក សាដា អ៊ូម៉ា អាឡាម បានលើកឡើងក្នុងសេចក្តីប្រកាសព័ត៌មាននោះដែរថា តាមរយៈគំនិតផ្តួចផ្តើមនេះនឹងជួយពង្រឹងសេរីភាពនៃការបញ្ចេញមតិ និងប្រព័ន្ធអេកូឡូស៊ីនៃការទទួលបានព័ត៌មាននៅក្នុងប្រទេសកម្ពុជា តាមរយៈការតស៊ូមតិឱ្យទទួលបានក្របខណ្ឌច្បាប់ ដែលមានលក្ខណៈរឹងមាំសម្រាប់ការអភិវឌ្ឍប្រព័ន្ធផ្សព្វផ្សាយ ការផ្តល់វេទិកាសម្រាប់ការសន្ទនា និងកិច្ចពិភាក្សាជាសាធារណៈ និងការជំរុញឱ្យមានបរិយាកាសប្រព័ន្ធផ្សព្វផ្សាយប្រកបដោយភាពរស់រវើក ដែលនឹងលើកកម្ពស់តម្លៃប្រជាធិបតេយ្យ អភិបាលកិច្ចល្អ និងការអភិវឌ្ឍប្រកបដោយចីរភាព។
លោកបញ្ជាក់ថា៖ «ដោយផ្តោតលើសសរស្តម្ភ ដើម្បីសន្តិភាព យុត្តិធម៌ និងបរិយាបន្ន នៃរបៀបវារៈឆ្នាំ២០៣០ គម្រោងនេះបានចូលរួមចំណែកដោយផ្ទាល់ ដោយឆ្ពោះទៅរកការសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពទី១៦ ដែលផ្តោតលើការជំរុញឱ្យមានគណនេយ្យភាពរបស់រដ្ឋាភិបាល ការកសាងនីតិរដ្ឋ និងការរក្សាសន្តិភាព និងជាពិសេស គោលដៅអភិវឌ្ឍន៍ប្រកបដោយចីរភាពទី១៦ ចំណុច១០ ដែលមានគោលបំណងធានាឱ្យមានការទទួលបានព័ត៌មានជាសាធារណៈ និងការពារសេរីភាពមូលដ្ឋាន ដោយស្របតាមច្បាប់ជាតិ និងកិច្ចព្រមព្រៀងអន្តរជាតិ»។
លោក មាស សោភ័ណ្ឌ អ្នកនាំពាក្យក្រសួងព័ត៌មាន បានស្វាគមន៍ចំពោះជំនួយរបស់ប្រទេសស៊ុយអែត តាមរយៈអង្គការយូណេស្កូនេះ។ ក៏ប៉ុន្តែលោកបានទទូចឱ្យអង្គការដែលទទួលបានជំនួយនេះ ប្រើប្រាស់ឱ្យចំគោលដៅ និងស្របតាមច្បាប់របស់កម្ពុជា។
លោកមានប្រសាសន៍ថា៖ «ក្រសួងព័ត៌មាន ពុំដែលរារាំងការផ្តល់ជំនួយណាមួយដល់អង្គការនានា ក្នុងការអនុវត្តគម្រោងពាក់ព័ន្ធនឹងវិស័យព័ត៌មានឡើយ ប៉ុន្តែសូមឱ្យអង្គការទាំងនោះដែលទទួលបានជំនួយហើយ សូមអនុវត្តសកម្មភាពរបស់ខ្លួនប្រកបដោយគណនេយ្យភាព តម្លាភាព ប្រសិទ្ធភាព និងចំគោលដៅ ព្រមទាំងគោរពឱ្យបានត្រឹមត្រូវតាមច្បាប់នៃព្រះរាជាណាចក្រកម្ពុជា»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី បានចាត់ទុកជំនួយរបស់ស៊ុយអែតនេះ ថាមានសារៈសំខាន់និងទាន់ពេលវេលា ដើម្បីជួយពង្រឹងប្រព័ន្ធផ្សព្វផ្សាយនិងសិទ្ធិសេរីភាពនៃការបញ្ចេញមតិនៅកម្ពុជា ចាប់តាំងពីក្រោយការបង្ក្រាបនៅឆ្នាំ២០១៧មក។
លោកថា៖ «ខ្ញុំគិតថា នេះគឺជាការជួយគាំទ្រមួយល្អដែលនឹងជួយលើកកម្ពស់ឱ្យល្អប្រសើរឡើងវិញចំពោះការទទួលបានព័ត៌មានរបស់ប្រជាពលរដ្ឋ ជាពិសេស ប្រជាពលរដ្ឋនៅតាមជនបទដាច់ស្រយាលឆ្ងាយៗ។ ហើយមួយវិញទៀត អាចថា វាទាន់ពេលវេលាដើម្បីជួយគាំទ្រទៅដល់អ្នកសារព័ត៌មាននិងប្រជាពលរដ្ឋ ដើម្បីទទួលបានព័ត៌មានមួយដែលអាចជឿទុកចិត្តបាននៅក្នុងស្ថានភាពមួយនៃការបំពុលបរិយាកាសដោយព័ត៌មានក្លែងក្លាយ ព័ត៌មានមិនពិតផ្សេងៗជាដើម»។
តាមរបាយការណ៍របស់អង្គការអ្នកសារព័ត៌មានគ្មានព្រំដែន (Reporters Without Border) ក្នុងឆ្នាំ២០២០ បានបង្ហាញថា ចំណាត់ថ្នាក់សេរីភាពសារព័ត៌មាននៅកម្ពុជា បានបន្តធ្លាក់ចុះពីចំណាត់ថ្នាក់លេខ១៣២ ក្នុងឆ្នាំ២០១៧ មកលេខ១៤៤ ក្នុងចំណោម១៨០ប្រទេសនៅទូទាំងពិភពលោក។ អង្គការនេះបានកត់សម្គាល់ថា ចាប់តាំងពីឆ្នាំ២០១៧មក រដ្ឋាភិបាលកម្ពុជាបានបើកយុទ្ធនាការបង្ក្រាបប្រព័ន្ធផ្សព្វផ្សាយឯករាជ្យ និងអ្នកមានសំឡេងមិនស្របនឹងរដ្ឋាភិបាល។ ក្នុងនោះ រដ្ឋាភិបាលបានបំបិទការផ្សាយរបស់វិទ្យុក្នុងស្រុកជាង៣០ ដែលផ្សាយបន្តកម្មវិធីព័ត៌មាននៃវិទ្យុអាស៊ីសេរី (RFA) វិទ្យុសំឡេងសហរដ្ឋអាមេរិក (VOA) និងវិទ្យុសំឡេងប្រជាធិបតេយ្យ (VOD) ក្រោមហេតុផលថា ម្ចាស់ស្ថានីយទាំងនោះមិនគោរពកិច្ចសន្យាជាមួយក្រសួង។
តាមរយៈកិច្ចព្រមព្រៀងនេះ អង្គការយូណេស្កូប្រចាំនៅកម្ពុជា នឹងផ្តោតលើការងារក្នុងការពង្រឹងក្របខណ្ឌច្បាប់ និងវិស័យប្រព័ន្ធផ្សព្វផ្សាយ ព្រមទាំងលើតម្រូវការបន្ទាន់ដែលបណ្តាលមកពីការរីករាលដាលនៃជំងឺកូវីដ-១៩។ ក្នុងនោះក៏មានការរួមបញ្ចូលទាំងការធានាឱ្យបាននូវការទទួលបាននូវព័ត៌មានសំខាន់ៗ ការតស៊ូមតិដើម្បីឱ្យមានស្តង់ដារខ្ពស់ក្នុងការរាយការណ៍ប្រកបដោយក្រមសីលធម៌និងវិជ្ជាជីវៈ និងការលើកកម្ពស់វិជ្ជាជីវៈសារព័ត៌មានដើម្បីប្រឆាំងនឹងការផ្សព្វផ្សាយព័ត៌មានមិនពិត៕
