ក្រសួងសុខាភិបាលបានរកឃើញអ្នកវិជ្ជមានជំងឺកូវីដ-១៩ថ្មី ចំនួន១១៣នាក់បន្ថែមទៀត ដែលសុទ្ធសឹងជាអ្នកពាក់ព័ន្ធក្នុងព្រឹត្តិការណ៍សហគមន៍២០កុម្ភៈទាំងអស់។
សេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី៨ ខែមេសា ឆ្នាំ២០២១នេះ បញ្ជាក់ថា អ្នកឆ្លងជំងឺកូវីដ-១៩ទាំងនោះ ភាគច្រើនជាពលរដ្ឋរស់នៅរាជធានីភ្នំពេញ ដែលមានចំនួន១០៣នាក់។ ដោយឡែក អ្នកឆ្លងផ្សេងទៀតបានរកឃើញនៅខេត្តស្វាយរៀង ៣នាក់, ខេត្តកណ្តាល ៣នាក់, ខេត្តព្រះសីហនុ ៣នាក់ និងខេត្តកំពត ម្នាក់។
សេចក្តីប្រកាសព័ត៌មានដដែលក៏បានបញ្ជាក់ដែរថា អ្នកជំងឺដែលព្យាបាលជាសះស្បើយថ្មីមានចំនួន៩០នាក់ និងបានអនុញ្ញាតឱ្យពួកគេចេញពីមន្ទីរពេទ្យហើយដែរ ប៉ុន្តែត្រូវបន្តធ្វើចត្តាឡីស័ក១៤ថ្ងៃ ដើម្បីតាមដានសុខភាពបន្តទៀត។
ប្រភពដដែលបញ្ជាក់ថា គិតត្រឹមព្រឹកថ្ងៃទី៨ ខែមេសា កម្ពុជាបានរកឃើញអ្នកឆ្លងសរុបចំនួន៣ ០២៨នាក់ និងបណ្តាលឱ្យអ្នកជំងឺស្លាប់ដោយសារជំងឺផ្លូវដង្ហើមមួយនេះមានចំនួន២៤នាក់ ក្នុងនោះករណីឆ្លងពាក់ព័ន្ធព្រឹត្តិការណ៍សហគមន៍២០កុម្ភៈ មានចំនួន២ ៤៩៦នាក់ អ្នកជំងឺដែលព្យាបាលជាសះស្បើយមានចំនួន១ ៩១៤នាក់ និងកំពុងសម្រាកព្យាបាលចំនួន១ ០៨៥នាក់៕
