ចៅក្រមអង្គបុរេជំនុំជម្រះ នៃអង្គជំនុំជម្រះវិសាមញ្ញក្នុងតុលាការកម្ពុជា នៅថ្ងៃពុធនេះ មិនអាចស្វែងរកសំឡេងជាឯកច្ឆន្ទ ដើម្បីសម្រេចបញ្ជូនសំណុំរឿងរបស់អតីតកម្មាភិបាលខ្មែរក្រហម លោក មាស មុត ទៅជំនុំជម្រះបាននោះឡើយ។
លោក នេត្រ ភក្ត្រា ប្រធានផ្នែកកិច្ចការសាធារណៈ និងជាអ្នកនាំពាក្យនៃសាលាក្តីខ្មែរក្រហម បានពន្យល់ថា ផ្អែកតាមសេចក្តីសម្រេចនេះ សំណុំរឿងរបស់លោក មាស មុត គឺមិនដំណើរការទៅមុខទេ។
លោកមានប្រសាសន៍យ៉ាងដូច្នេះថា៖ «ប្រកាសថា អង្គបុរេជំរុំជម្រះមិនអាចរកសំឡេងគាំទ្រពីចៅក្រម៤រូបយ៉ាងតិច ដើម្បីចេញសេចក្ដីសម្រេចរូបទៅលើអង្គសេចក្ដី ដោយផ្អែកលើអំណាងហេតុរួមមួយបានទេ មានន័យថា មានការខ្វែងយោបល់គ្នារវាងចៅក្រមនៃអង្គបុរេជំរុំជម្រេះ មួយថាបញ្ជូនទៅជំរុំជម្រះ មួយថាមិនបញ្ជូនទៅជំនុំជម្រះ អញ្ចឹងមិនអាចមានសំឡេងគ្រប់គ្រាន់។ អ៊ីចឹងសំណុំរឿងនេះមិនអាចដំណើរការទៅមុខទេ ហើយអនុលោមទៅតាមប្រធាន ៧៧,១៣ នៃវិវាទផ្ទៃក្នុងនៃសាលាក្ដីខ្មែរក្រហម គឺសេចក្ដីសម្រេចរបស់អង្គបុរេជំនុំជម្រេះនៅពេលនេះ គឺបិទផ្លូវតវ៉ា»។
បើដូច្នេះ តើលោក មាស មុត នឹងត្រូវរួចផុតពីការចោទប្រកាន់ឬយ៉ាងណា? លោក នេត្រ ភក្ត្រា នៅមិនទាន់បកស្រាយយ៉ាងណានៅឡើយទេចំពោះសំណួរនេះ។
លោកមានប្រសាសន៍បន្ថែមថា៖ «ខ្ញុំមិនទាន់បញ្ជាក់បន្ថែមទៀតយ៉ាងម៉េចទេ នៅចាំការសម្រេចបន្ថែមទៀត ហើយការបកស្រាយបន្ថែមទៀត ប៉ុន្តែសម្រាប់ពេលនេះ គឺអង្គបុរេជំនុំជម្រះដែលមានតួនាទីក្នុងការសម្រេចសេចក្ដីថា តើសំណុំរឿងហ្នឹងបញ្ជូនទៅជំនុំជម្រះ ឬមួយក៏លើកលែងការចោទប្រកាន់ហ្នឹង គឺមិនអាចរកសំឡេងបានទេ អ៊ីចឹងសំណុំរឿងនេះមិនដំណើរការទៅទេ បាទ»។
គួររំឭកជូនថា កាលពីចុងឆ្នាំ២០១៨ សហចៅក្រមស៊ើបអង្កេតអន្តរជាតិ បានសម្រេចបញ្ជូនសំណុំរឿងអតីតកម្មាភិបាលខ្មែរក្រហម លោក មាស មុត ទៅជំនុំជម្រះ ដោយអះអាងថា មានភស្តុតាងគ្រប់គ្រាន់បញ្ជាក់ថា លោក មាស មុត ស្ថិតក្នុងចំណោមជនដែលទទួលខុសត្រូវខ្ពស់បំផុតក្នុងរបបខ្មែរក្រហម។ ប៉ុន្តែសហចៅក្រមស៊ើបអង្កេតជាតិ បានជំទាស់ ដោយយល់ថា លោក មាស មុត មិនស្ថិតនៅក្នុងជនត្រូវចោទនិងអ្នកទទួលខុសត្រូវខ្ពស់បំផុតនៃរបបខ្មែរក្រហមនោះទេ។
លោក មាស មុត បច្ចុប្បន្នមានអាយុ៨៣ឆ្នាំ មានស្រុកកំណើតនៅស្រុកឈូក ខេត្តកំពត។ បច្ចុប្បន្ន លោកមានទីលំនៅនៅខេត្តបាត់ដំបង។ លោកត្រូវបានចោទប្រកាន់ថា ធ្លាប់ជាកម្មាភិបាលជាន់ខ្ពស់ក្នុងរបបខ្មែរក្រហម ដោយមានតួនាទីជាសមាជិកគណៈមជ្ឈិមបក្ស ជាលេខាធិការរង ជាលេខាកងពល១៦៤ (រាប់បញ្ចូលទាំងកងទ័ពជើងទឹក) និងជាលេខាស្វយ័តនៅកំពង់សោម៕
