ក្រសួងសុខាភិបាលកម្ពុជា ឱ្យដឹងថា បុរសជនជាតិចិនម្នាក់បានស្លាប់ ដោយសារខ្សោយសួតធ្ងន់ធ្ងរនិងរលាតសួតទាំងសងខាងដែលបណ្ដាលមកពីជំងឺកូវីដ-១៩។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី៥ ខែមេសា ឆ្នាំ២០២១ ឱ្យដឹងថា បុរសជនជាតិចិនរូបនោះ អាយុ៤២ឆ្នាំ រស់នៅក្នុង Apartment PRINCE TOWER សង្កាត់វាលវង់ ខណ្ឌ៧មករា រាជធានីភ្នំពេញ បានស្លាប់នាថ្ងៃទី៤ ខែមេសា ឆ្នាំ២០២១ នៅមន្ទីរពេទ្យមិត្តភាពខ្មែរ-សូវៀត។
ក្រសួងបន្តថា ជនជាតិចិនរូបនេះត្រូវបានរកឃើញវិជ្ជមានកូវីដ-១៩ នៅថ្ងៃទី២៧ ខែមីនា ឆ្នាំ២០២១ ក្នុងស្ថានភាពធ្ងន់ធ្ងរតាំងពីថ្ងៃចូលសម្រាកនៅមន្ទីរពេទ្យនៅថ្ងៃទី២៧ ខែមីនា មកម៉្លេះ ដោយក្រុមគ្រូពេទ្យបានប្រើប្រាស់ម៉ាស៊ីនជំនួយផ្លូវដង្ហើមចាប់តាំងពីថ្ងៃនោះមក ប៉ុន្តែនៅតែមិនអាចជួយសង្គ្រោះបាន។
គិតចាប់តាំងពីថ្ងៃទី២០ ខែកុម្ភៈ ដល់ថ្ងៃទី៥ ខែមេសា ឆ្នាំ២០២១ អ្នកស្លាប់ដោយសារជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ មានចំនួន២១នាក់ហើយ ក្នុងនោះ អ្នកឆ្លងជំងឺនេះមានចំនួន២ ២២២នាក់។
បើតាមក្រសួងសុខាភិបាល ឱ្យដឹងថា គិតមកដល់ព្រឹកថ្ងៃទី៥ ខែមេសា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ នៅទូទាំងប្រទេសមានចំនួន២ ៧៥២នាក់ ព្យាបាលជាសះស្បើយ១ ៧៤៧នាក់ និងកំពុងសម្រាកព្យាបាល៩៧៩នាក់៕
