រដ្ឋបាលខេត្តប៉ៃលិន បានយកសំណុំរឿងរបស់គ្រូពេទ្យម្នាក់ដែលត្រូវបានអភិបាលខេត្តបណ្តេញចេញពីក្របខណ្ឌរដ្ឋមកដោះស្រាយ ក្រោយពីមានលិខិតបញ្ជាពីក្រសួងមុខងារសាធារណៈ។
កាលពីថ្ងៃទី១៩ ខែមីនា អភិបាលខេត្តប៉ៃលិន លោកស្រី បាន ស្រីមុំ បានសម្រេចបណ្ដេញគ្រូពេទ្យម្នាក់ឈ្មោះ ខឹម មុនីកុសល ចេញពីក្របខណ្ឌមន្ត្រីការិយាល័យបង្ការ និងគ្រប់គ្រងជំងឺនៃមន្ទីរសុខាភិបាលខេត្ត ដោយចោទប្រកាន់គ្រូពេទ្យរូបនេះថាបាន «ប្រព្រឹត្តកំហុស និងមានការឆ្គាំឆ្គងក្នុងវិជ្ជាជីវៈ»។ ក្រោយរងការបណ្តេញចេញ នៅថ្ងៃទី២៤ ខែមីនា លោក ខឹម មុនីកុសល បានដាក់ពាក្យបណ្តឹងទៅក្រសួងមុខងារសាធារណៈ និងក្រសួងសុខាភិបាល ឱ្យជួយរកយុត្តិធម៌ដល់លោក។
ប៉ុន្តែគិតត្រឹមថ្ងៃទី៣០ ខែមីនានេះ ក្រសួងសុខាភិបាលដែលជាក្រសួងសាម៉ី នៅមិនទាន់ផ្តល់ចំណាត់ការយ៉ាងណានៅឡើយទេចំពោះករណីខាងលើនេះ។
ចំណែករដ្ឋមន្ត្រីក្រសួងមុខងារសាធារណៈ លោក ព្រុំ សុខា កាលពីថ្ងៃទី២៦ ខែមីនា ឆ្នាំ២០២១ បានចេញលិខិតមួយ ដោយសម្រេចបង្វែរសំណុំរឿងនៃពាក្យបណ្តឹងតវ៉ារបស់លោក ខឹម មុនីកុសល ទៅរដ្ឋបាលខេត្តប៉ៃលិនដោះស្រាយឡើងវិញ តាមរយៈការបង្កើតគណៈកម្មាធិការសម្រុះសម្រួលទំនាស់។
ទាក់ទងករណីនេះ អភិបាលរងខេត្តប៉ៃលិន និងជាអ្នកនាំពាក្យ លោក ធូ ភា បានប្រាប់ វីអូឌី យ៉ាងខ្លីនៅថ្ងៃអង្គារនេះថា ខេត្តបានយកសំណុំរឿងនេះទៅដោះស្រាយឡើងវិញហើយ។ ប៉ុន្តែលោកបានបដិសេធមិននិយាយលម្អិតនៅឡើយទេ ទាក់ទងនឹងនីតិវិធីនិងដំណើរការដោះស្រាយនេះ។
លោក ធូ ភា បានមានប្រសាសន៍ដោយខ្លីថា៖ «បាទ! គេកំពុងធ្វើការហើយ ខ្ញុំអត់បានឆ្លើយច្រើនជាងហ្នឹងទេ»។
យោងតាមលិខិតរបស់លោក ព្រុំ សុខា រដ្ឋមន្ត្រីក្រសួងមុខងារសាធារណៈ កាលពីថ្ងៃទី២៦ ខែមីនា បានបង្គាប់ឱ្យរដ្ឋបាលខេត្តប៉ៃលិន បង្កើតគណៈកម្មាធិការសម្រុះសម្រួលទំនាស់ពាក់ព័ន្ធនឹងកិច្ចការមុខងារសាធារណៈខេត្តប៉ៃលិន ក្នុងការដោះស្រាយករណីនេះឱ្យស្របតាមគោលការណ៍ បែបបទ និងនីតិវិធីដែលមានជាធរមាន។ លើសពីនេះ លិខិតបានបញ្ជាឱ្យអភិបាលខេត្តប៉ៃលិន ចាត់ចែងអនុវត្តនិងដោះស្រាយករណីនេះឱ្យទទួលបានលទ្ធផលល្អប្រសើរ។
លោក ខឹម មុនីកុសល បានចាត់ទុកលិខិតរដ្ឋមន្ត្រីក្រសួងមុខងារសាធារណៈនេះ ថាជាការផ្តល់ពន្លឺយុត្តិធម៌មួយសម្រាប់រូបលោក។
លោកថា យុត្តិធម៌សម្រាប់លោកពេលនេះ គឺរំពឹងថា ទទួលបានក្របខណ្ឌជាមន្ត្រីរាជការរបស់ក្រសួងសុខាភិបាលត្រឡប់មកវិញ។
លោកបានមានប្រសាសន៍យ៉ាងដូច្នេះថា៖ «បាទ! ខ្ញុំឃើញដែរលិខិតហ្នឹង តែដូចស្ងាត់ស្ងៀម ដូចអត់ឃើញអី ប្រហែលគេកំពុងធ្វើការឬក៏យ៉ាងម៉េចដែរ។ យើងចាត់ទុកថាបានយុត្តិធម៌មកវិញខ្លះៗហើយ! ខ្ញុំមិនចេះច្បាប់ទេ តែមិត្តភក្តិនៅខេត្ត គេចាត់ទុកថា [ការបញ្ឈប់ហ្នឹង] ពុំទាន់ផ្លូវការទេ ដោយសារតែមានការបដិសេធពីខាងមុខងារសាធារណៈ! ខ្ញុំមិនសូវយល់ទេ តែតាមតែមិត្តភក្តិគេឆាតមកប្រាប់អញ្ចឹងដែរ។ អញ្ចឹងទេ ខ្ញុំកំពុងតែរង់ចាំមើលគេដោះស្រាយដែរ ថាយ៉ាងម៉េចអីយ៉ាងម៉េច។ អញ្ចឹងទេ ខ្ញុំមិនទាន់មានអីសន្និដ្ឋានច្រើនជាងហ្នឹងទេ»។
ការបណ្តេញចេញមន្ត្រីសុខាភិបាលរូបនេះពីក្របខណ្ឌ កើតមានឡើងក្រោយពេលលោក ខឹម មុនីកុសល បានបង្ហោះសារនៅលើហ្វេសប៊ុកថា «មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កនៅមន្ទីរបក្សខេត្តប៉ៃលិន មិនជួយធ្វើការងារគ្រូពេទ្យខ្លះនោះទេ ប៉ុន្តែនាំគ្នាអង្គុយលេង Facebook ក្នុងតង់ និងថតរូបបង្អួតគេឯងទៅវិញ»។
លោកសរសេររៀបរាប់ទៀតថា «ការងារទាំងឡាយទាំងពួង គឺក្រុមគ្រូពេទ្យជាអ្នកទទួលបន្ទុកទាំងអស់ សូម្បីការរៀបចំបាយម្ហូបឱ្យអ្នកធ្វើចត្តាឡីស័ក»។
វីអូឌី មិនអាចទាក់ទងសុំការបំភ្លឺពីអភិបាលខេត្តប៉ៃលិន លោកស្រី បាន ស្រីមុំ បាននៅឡើយទេ នៅថ្ងៃអង្គារនេះ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី បានចាត់ទុកការបណ្តេញមន្ត្រីចេញពីក្របខណ្ឌរដ្ឋពីសំណាក់អភិបាលខេត្តប៉ៃលិននេះថា ជាការរំលោភអំណាច។
លើសពីនេះ លោកបានចាត់ទុកថា កំហុសរបស់គ្រូពេទ្យរូបនោះមិនគួរធ្ងន់ធ្ងររហូតដល់ការបណ្តេញចេញពីក្របខណ្ឌ ដោយគ្រាន់តែការបញ្ចេញមតិរិះគន់ក្នុងន័យស្ថាបនាបែបនេះឡើយ។
លោកមានប្រសាសន៍យ៉ាងដូច្នេះថា៖ «ខ្ញុំគិតថា វាអត់ត្រូវទាំងករណី [បញ្ឈប់] ហ្នឹងផង! ហើយការផ្តល់សិទ្ធិអំណាចឱ្យទៅខេត្តក្នុងការដោះស្រាយ ឬក៏ដកមន្ត្រីហ្នឹង គឺជារឿងអត់ត្រូវ ព្រោះគាត់អត់មានធ្វើអីខុស យើងយកគោលការណ៍មូលដ្ឋាននៃហេតុផលកិច្ចការរបស់គាត់ គាត់គ្រាន់តែគាត់បញ្ចេញមតិយោបល់តាមបណ្តាញសង្គមរបស់គាត់ ដូចជាអត់មានអីខុសទេ សូម្បីតែគាត់និយាយច្រើនជាងហ្នឹងទៀតក៏មិនគួរធ្វើទុក្ខបុកម្នេញគាត់ដែរ។
លោកបានបន្ថែមថា៖ «អញ្ចឹងបើរឿងករណីហ្នឹង បើអាច យើងឈប់ទៅ យើងផ្អាកកិច្ចការហ្នឹងទៅ ហើយប្រគល់ភារកិច្ចតួនាទីជូនគាត់ទៅវិញ ព្រោះក្នុងបរិបទឥលូវនេះ យើងត្រូវការមន្ត្រីដើម្បីចូលរួមប្រយុទ្ធប្រឆាំងនឹងជំងឺកូវីដ-១៩។ អញ្ចឹងបើតាមយោបល់ខ្ញុំវិញ គឺគោរពសិទ្ធិគាត់ទៅ ហើយដូចអត់មានអីទៅប្រគល់ភារកិច្ចនរណាស្រាវជ្រាវចាត់វិធានការអីទេ ព្រោះគាត់អត់ខុសផង»៕
