ក្រសួងសុខាភិបាល រកឃើញអ្នកឆ្លងជំងឺកូវីដ-១៩ថ្មី ចំនួន១០៥នាក់ ក្នុងនោះមានអ្នកឆ្លងក្នុងព្រឹត្តិការណ៍សហគមន៍២០កុម្ភៈ ចំនួន១០៤នាក់ និងម្នាក់ទៀតជាអ្នកដំណើរមកពីក្រៅប្រទេស។
សេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី៣០ ខែមីនា ឆ្នាំ២០២១ ឱ្យដឹងថា អ្នកឆ្លងជំងឺកូវីដ-១៩ ទាំង១០៥នាក់នោះ រួមមាន ជនជាតិចិន ៩នាក់ ជនជាតិខ្មែរ ៩៥នាក់ និងជនជាតិវៀតណាមម្នាក់ ដោយអ្នកជំងឺទាំងនោះជាអ្នករស់នៅរាជធានីភ្នំពេញ ខេត្តព្រះសីហនុ ស្វាយរៀង ព្រៃវែង កំពង់ចាម និងត្បូងឃ្មុំ។
ដោយឡែក អ្នកជំងឺម្នាក់ទៀតដែលជាអ្នកដំណើរមកពីក្រៅប្រទេសនោះ ក្រសួថា ជាជនជាតិឥណ្ឌូនេស៊ី បានធ្វើដំណើរមកពីប្រទេសឥណ្ឌូនេស៊ី មកដល់កម្ពុជា នៅថ្ងៃទី១៦ ខែមីនា ឆ្នាំ២០២១។
ក្រៅពីអ្នកឆ្លង ក្រសួងថាក៏មានអ្នកជាសះស្បើយពីជំងឺនេះចំនួន៤នាក់ផងដែរដែលជាអ្នកបានឆ្លងក្នុងព្រឹត្តិការណ៍សហគមន៍២០កុម្ភៈ។
ក្នុងរយៈពេល៤០ថ្ងៃកន្លងមកនេះ អ្នកឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ បានកើនដល់១ ៨៥១នាក់ ក្នុងនោះ ស្លាប់១១នាក់។
របាយការណ៍ក្រសួងសុខាភិបាល ឱ្យដឹងទៀតថា គិតត្រឹមព្រឹកថ្ងៃទី៣០ ខែមីនា ឆ្នាំ២០២១ អ្នកដែលត្រូវបានរកឃើញថាបានឆ្លងកូវីដ-១៩ នៅទូទាំងប្រទេស សរុប២ ៣៧៧នាក់ ក្នុងនោះ ព្យាបាលជាសះស្បើយ១ ១៧៦នាក់ និងកំពុងសម្រាកព្យាបាលចំនួន១ ១៨៦នាក់៕
