សមត្ថកិច្ចរាជធានីភ្នំពេញ បានបញ្ជូនខ្លួនជនជាតិចិននិងវៀតណាមចំនួន១៤នាក់ដែលបានក្លែងបន្លំធ្វើជាគ្រូពេទ្យចុះយកសំណាកហើយជំរិតទារប្រាក់ពីជនជាតិចិនម្នាក់ ទៅសាលាដំបូងរាជធានីភ្នំពេញ ដើម្បីបន្តនីតិវិធី។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ប្រាប់ វីអូឌី ថាជនជាតិចិននិងវៀតណាមទាំង១៤នាក់ នាំជនរងគ្រោះទៅបង្ខាំងទុកនៅសណ្ឋាគារ SKAYLINE ស្ថិតនៅសង្កាត់មិត្តភាព ខណ្ឌ៧មករា កាលពីថ្ងៃទី២០ ខែមីនា ឆ្នាំ២០២១ រហូតដល់ថ្ងៃទី២៣ ខែមីនា ទើបដោះលែងវិញ បន្ទាប់ជំរិតទារប្រាក់ ៣ ម៉ឺនដុល្លារពីជនរងគ្រោះ។
លោកបន្តថា កម្លាំងនាយកដ្ឋាននគរបាលព្រហ្មទណ្ឌ សហការជាមួយស្នងការ បានឃាត់ខ្លួនជនជាតិចិននិងវៀតណាមទាំង១៤នាក់ នៅសង្កាត់ផ្សារកណ្តាល១ ខណ្ឌដូនពេញ រាជធានីភ្នំពេញ ហើយបញ្ជូនជនជាតិចិននិងវៀតណាមទៅតុលាការនៅព្រឹកមិញនេះ ដើម្បីឱ្យចាត់ការតាមនីតិវិធី។
លោកបន្តថា៖ «ចាប់ខ្លួនជនរងគ្រោះនៅថ្ងៃទី២០ ខែមីនា រហូតដល់ថ្ងៃទី២៣ ខែមីនា បានដោះលែងវិញ ហើយសមត្ថកិច្ចចម្រុះបានសហការគ្នា ហើយថ្ងៃទី២៥ ខែមីនា បានធ្វើការឃាត់ខ្លួនបាន ហើយព្រឹកមិញបានបញ្ជូនទៅតុលាការទាំងអស់»។
លោក សាន សុខសីហា បន្តថា អ្នកទាំង១៤នាក់ដែលសមត្ថកិច្ចឃាត់ខ្លួនបាននោះ មានជនជាតិចិន៧នាក់ និងជនជាតិវៀតណាម៧នាក់។ លោកបញ្ជាក់ថា ជនរងគ្រោះដែលត្រូវបានជនជាតិចិននិងជនជាតិវៀតណាមបន្លំធ្វើជាគ្រូពេទ្យចុះយកសំណាកដើម្បីជំរិតទារប្រាក់នោះ គឺជាជនជាតិចិន។
វីអូឌី មិនទាន់អាចសុំការអត្ថាធិប្បាយពីអ្នកនាំពាក្យ និងជាព្រះរាជអាជ្ញារងអមសាលាដំបូងរាជធានីភ្នំពេញ លោក គុជ គីមឡុង ជុំវិញករណីនេះបានទេ មកដល់ម៉ោង៥រសៀលថ្ងៃអង្គារនេះ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ជំរុញឱ្យអាជ្ញាធរបង្កើនការការពារនិងការបង្រ្កាប ដើម្បីកុំករណីនេះកើតឡើងដដែល។
លោកថា៖ «ជារូបភាពមិនល្អទេដែលប្រើក្លែងបន្លំជាគ្រូពេទ្យនេះ។ អ៊ីចឹងសំខាន់ការបង្កើននៃកិច្ចការការពារនិងការបង្ក្រាបរបស់សមត្ថកិច្ចយើងទៅលើជនជាតិចិនដែលប្រព្រឹត្តបទល្មើសហ្នឹង ដើម្បីទប់ស្កាត់កុំឱ្យកើតមានតទៅទៀត ជាពិសេសហ្នឹងគឺការអនុវត្តច្បាប់អន្តោប្រវេសន៍ក្នុងការចូលមកកម្ពុជា បើសិនជាជនជាតិវៀតណាមនិងចិនចូលដោយខុសច្បាប់ អាហ្នឹងយើងអនុវត្តតាមច្បាប់អន្តោប្រវេសន៍ជាមុន»៕