សមាគមបណ្ដាញយុវជនកម្ពុជា (CYN) ស្នើជាថ្មីដល់ក្រសួងបរិស្ថាន បញ្ឈប់ការរឹតត្បិតសេរីភាពទៅលើសហគមន៍មូលដ្ឋាន សកម្មជន និងអង្គការសង្គមស៊ីវិល ក្នុងការចូលរួមចុះល្បាតនៅតំបន់ការពារ ក្រោយពីសមាគមនេះបានរកឃើញបទល្មើសព្រៃឈើ និងកាប់ឆ្ការព្រៃដើម្បីយកដីធ្វើកម្មសិទ្ធិចំនួន១០០ករណី នៅក្នុងដែនជម្រកសត្វព្រៃព្រះរការ ក្នុងខេត្តព្រះវិហារ ។
សេចក្តីប្រកាសព័ត៌មានរបស់សមាគមបណ្តាញយុវជនកម្ពុជា នៅថ្ងៃទី២៩ ខែមីនា ឆ្នាំ២០២១នេះ បានលើកឡើងថា នៅចន្លោះពីថ្ងៃទី១៩ ដល់ ថ្ងៃទី២១ ខែមីនា ឆ្នាំ២០២១នេះ ក្រុមអ្នកការពារព្រៃឈើ បានប្រមូលភស្តុតាងអំពីបទល្មើសព្រៃឈើនៅក្នុងដែនជម្រកសត្វព្រៃព្រះរការ ស្ថិតក្នុងស្រុកចំនួន៣ រួមមាន ស្រុកជាំក្សាន្ត ស្រុកត្បែងមានជ័យ និងស្រុកឆែប ខេត្តព្រះវិហារ ដោយបានរកឃើញមានករណីបទល្មើសព្រៃឈើដល់ទៅ១០០ករណី។
សេចក្តីប្រកាសព័ត៌មានដដែលបន្តថា បទល្មើសដែលបានកើតឡើងក្នុងរយៈចម្ងាយអង្កេតប្រវែង៥៥គីឡូម៉ែត្រនោះ ក្រុមអ្នកការពារព្រៃឈើ បានរកឃើញបទល្មើសកាប់បំផ្លាញដើមឈើដែលភាគច្រើនជាប្រភេទដើមឈើកម្រនិងមានតម្លៃ ដែលមានទំហំមុខកាត់ចាប់ពី៤៥សង់ទីម៉ែត្រ រហូតដល់១,៣៥ម៉ែត្រ ក្នុងតំបន់ព្រៃស្រោង និងពាក់កណ្តាលព្រៃស្រោង។
សេចក្តីប្រកាសព័ត៌មាន បញ្ជាក់ថា៖ «ប្រភេទឈើដែលត្រូវរងការកាប់បំផ្លាញមានប្រភេទដូចជា ឈើទាល ស្ទៀង ផ្តៀក ពពេល ផ្ចឹកឧត្តម គគី និងសុក្រំ ជាដើម។ ហើយព្រមទាំងមានការដុតនិងឆ្ការផ្នែកខ្លះថែមទៀតផង ដែលភាគច្រើនកើតឡើងនៅចំណុចអូរតាម៉ាក់»។
សមាគមនេះក៏បានបង្ហាញពីក្តីបារម្ភចំពោះការបាត់បង់ព្រៃឈើដែលជាប្រភេទឈើកម្រទាំងនោះ បើសិនជារដ្ឋាភិបាលពុំមានការទប់ស្កាត់ឱ្យមានប្រសិទ្ធភាពទេនោះ។
សេចក្ដីប្រកាសព័ត៌មានរបស់សមាគមបណ្តាញយុវជនកម្ពុជា បន្តថា៖ «ការកាប់ឆ្ការព្រៃដោយខុសច្បាប់ដែលបង្កផលប៉ះពាល់ដល់ជម្រកសត្វព្រៃ ជាពិសេសការបាត់បង់ប្រភេទដើមឈើផ្តល់ជ័រច្បោះ និងការដកហូតអនុផលព្រៃឈើដែលជាប្រភពសេដ្ឋកិច្ចដ៏សំខាន់សម្រាប់សហគមន៍មូលដ្ឋាន នឹងអាចឈានទៅរកវិនាសកម្មបាត់បង់ទាំងស្រុងនូវដែនជម្រកសត្វព្រៃព្រះរការនាពេលអនាគត»។
ជាថ្មីម្តងទៀត សមាគមនេះបានស្នើក្រសួងបរិស្ថានបញ្ឈប់ការរឹតត្បិតសិទ្ធិសេរីភាព និងបើកចំហសម្រាប់សហគមន៍មូលដ្ឋាន សកម្មជនអ្នកស្រឡាញ់ព្រៃឈើ សមាគមអង្គការសង្គមស៊ីវិល និងសាធារណជន បានចូលរួមកិច្ចការល្បាត ការពារ អភិរក្ស និងថែរក្សាព្រៃឈើ ស្របតាមបញ្ញត្តិស្តីពីសិទ្ធិនិងករណីយកិច្ចរបស់ពលរដ្ឋ ដូចមានចែងក្នុងរដ្ឋធម្មនុញ្ញ និងច្បាប់ស្តីពីតំបន់ការពារធម្មជាតិ។
មន្ត្រីជាន់ខ្ពស់ផ្នែកតស៊ូមតិ នៃសមាគមបណ្ដាញយុវជនកម្ពុជា លោក សាន់ ម៉ាឡា មានប្រសាសន៍បន្ថែមលើសេចក្តីប្រកាសព័ត៌មានថា ករណីរកឃើញការកាប់បំផ្លាញព្រៃឈើនេះមានលក្ខណៈគួរឱ្យបារម្ភខ្លាំង ដោយសារតែបទល្មើសទាំងនេះបានកើតឡើងដល់ទៅ១០០ករណី។
លោកក៏បានបង្ហាញការសោកស្តាយដែលកន្លងមកនេះ ប្រជាពលរដ្ឋសហគមន៍ សកម្មជនព្រៃឈើ និងសង្គមស៊ីវិលមួយចំនួនត្រូវហាមឃាត់មិនឱ្យចូលល្បាត ស្របពេលដែលបទល្មើសព្រៃឈើនៅតែបន្តកើតឡើងដដែល។
លោកបន្តថា៖ «ការរកឃើញនេះស្របពេលដែលសកម្មភាពរបស់សហគមន៍មូលដ្ឋាន ក្រុមអ្នកការពារព្រៃឈើហ្នឹង ត្រូវបានគេរឹតត្បិត ដូច្នេះខ្ញុំគិតថា វាជារឿងមួយដែលគួរឱ្យសោកស្ដាយជាទីបំផុត។ យើងអាចមើលឃើញបានថា ការរឹតត្បិតអ្នកការពារព្រៃឈើនិងសហគមន៍ មិនមែនជាដំណោះស្រាយល្អ ហើយក្រសួងបរិស្ថានក៏មិនអាចរ៉ាប់រងការងារព្រៃឈើបានដែរ»។
លោក ម៉ាឡា ស្នើឱ្យក្រសួងបរិស្ថាន ត្រូវធ្វើការកំណែទម្រង់ដោយបើកចំហឱ្យមានការចូលរួមការពារព្រៃឈើពីគ្រប់ភាគីពាក់ព័ន្ធឱ្យបានពេញលេញ ហើយត្រូវធ្វើការត្រួតពិនិត្យដោយចុះធ្វើអធិការកិច្ចចំពោះមន្រ្តីថ្នាក់ក្រោមដែលកំពុងបម្រើការងារនៅតាមតំបន់ការពារផ្សេងៗ ដើម្បីទប់ស្កាត់បទល្មើសព្រៃឈើឱ្យមានប្រសិទ្ធភាព។
អ្នកនាំពាក្យក្រសួងបរិស្ថាន លោក នេត្រ ភក្រ្តា បានបដិសេធឆ្លើយតបចំពោះរបាយការណ៍រកឃើញរបស់សមាគមបណ្តាញយុវជនកម្ពុជា។
លោកថា៖ «ក្រសួងបរិស្ថានយើងមិនឆ្លើយតបទៅនឹងរបាយការណ៍របស់ភាគីទី៣ ដែលមិនមែនជាដៃគូនៃកិច្ចសហប្រតិបត្តិការស្របច្បាប់ជាមួយនឹងក្រសួងបរិស្ថានទេ»។
តែយ៉ាងណា អ្នកនាំពាក្យរូបនេះធ្លាប់បានបញ្ជាក់ថ្មីៗនេះថា បទល្មើសព្រៃឈើដែលកំពុងកើតមានគឺស្ថិតក្នុងទ្រង់ទ្រាយតូចប៉ុណ្ណោះ ហើយក្រសួងស្វាគមន៍ចំពោះការចូលរួមការពារព្រៃឈើ ប៉ុន្តែក្រុមដែលចូលរួមត្រូវតែមានចុះបញ្ជីការស្របតាមផ្លូវច្បាប់៕