របាយការណ៍របស់ខេមបូចា ឱ្យដឹងថា ក្នុងឆ្នាំ២០២០កន្លងទៅ មានករណីយាយីចំនួន៣៥ករណីដែលកើតឡើងលើអ្នកសារព័ត៌មានចំនួន៧២នាក់។
សមាគមសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា បានចេញផ្សាយរបាយការណ៍ជាលើកដំបូងរបស់ខ្លួន ស្តីពី «ស្ថានភាពអ្នកសារព័ត៌មានក្នុងឆ្នាំ២០២០» នៅថ្ងៃនេះ។ ក្នុងរបាយការណ៍នេះ ឱ្យដឹងថា នៅក្នុងឆ្នាំ២០២០ ការយាយីទាំង៣៥ករណី ប្រឆាំងនឹងអ្នកសារព័ត៌មានចំនួន៧២នាក់នោះ រួមមាន ការឃុំខ្លួនក្នុងពន្ធនាគារ និងការប្រើអំពើហិង្សា ក្នុងនោះ ការឃុំខ្លួនមានចំនួន៣១នាក់ (ស្មើនឹងប្រមាណ៤៣% នៃករណីសរុប) និង ២២នាក់ទៀតទទួលរងការវាយដំលើរូបកាយឬរងការគំរាមប្រើអំពើហិង្សានៅពេលកំពុងបំពេញការងារជាដើម។
ខេមបូចា កត់សម្គាល់ថា ក្នុងឆ្នាំ២០២០នោះដែរ អ្នកអនុវត្តច្បាប់តែងតែយកក្រមព្រហ្មទណ្ឌមកប្រើជាឧបករណ៍ ដើម្បីបំភិតបំភ័យនិងចាប់អ្នកសារព័ត៌មានភាគច្រើនដាក់ពន្ធនាគារ ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ឬ «ជំរិតទារប្រាក់» តាមមាត្រា៤៩៥ និងមាត្រា២៣២ នៃក្រមព្រហ្មទណ្ឌ។
ខេមបូចា បញ្ជាក់ថា គិតត្រឹមខែធ្នូ ឆ្នាំ២០២០ យ៉ាងហោចណាស់មានអ្នកសារព័ត៌មានចំនួន១០នាក់ កំពុងជាប់ពន្ធនាគារ និងស្ថិតក្រោមការឃុំខ្លួនបណ្តោះអាសន្ន ដោយរងការចោទប្រកាន់ពីបទឧក្រិដ្ឋ ក្នុងនោះមានលោក រស់ សុឃិត និងលោក សុខ ឧត្តម ដែលត្រូវផ្តន្ទាទោស និងចោទប្រកាន់ពីបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍»។ រីឯអ្នកសារព័ត៌មានចំនួន៨នាក់ទៀតកំពុងស្ថិតនៅក្នុងការឃុំខ្លួនបណ្តោះអាសន្នក្នុងពន្ធនាគារ ដោយជាប់ចោទពីបទ «ជំរិតទារប្រាក់»។
សេចក្តីប្រកាសព័ត៌មានដដែលឱ្យដឹងទៀតថា ការបន្តចាប់ឃុំខ្លួន ការឃុំឃាំង និងការគំរាមកំហែងជាបន្តបន្ទាប់លើអ្នកសារព័ត៌មាន បានធ្វើឱ្យខូចដល់តួនាទីរបស់ប្រព័ន្ធផ្សព្វផ្សាយនៅក្នុងសង្គមប្រជាធិបតេយ្យ និងធ្វើឱ្យមានការភ័យខ្លាចចំពោះអ្នកដែលបានចុះផ្សាយរឿងរ៉ាវឬករណីដែលពាក់ព័ន្ធនឹងមន្ត្រីអ្នកមានអំណាច។
វីអូឌី មិនអាចសុំការអត្ថាធិប្បាយជុំវិញករណីនេះពីអ្នកនាំពាក្យក្រសួងព័ត៌មាន លោក មាស សុភ័ណ្ឌ បានទេ។
អ្នកនាំពាក្យក្រសួងយុត្តិធម៌ លោក ជិន ម៉ាលីន ចាត់ទុករបាយការណ៍របស់ ខេមបូចា ថាធ្វើឡើងផ្អែកតាមរូបភាពនិងព្រឹត្តិការណ៍ខាងក្រៅតែប៉ុណ្ណោះ ដោយមិនបានសិក្សាពីអង្គហេតុនិងអង្គច្បាប់ឱ្យបានគ្រប់ជ្រុងជ្រោយនោះទេ។ លោកបន្តថា របាយការណ៍នេះធ្វើឡើងដើម្បីផ្គាប់ចិត្តម្ចាស់ជំនួយបរទេស ហេតុនេះមិនអាចលើកកម្ពស់សិទ្ធិសេរីភាពអ្នកសារព័ត៌មានបាននោះទេ។
លោកមានប្រសាសន៍ថា៖ «បើ ខេមបូចា ធ្វើតែរបាយការណ៍របៀបនេះ ដើម្បីផ្គាប់ចិត្តម្ចាស់ជំនួយបរទេសនៅពីក្រោយ ឬមួយក៏ធ្វើរបាយការណ៍ដើម្បីតែបម្រើឱ្យរបៀបវារៈនយោបាយរបស់បរទេសដែលជាម្ចាស់ជំនួយនោះ របាយការណ៍នឹងមិនមានប្រយោជន៍សម្រាប់សង្គមជាតិ ហើយមិនមានប្រយោជន៍ក្នុងការលើកស្ទួយសិទ្ធិសេរីភាព និងការពារសិទ្ធិសេរីភាពរបស់អ្នកសារព័ត៌មាននោះទេ»។
នាយកប្រតិបត្តិ នៃសមាគមសម្ព័ន្ធអ្នកសារព័ត៌មានកម្ពុជា លោក ណុប វី បានច្រានចោលចំពោះការលើកឡើងរបស់អ្នកនាំពាក្យក្រសួងយុត្តិធម៌ និងថារបាយការណ៍ដែល ខេមបូចា បានរកឃើញនេះ ជាព័ត៌មានពិតកើតមានឡើងនៅក្នុងសង្គមជាក់ស្តែង និងមានភស្តុតាងគ្រប់ជ្រុងជ្រោយថែមទៀតផង។
ទោះយ៉ាងណា លោកបានអំពាវនាវទៅរដ្ឋាភិបាលជួយអន្តរាគមន៍កុំឱ្យមានការប្តឹងអ្នកសារព័ត៌មានតាមក្រមព្រហ្មទណ្ឌ និងស្នើឱ្យទម្លាក់ការចោទប្រកាន់លើអ្នកសារព័ត៌មាន រួមទាំងស្វែងរកឃាតករដែលបាញ់សម្លាប់អ្នកសារព័ត៌មាននាពេលកន្លងមកដើម្បីផ្តន្ទាទោសតាមច្បាប់ជាដើម នោះទើបធ្វើឱ្យសេរីភាពអ្នកសារព័ត៌មានមានភាពល្អប្រសើរនៅកម្ពុជា។
លោកស្នើដូច្នេះថា៖ «យើងស្នើឱ្យបញ្ចប់ចំពោះការប្តឹងផ្តល់ប្រឆាំងអ្នកសារព័ត៌មាន ហើយផ្តល់ការគាំទ្រតាមរយៈការណែនាំទៅអាជ្ញាធរមូលដ្ឋាន ដើម្បីឱ្យមានកិច្ចសហប្រតិបត្តិការល្អ ជាជាងការហាមប្រាមកិច្ចការងាររបស់អ្នកសារព័ត៌មាន។ ចំណុចមួយទៀត យើងក៏ទទូចឱ្យមានការប្រើប្រាស់ច្បាប់ស្តីពីរបបសារព័ត៌មាន ដោយបញ្ឈប់ប្រើប្រាស់ក្រមព្រហ្មទណ្ឌដើម្បីប្តឹងផ្តល់ប្រឆាំងជាមួយអ្នកសារព័ត៌មាន»។
របាយការណ៍សេរីភាពសារព័ត៌មានពិភពលោកឆ្នាំ២០១៩ ដែលចេញដោយអង្គការអ្នកកាសែតគ្មានព្រំដែន បានចាត់ចំណាត់ថ្នាក់សេរីភាពសារព័ត៌មានកម្ពុជា ១៤៣ លើ ១៨០ ដែលបានធ្លាក់ចុះជាបន្តបន្ទាប់ចាប់តាំងពីឆ្នាំ២០១៧មក ដោយកាលពីឆ្នាំ២០១៧ កម្ពុជាទទួលបានចំណាត់ថ្នាក់ ១៣២៕