ក្រសួងសុខាភិបាល នៅថ្ងៃនេះ រកឃើញអ្នកឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ ចំនួន៤០នាក់បន្ថែមទៀត ក្នុងនោះមានទាំងទារកអាយុ៤ខែ និងកុមារអាយុក្រោម១០ឆ្នាំផងដែរ។
សេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី២៩ ខែមីនា ឆ្នាំ២០២១ ឱ្យដឹងថា អ្នកឆ្លងជំងឺកូវីដ-១៩ ទាំង៤០នាក់នោះ មានជនជាតិចិន ៦នាក់ និងជនជាតិខ្មែរ ៣៤នាក់។ ក្រសួងបន្តទៀតថា ក្នុងចំណោមជនជាតិខ្មែរ ៣៤នាក់នោះ ក៏មានទារកអាយុ៤ខែម្នាក់ និងកុមារអាយុចន្លោះពី១ឆ្នាំ ដល់៩ឆ្នាំ ចំនួន៦នាក់។
ក្រសួងបន្តថា អ្នកជំងឺខាងលើត្រូវបានក្រសួងរកឃើញមានកូវីដ-១៩ នៅរាជធានីភ្នំពេញ ខេត្តសៀមរាប ត្បូងឃ្មុំ តាកែវ ស្វាយរៀង ក្រចេះ កោះកុង កំពត និងខេត្តកណ្ដាល។
ក្រៅពីអ្នកឆ្លង ក្រសួងថា ក៏មានអ្នកជាសះស្បើយពីជំងឺនេះចំនួន៦នាក់ផងដែរដែលជាអ្នកបានឆ្លងក្នុងព្រឹត្តិការណ៍សហគមន៍២០កុម្ភៈ។
ចាប់ពីថ្ងៃទី២០ ខែកុម្ភៈ ដល់ថ្ងៃទី២៩ ខែមីនា ឆ្នាំ២០២១ អ្នកឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ សរុប១ ៧៤៨នាក់ ក្នុងនោះ ស្លាប់ចំនួន១១នាក់។
របាយការណ៍ក្រសួងសុខាភិបាល ឱ្យដឹងទៀតថា គិតត្រឹមព្រឹកថ្ងៃទី២៦ ខែមីនា ឆ្នាំ២០២១ អ្នកដែលត្រូវបានរកឃើញថាបានឆ្លងកូវីដ-១៩ នៅទូទាំងប្រទេស សរុប២ ២៧៣នាក់ ក្នុងនោះ ព្យាបាលជាសះស្បើយ១ ១៧២នាក់ និងកំពុងសម្រាកព្យាបាលចំនួន១ ០៨៧នាក់៕
