អាជ្ញាធររាជធានីភ្នំពេញ ឱ្យដឹងថា ជនបរទេសម្នាក់ដែលរឹងរូសមិនព្រមឱ្យក្រុមគ្រូពេទ្យយកសំណាកទៅពិនិត្យរកជំងឺកូវីដ និងមន្ត្រីយោធាម្នាក់ដែលរត់ចេញពីកន្លែងធ្វើចត្តាឡីស័កនៅរាជធានីភ្នំពេញទៅខេត្តពោធិ៍សាត់នោះ មិនប្រឈមនឹងវិធានការរដ្ឋបាលនិងច្បាប់នោះទេ ដោយសារពួកគេមិនមានផ្ទុកកូវីដ-១៩ និងបានកែខ្លួនតាមការណែនាំរបស់ក្រសួងសុខាភិបាលវិញ។
អភិបាលរាជធានីភ្នំពេញ លោក ឃួង ស្រេង ប្រាប់ វីអូឌី នៅថ្ងៃនេះថា កាលពីល្ងាចថ្ងៃម្សិលមិញ បុរសបរទេសម្នាក់ស្នាក់នៅក្នុងខុនដូមួយកន្លែងក្នុងភូមិសន្សំកុសល៥ សង្កាត់បឹងទំពន់ទី១ ខណ្ឌមានជ័យ មានការជាប់ពាក់ព័ន្ធផ្ទាល់ជាមួយអ្នកជំងឺកូវីដ-១៩ ហើយមិនព្រមឱ្យក្រុមគ្រូពេទ្យយកសំណាករបស់គាត់នោះទេ បើទោះបីជាក្រុមគ្រូពេទ្យបានព្យាយាមបញ្ចុះបញ្ចូលពន្យល់ហេតុផលយ៉ាងណាក៏ដោយ។
ទោះជាយ៉ាងណា លោកថា ក្រោយពីការសម្របសម្រួលនិងការពន្យល់ណែនាំពីស្ថាប័នពាក់ព័ន្ធ រួមទាំងក្រុមគ្រូពេទ្យក្រសួងសុខាភិបាល នៅទីតាំងខុនដូនោះ ជនបរទេសរូបនោះក៏បានយល់ព្រមឡើងរថយន្តជាមួយក្រុមគ្រូពេទ្យទៅធ្វើចត្តាឡីស័កនៅមណ្ឌលសុខភាពចាក់អង្រែក្រោមហើយ។
កាលពីម្សិលមិញនេះដែរ មន្ត្រីយោធាម្នាក់ដែលរត់គេចពីកន្លែងចត្តាឡីស័កនៅរាជធានីភ្នំពេញ ទៅខេត្តពោធិ៍សាត់ ចំនួន២ថ្ងៃ ក៏ត្រូវបានក្រុមការងារឃាត់និងឃុំខ្លួនមន្ត្រីយោធានោះនៅមណ្ឌលចត្តាឡីស័កខេត្ត ដើម្បីយកសំណាកទៅពិនិត្យដែរ។
តែករណីនេះ លោក ឃួង ស្រេង អះអាងថា សមត្ថកិច្ចពាក់ព័ន្ធបានយកចិត្តទុកដាក់ចុះស្រាវជ្រាវឃាត់ខ្លួនមន្ត្រីយោធានិងជនបរទេសនោះ ដើម្បីធ្វើចត្តាឡីស័កភ្លាមៗផងដែរ ប៉ុន្តែសមត្ថកិច្ចមិនបានដាក់ពិន័យផ្នែករដ្ឋបាល ឬដាក់ទណ្ឌកម្មច្បាប់ ឬបណ្តេញចេញពីកម្ពុជានោះទេ ដោយសារតែពួកគេមិនមែនជាអ្នកផ្ទុកជំងឺកូវីដ-១៩ និងមិនបានចម្លងទៅអ្នកដទៃ ជាដើម។
លោកមានប្រសាសន៍ថា៖ «ក្នុងករណីគាត់ផ្ទុកជំងឺ ហើយគាត់ចេញដើរទៅចម្លងគេ អាហ្នឹងយើងមិនអាចអត់ឱនឱ្យបានឬអប់រំបានទេ គ្រាន់តែថា គាត់ឡូឡាក្នុងកន្លែងធ្វើចត្តាឡីស័ក ហើយមិនទាន់បង្កគ្រោះថ្នាក់ដល់អ្នកដទៃ យើងអប់រំ! ប៉ុន្តែបើគាត់ចេញក្រៅ បង្កការចម្លងដល់អ្នកផ្សេងៗទៀត បង្កគ្រោះមហន្តរាយដល់អ្នកផ្សេងឬប្រទេសជាតិ យើងអនុវត្តច្បាប់មិនចាំបាច់ទុកយូរទេ ព្រោះច្បាប់យើងចូលជាធរមានហើយ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត គាំទ្រនឹងការលើកឡើងរបស់អាជ្ញាធររាជធានីភ្នំពេញ ដែលថា មិនធ្វើការពិន័យរដ្ឋបាលឬដាក់ទណ្ឌកម្មច្បាប់លើអ្នកដែលប្រព្រឹត្តខុសនឹងវិធានការសុខាភិបាល ខណៈពួកគេមិនទាន់យល់ច្បាស់ពីអនុក្រឹត្យនិងច្បាប់ថ្មីស្តីពី «វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត» ។
ប៉ុន្តែលោក សំអាត បញ្ជាក់ថា បើថ្ងៃក្រោយមានអ្នកផ្សេងប្រព្រឹត្តខុសបែបនេះដែរ ហើយអាជ្ញាធរចាត់វិធានការពិន័យឬដាក់ទណ្ឌកម្មច្បាប់ នឹងរកការរិះគន់ពីមហាជនទៅវិញ។
លោកមានប្រសាសន៍ថា៖ «ការអនុវត្តនេះធ្វើម៉េចឱ្យមានភាពស្មើគ្នា ដើម្បីកុំឱ្យមានការរិះគន់ទៅថ្ងៃក្រោយថា នៅពេលដែលអ្នកផ្សេងគាត់ត្រូវធ្វើអញ្ចឹងដែរ ត្រូវជាប់ពិន័យ ត្រូវជាប់ពន្ធនាគារ គឺមានការរិះគន់ច្រើនហើយ»។
លោក អំ សំអាត ផ្តល់ជាអនុសាសន៍ថា អនុក្រឹត្យឬច្បាប់ស្តីពី «វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត» រដ្ឋាភិបាលត្រូវធ្វើការផ្សព្វផ្សាយឱ្យបានទូលំទូលាយ ដើម្បីបញ្ជ្រាបដល់ប្រជាពលរដ្ឋទូទាំងប្រទេស មុននឹងយកទៅអនុវត្តតឹងរ៉ឹងលើអ្នកដែលប្រព្រឹត្តខុសច្បាប់នោះ។
មាត្រា៧ នៃច្បាប់ ស្តីពី «វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត» ចែងថា អំពើគេចវេះមិនធ្វើចត្តាឡីស័ក ឬចេញពីកន្លែងធ្វើចត្តាឡីស័ក ដែលកំណត់ដោយក្រសួងសុខាភិបាលឬអាជ្ញាធរមានសមត្ថកិច្ច ត្រូវទទួលពិន័យអន្តរការណ៍តាមការកំណត់នៅក្នុងអនុក្រឹត្យ និងត្រូវផ្តន្ទាទោសពី ៦ខែ ទៅ ៣ឆ្នាំ និងពិន័យជាប្រាក់ពី ២ ០០០ ០០០រៀល ទៅ ១០ ០០០ ០០០រៀល កាលបើអំពើនេះបណ្តាលឱ្យចម្លងជំងឺកូវីដ-១៩ ដល់អ្នកដទៃ។
ចំណែកមាត្រា២១ នៃអនុក្រឹត្យស្តីពី «វិធានការសុខាភិបាលដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត» ចែងថា ត្រូវផ្តន្ទាទោសជាពិន័យអន្តរការណ៍ពី ១ ០០០ ០០០រៀល ទៅ ៥ ០០០ ០០០រៀល ចំពោះបុគ្គលដែលមិនសហការជាមួយមន្ត្រីសុខាភិបាលដើម្បីយកសំណាកទៅវិភាគរកមេរោគកូវីដ-១៩ ដូចមានចែងក្នុងមាត្រា១០នៃអនុក្រឹត្យនេះ។
មាត្រា២២ នៃអនុក្រឹត្យដដែលចែងថា ត្រូវផ្តន្ទាទោសជាពិន័យអន្តរការណ៍ពី ១ ០០០ ០០០រៀល ទៅ ៥ ០០០ ០០០រៀល ចំពោះបុគ្គលដែលគេចវេះពីការធ្វើចត្តាឡីស័ក ឬគេចចេញពីកន្លែងធ្វើចត្តាឡីស័ក ក្នុងអំឡុងពេលធ្វើចត្តាឡីស័ក តែមិនបណ្តាលឱ្យមានការចម្លងជំងឺកូវីដ-១៩ ដល់អ្នកដទៃ៕