រដ្ឋមន្ត្រីក្រសួងមហាផ្ទៃ លោក ស ខេង បានក្រើនរំឭកមន្ត្រីពាក់ព័ន្ធឱ្យពង្រឹងប្រសិទ្ធភាពទប់ស្កាត់ជំងឺកូវីដ-១៩ កុំឱ្យឆ្លងចូលទៅក្នុងពន្ធនាគារ ដោយថា ជំងឺនេះកំពុងឆ្លងរាលដាលក្នុងសហគមន៍ និងបានសម្លាប់មនុស្សមួយចំនួន រួមទាំងមន្ត្រីនគរបាលជាតិផងដែរ។
លោក ស ខេង បានលើកឡើងនៅក្នុងសេចក្តីណែនាំចុះថ្ងៃទី២៣ ខែមីនា ឆ្នាំ២០២១ ថាជំងឺកូវីដ-១៩ ពាក់ព័ន្ធនឹងព្រឹត្តិការណ៍សហគមន៍២០កុម្ភៈ មានអ្នកឆ្លងកើនឡើងជាបន្តបន្ទាប់ និងបានសម្លាប់មនុស្ស៥នាក់ ក្នុងនោះមានមន្ត្រីគរបាលជាតិ២រូបផងដែរ។
បើតាមសេចក្តីណែនាំនោះ លោក ស ខេង បានដាក់ចេញវិធានការ៦ចំណុច រួមមាន ថ្នាក់ដឹកនាំ ត្រូវអនុវត្តឱ្យបានខ្ជាប់ខ្ជួននូវវិធានការសុខាភិបាល ដូចជា ពាក់ម៉ាស់ លាងដៃ រក្សាគម្លាតសុវត្ថិភាពសង្គម គម្លាតសុវត្ថិភាពបុគ្គល និងត្រូវអនុវត្តតាមច្បាប់ស្តីពី «វិធានទប់ស្កាត់ការឆ្លងរាលដាលជំងឺកូវីដ-១៩» និង «អនុក្រឹត្យស្តីពីវិធានសុខាភិបាល»។
ក្រៅពីនេះ លោកបានណែនាំឱ្យផ្សព្វផ្សាយពីវិធានការច្បាប់ដល់កងកម្លាំងនគរបាលជាតិ មន្ត្រីរាជការស៊ីវិល មន្ត្រីពន្ធនាគារចំណុះឱ្យក្រសួងមហាផ្ទៃ និងក្រុមគ្រួសារ សំដៅដល់ការរួមគ្នាទប់ស្កាត់ជំងឺនេះឱ្យមានប្រសិទ្ធភាព ។
លោកបានគូសបញ្ជាក់ថា៖ «អគ្គនាយកដ្ឋានពន្ធនាគារ ត្រូវបង្កើនការយកចិត្តទុកដាក់ខ្ពស់ក្នុងការពង្រឹងវិធានសុខាភិបាលនានា ការថែរក្សាសុខភាព និងអនាម័យចំពោះជនជាប់ឃុំ ដើម្បីបង្ការទប់ស្កាត់ការឆ្លងជំងឺកូវីដ-១៩ ដល់មន្ត្រីអនុរក្សពន្ធនាគារ និងជនជាប់ឃុំទាំងអស់នៅតាមពន្ធនាគារ និងមណ្ឌលអប់រំកែប្រែនានាទូទាំងប្រទេស»។
អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ លោក នុត សវនា បានប្រាប់ថា ពន្ធនាគារទូទាំងប្រទេស មិនទាន់មានលទ្ធភាពរក្សាគម្លាតសុវត្ថិភាពបុគ្គលរវាងអ្នកជាប់ឃុំនិងអ្នកជាប់ឃុំបាននៅឡើយទេ ដោយសារតែពន្ធនាគារមានស្ថានភាពចង្អៀតណែន។
លោកថា៖ «ការរក្សាគម្លាត យើងធ្វើបានតែរវាងមន្ត្រីនិងជនជាប់ឃុំ មន្ត្រីនិងមន្ត្រីទេ! ចំពោះជនជាប់ឃុំ យើងមិនអាចធ្វើបានទេ ដោយសារស្ថានភាពទីតាំងយើងវាចង្អៀត»។
តែយ៉ាងណា លោកថា មន្ត្រីពន្ធនាគារបានដាក់ចេញនូវចំណាត់ការផ្នែកអនាម័យជាប្រចាំ និងអនុវត្តវិធានសុខាភិបាលមួយចំនួនចាប់តាំងពីកម្ពុជាផ្ទុះជំងឺនេះមក ដូចជា ការចែកម៉ាស់ ចែកសាប៊ូ និងបាញ់អាល់កុលតាមច្រកទ្វារចេញចូល ការត្រួតពិនិត្យកម្តៅទាំងអ្នកជាប់ឃុំនិងមន្ត្រីអនុរក្ស រួមទាំងដាក់ឱ្យនៅដាច់ដោយឡែករយៈពេល២សប្តាហ៍សម្រាប់អ្នកជាប់ឃុំថ្មី ដើម្បីតាមដានសុខភាពមុនដាក់បញ្ចូលទៅក្នុងបន្ទប់រួមគ្នា។
លោកថា៖ «ហើយបើមានការសង្ស័យ ដូចជា ក្តៅខ្លួន ក្អក ឬឈឺក អាហ្នឹងយើងទាក់ទងទៅមន្ទីរពេទ្យបង្អែកភ្លាម ហើយនិងមន្ទីរសុខាភិបាលខេត្ត-រាជធានីភ្លាមៗ»។
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក មួង សូនី ដែលមានប្អូនប្រុសម្នាក់កំពុងជាប់ឃុំនៅពន្ធនាគារព្រៃស បានគាំទ្រវិធានការរបស់ក្រសួងមហាផ្ទៃ ប៉ុន្តែលោកបារម្ភពីប្រសិទ្ធភាពនៃការអនុវត្ត ។
លោកបានគូសបញ្ជាក់ថា កន្លងទៅ ក្នុងពន្ធនាគារ មនុស្សផ្សេងអាចមកស្នាក់នៅជាមួយអ្នកជាប់ឃុំបាន បើពួកគេហ៊ានចាយលុយឱ្យទៅមន្ត្រីពន្ធនាគារ ដែលលោកចង់ឃើញវិធានការទប់ស្កាត់អំពើពុករលួយនេះផងដែរ។
លោកថា៖ «អ្វីដែលខ្ញុំបារម្ភ គឺមន្ត្រីយើងតាំងពីថ្នាក់ក្រោមទៅដល់ថ្នាក់លើខាងពន្ធនាគារហ្នឹង ចូលរួមអនុវត្តឱ្យមានប្រសិទ្ធភាព កុំឱ្យមានអំពើពុករលួយនៅក្នុងពន្ធនាគារហ្នឹង […] បើសិនជាមានជំងឺកូវីដតែម្នាក់ហ្នឹង វានឹងពិបាកហើយ»។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត និយាយថា ស្ថានភាពចង្អៀតណែនក្នុងពន្ធនាគារនេះជាហានិភ័យខ្ពស់សម្រាប់អ្នកជាប់ឃុំ ប្រសិនបើមិនអនុវត្តវិធានការនេះឱ្យមានប្រសិទ្ធភាពទេនោះ។
លោកថា៖ «អ្វីដែលសំខាន់យើងឃើញថា ភាពអយុត្តិធម៌មួយចំពោះអ្នកជាប់ឃុំទូទៅ យើងឃើញថា ឧកញ៉ាមួយចំនួន ឬក៏អ្នកមានទ្រព្យ ឬមានអំណាចមួយចំនួន ដែលជាប់[ឃុំ]ហ្នឹង គឺច្រើនតែយកមន្ទីរពេទ្យធ្វើជាពន្ធនាគារ»។
អង្គការលើកលែងទោសអន្តរជាតិ (Amnesty International) អង្គការឃ្លាំមើលសិទ្ធិមនុស្ស (Human Rights Watch) និង អង្គការលីកាដូ អំឡុងខែធ្នូ ឆ្នាំ២០២០ បានចេញសេចក្ដីថ្លែងការណ៍រួមបង្ហាញកង្វល់ពីបញ្ហានេះ ដោយលើកឡើងថា ប្រសិនបើមានការចម្លងវីរុសកូវីដ-១៩ នៅក្នុងពន្ធនាគារដែលមានភាពចង្អៀតណែនខ្លាំង និងខ្វះសម្ភារបរិក្ខារនេះ គឺអាចនឹងធ្វើឱ្យមានគ្រោះថ្នាក់ធ្ងន់ធ្ងរ ។
អង្គការទាំងនោះគូសបញ្ជាក់ថា នៅតាមពន្ធនាគារមួយចំនួន អ្នកជាប់ឃុំម្នាក់អាចមានទីកន្លែងផ្ទាល់ខ្លួនតិចជាង១ម៉ែត្រការ៉េប៉ុណ្ណោះក្នុងបន្ទប់ឃុំឃាំងមួយ ហើយការផ្គត់ផ្គង់ទឹកស្អាតគឺមានកម្រិតណាស់ ដែលស្ថានភាពនេះធ្វើឱ្យការអនុវត្តវិធានការសុវត្ថិភាព ដូចជា ការរក្សាគម្លាតសង្គម និងការលាងសម្អាតដៃឱ្យបានញឹកញាប់ ស្ទើរតែមិនអាចធ្វើទៅបានឡើយ ។
តែយ៉ាងណា ព្រឹត្តិការណ៍សហគមន៍២០កុម្ភៈ ដែលបានអូសបន្លាយជាង១ខែមកនេះ មិនមានករណីរកឃើញអ្នកជាប់ឃុំណាម្នាក់ឆ្លងជំងឺកូវីដ-១៩នៅឡើយទេ បើទោះព្រឹត្តិការណ៍នេះបានសម្លាប់មនុស្ស៥នាក់ និងចម្លងដល់មនុស្ស១ ២៩៣នាក់នៅក្នុងសហគមន៍ក៏ដោយ៕