រដ្ឋាភិបាលណែនាំទៅគ្រប់វត្តអារាមនៅទូទាំងប្រទេស វាយគង ជួង រគាំង ទូងស្គរ មួយថ្ងៃ៥ដង ដើម្បីជាសាររំឭកប្រជាពលរដ្ឋឱ្យចូលរួមប្រយុទ្ធប្រឆាំងនិងទប់ស្កាត់ការឆ្លងរីករាលដាលជំងឺកូវីដ-១៩ នៅក្នុងសហគមន៍ រហូតចប់ព្រឹត្តិការណ៍សហគមន៍២០កុម្ភៈ។
ការណែនាំនេះបានធ្វើឡើងតាមរយៈសារាចររបស់ក្រសួងធម្មការ និងសាសនា កាលពីថ្ងៃទី២៣ ខែមីនាម្សិលមិញ។
សារាចរនោះបានលើកឡើងថា លោកនាយករដ្ឋមន្ត្រី ហ៊ុន សែន បានផ្តល់អនុសាសន៍ដល់ក្រសួងធម្មការ និងសាសនា ជួយប្រាប់ទៅប្រធានមន្ទីរធម្មការ និងសាសនា រាជធានី-ខេត្ត សហការជាមួយមេគណ ព្រះគ្រូអនុគណ ធ្វើការណែនាំទៅគ្រប់វត្តអារាមទាំងអស់ទូទាំងប្រទេស វាយគង ជួង រគាំង ទូងស្គរ ចំនួន៥ដងក្នុងមួយថ្ងៃព្រមៗគ្នា ដើម្បីជាសញ្ញាផ្សព្វផ្សាយព័ត៌មានដល់ប្រជាពលរដ្ឋ ពុទ្ធបរិស័ទ ឱ្យមានការប្រុងប្រយ័ត្ន ដោយអនុវត្តវិធានការ «៣ការពារ ៣កុំ» របស់រដ្ឋាភិបាល និងតាមការណែនាំរបស់ក្រសួងសុខាភិបាល រហូតចប់ព្រឹត្តិការណ៍២០កុម្ភៈ។
សារាចរដដែលបញ្ជាក់ថា ពេលវេលាដែលត្រូវអនុវត្តចំនួន៥ដងក្នុងមួយថ្ងៃនោះ រួមមាន លើកទី១ ចាប់ផ្តើមនៅម៉ោង៥ព្រឹក, លើកទី២ ម៉ោង១១ព្រឹក, លើកទី៣ ម៉ោង២រសៀល, លើកទី៤ ម៉ោង៥ល្ងាច និងលើកទី៥ ម៉ោង៨យប់។
គិតចាប់តាំងពីថ្ងៃទី២០ ខែកុម្ភៈ ដល់ថ្ងៃទី២៤ ខែមីនា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ សរុប១ ២៩៣នាក់ ក្នុងនោះ អ្នកស្លាប់ចំនួន៥នាក់ ខណៈអ្នកឆ្លងទូទាំងប្រទេសសរុបបានកើនដល់១ ៨១៧នាក់ ក្នុងនោះ ព្យាបាលជាសះស្បើយ១ ០៣៣នាក់ និងកំពុងសម្រាកព្យាបាល៧៧៧នាក់៕
