អាជ្ញាធរខេត្តត្បូងឃ្មុំ បានប្រកាសពីការរកឃើញករណីវិជ្ជមានកូវីដ-១៩ ជាលើកដំបូងលើមន្រ្តីនគរបាលខេត្តម្នាក់ បន្ទាប់ពីអ្នកជំងឺលេចចេញរោគសញ្ញា ហើយទៅស្វែងរកការព្យាបាលនៅគ្លីនិកឯកជន២កន្លែង មុននឹងយកសំណាកទៅធ្វើតេស្តរកវីរុសកូវីដ-១៩នេះ។
ក្នុងសេចក្តីប្រកាសព័ត៌មានរបស់រដ្ឋបាលខេត្តត្បូងឃ្មុំ នៅថ្ងៃម្សិលមិញ ឱ្យដឹងថា មុនរកឃើញថាវិជ្ជមានវីរុសកូវីដ-១៩ អ្នកជំងឺវ័យ៤២ឆ្នាំរូបនោះ បានទៅធ្វើបុណ្យនៅភូមិកំណើត ក្នុងឃុំថ្មពូន ស្រុកកញ្ច្រៀង ខេត្តព្រៃវែង ថ្ងៃទី១២ ខែមីនា បន្ទាប់មក លោកទៅសម្រាកព្យាបាលនៅគ្លីនិកមួយក្នុងស្រុកមេមត់ និងទៅថតសួតនៅមន្ទីរពេទ្យឯកជនក្នុងក្រុងសួង នៅថ្ងៃទី២១ ខែមីនា។
អ្នកនាំពាក្យរដ្ឋបាលខេត្តត្បូងឃ្មុំ លោក កេង ប៉ុនណា ប្រាប់ VOD នៅថ្ងៃពុធនេះថា អាជ្ញាធរបានស្រាវជ្រាវរកឃើញអ្នកប៉ះផ្ទាល់ជាមួយអ្នកជំងឺចំនួន១៤នាក់ និងអ្នកប៉ះប្រយោល១៥នាក់ បានបិទទីតាំងគ្លីនិកដែលអ្នកជំងឺបានចូលព្យាបាលជាបណ្តោះអាសន្ន។
មន្រ្តីរដ្ឋបាលខេត្តរូបនេះបន្ថែមថា អាជ្ញាធរមិនទាន់ស្រាវជ្រាវដឹងពីប្រភពចម្លងនៃមេរោគនៅឡើយ។ យ៉ាងណា លោកដាក់ការសង្ស័យថា អ្នកជំងឺអាចនឹងប៉ះជាមួយមេរោគអំឡុងពេលទៅធ្វើបុណ្យឱ្យម្តាយនៅស្រុកកំណើតក្នុងខេត្តព្រៃវែង កាលពីជាង១០ថ្ងៃមុន។
លោក កេង ប៊ុនណា មានប្រសាសន៍ថា៖ «មុននឹងគាត់ចេញជារោគសញ្ញាហ្នឹង គាត់បានទៅចូលរួមបុណ្យខួប១០០ថ្ងៃម្តាយគាត់នៅខាងខេត្តព្រៃវែង។ ក្រែងលោគាត់ឆ្លងពីខាងណោះមកមិនដឹង ឬក៏គាត់ឆ្លងមកពីណាទៀតក៏មិនដឹង។ ប៉ុន្តែបើតាមរបាយការណ៍ប្រធានអង្គភាពរាយការណ៍មកខេត្ត ប្រហែលជា[ឆ្លង]ខ្ទង់ថ្ងៃ១២ហ្នឹង ប្រហែលជាមកពីខាងព្រៃវែងមកហើយមើលទៅ»។
ប្រភពដដែលបន្ថែមថា អាជ្ញាធរកំពុងបង្កើនការប្រុងប្រយ័ត្ន ឱ្យមន្រ្តីតាមស្ថាប័នផ្សេងៗធ្វើការពីផ្ទះបើអាច និងចុះអប់រំពលរដ្ឋមូលដ្ឋានឱ្យពាក់ម៉ាស់ពេលនៅមានគ្នាចាប់ពី២នាក់ រក្សាគម្លាតសុវត្ថិភាព និងចៀសវាងការជួបជុំផ្សេងៗ។ យ៉ាងណា លោកថា ស្ថានការណ៍នៃការចម្លងក្នុងខេត្ត គឺអាចគ្រប់គ្រងបាននៅឡើយ។
លោកថា៖ «ព្រោះយើងបានដឹងភ្លាមដែរ ហើយអ្នកដែលពាក់ព័ន្ធហ្នឹង ក៏យើងបានប្រមូលគាត់យកមកដាក់ធ្វើចត្តាឡីស័ក។ ហើយអ្នកដែលប៉ះប្រយោលហ្នឹង ក៏យើងបានណែនាំគាត់ដែរ»។
ដោយឡែក មេឃុំថ្មពូន ស្រុកកញ្ច្រៀង ខេត្តព្រៃវែង លោក ឃិន ចាប ឱ្យដឹងថា អាជ្ញាធរបានរកឃើញមនុស្ស៥នាក់ និងអ្នកប៉ះប្រយោលក្នុងពិធីបុណ្យ១៧នាក់។ លោកថា អ្នកទាំង៥ដែលជាក្រុមគ្រួសាររបស់អ្នកជំងឺ ត្រូវបានយកសំណាកទៅធ្វើតេស្តនិងដាក់ឱ្យធ្វើចត្តាឡីស័ក និងបានណែនាំឱ្យអ្នកប៉ះប្រយោលទៅធ្វើចត្តាឡីស័កនៅផ្ទះដោយខ្លួនឯង។
អាជ្ញាធរឃុំរូបនេះលើកឡើងថា មន្រ្តីនគរបាលរូបនោះអាចនឹងឆ្លងជំងឺពីកន្លែងផ្សេង បន្ទាប់ពីត្រឡប់ទៅវិញ គឺមិនមែនឆ្លងនៅក្នុងអំឡុងធ្វើពិធីបុណ្យនោះទេ។
លោក ឃិន ចាប និយាយថា៖ «ការពិតទៅ ខ្ញុំក៏មិនដឹងដែរ បើអ្នកមកធ្វើបុណ្យទានហ្នឹងគឺសុទ្ធតែយាយៗតាៗនៅក្នុងភូមិហ្នឹងទេ។ អត់មានក្មេងមកពីឆ្ងាយៗទេ អត់មានទេ។ យើងពិនិត្យជារួមទៅឃើញថាអញ្ចឹង។ តាមពិត គាត់មន្រ្តីនគរបាល គាត់ដើរចុះធ្វើការចុះឡើង យើងមិនដឹងជាប្រភពហ្នឹងចម្លងមកពីណាមក ក៏យើងអត់ដឹងដែរ»។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន លើកឡើងថា ករណីឆ្លងដែលរកឃើញថ្មីៗនេះ ពិបាកនឹងរកប្រភពចម្លងឃើញណាស់ ដោយសារការចម្លងបានកើតឡើងតៗគ្នាចូលក្នុងសហគមន៍ តាមរយៈការធ្វើដំណើររបស់អ្នកមានផ្ទុកវីរុស ហើយមួយទៀតគឺអាស្រ័យទៅលើភាពស្មោះត្រង់របស់អ្នកជំងឺក្នុងការផ្តល់ព័ត៌មានពីទីកន្លែងនិងអ្នកពាក់ព័ន្ធ។
លោកស្រីមានប្រសាសន៍ថា៖ «ដូចមីងនិយាយថា មនុស្សកុំឱ្យចល័ត កាលណាចល័ត វាប៉ះហើយ ហើយភាគច្រើនអ្នកខ្លះគេមិនស្តាប់ទេ គេត្រូវតែចល័ត។ ត្រូវតែចល័ត អាហ្នឹងទទួលយកខ្លួនឯងទៅ មីងពិបាកដែរ អាហ្នឹងបើយើងមិនគិតខ្លួនយើង មិនដឹងទៅឱ្យពីណាគិតឱ្យ»។
លោកស្រីបន្ថែមថា ដើម្បីបញ្ចៀសការចម្លងតគ្នាទៅក្នុងក្រុមគ្រួសារ សហគមន៍ និងរីករាលដាលដល់សហគមន៍តាមខេត្តក្រុងផ្សេងៗទៀត គ្រប់គ្នាត្រូវតែអនុវត្តវិធានការពាក់ម៉ាស់មុខឱ្យបានត្រឹមត្រូវ រក្សាគម្លាតសុវត្ថិភាព ឧស្សាហ៍លាងសម្អាតដៃនឹងសាប៊ូឬជែល ចៀសវាងការជួបជុំ និងកុំចេញក្រៅផ្ទះបើគ្មានការចាំបាច់ ជាដើម។
តាមរបាយការណ៍ពីក្រសួងសុខាភិបាល ការរកឃើញថ្មីនេះបានធ្វើឱ្យព្រឹត្តិការណ៍សហគមន៍២០កុម្ភៈ រីករាលដាលឡើងដល់១៣ខេត្ត-រាជធានី ក្នុងរយៈពេលជាង៤សប្តាហ៍ ជាមួយករណីឆ្លងសរុប១ ២៩៣នាក់ ក្នុងនោះករណីស្លាប់មាន៥នាក់ និងកំពុងសម្រាកព្យាបាលមាន៧៦១នាក់៕
