ក្រសួងសុខាភិបាលរកឃើញអ្នកឆ្លងជំងឺកូវីដ-១៩ ចំនួន២៩នាក់បន្ថែមទៀត ក្នុងនោះ អ្នកឆ្លងក្នុងព្រឹត្តិការណ៍សហគមន៍២០កុម្ភៈចំនួន២៧នាក់ និង២នាក់ទៀតជាអ្នកដំណើរមកពីក្រៅប្រទេស។
សេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី២៤ ខែមីនា ឆ្នាំ២០២១ ឱ្យដឹងថា អ្នកជំងឺកូវីដ-១៩ ទាំង២៧នាក់ ត្រូវបានក្រសួងរកឃើញនៅរាជធានីភ្នំពេញ ខេត្តកណ្ដាល ខេត្តកោះកុង និងខេត្តត្បូងឃ្មុំ។
ក្រសួងបន្តថា ចំណែកអ្នកជំងឺកូវីដ-១៩ ចំនួន២នាក់ទៀត ក្នុងនោះ ម្នាក់ជាអ្នកដំណើរមកពីប្រទេសឥណ្ឌូនេស៊ី និងម្នាក់ទៀតជាអ្នកដំណើរមកពីប្រទេសហ្វីលីពីន ដែលអ្នកទាំងពីរបានមកដល់កម្ពុជា នៅថ្ងៃទី២២ ខែមីនា ឆ្នាំ២០២១។
ដោយឡែក អ្នកជាសះស្បើយចំនួន៣៤នាក់វិញ ក្រសួងថា មានម្នាក់ជាអ្នកដំណើរមកពីក្រៅប្រទេស និងចំនួន៣៣នាក់ទៀតជាអ្នកជំងឺពាក់ព័ន្ធនឹងព្រឹត្តិការណ៍សហគមន៍២០កុម្ភៈ។
បើតាមរបាយការណ៍ក្រសួងសុខាភិបាល ឱ្យដឹងថា គិតត្រឹមថ្ងៃទី២៤ ខែមីនា ឆ្នាំ២០២១នេះ កម្ពុជារកឃើញអ្នកឆ្លងកូវីដ-១៩ សរុប១ ៨១៧នាក់ ក្នុងនោះ អ្នកជាសះស្បើយ១ ០៣៣នាក់ អ្នកកំពុងសម្រាកព្យាបាលជំងឺចំនួន៧៧៧នាក់។
ក្នុងចំណោមអ្នកជំងឺ១ ៨១៧នាក់ មានអ្នកជំងឺពាក់ព័ន្ធនឹងព្រឹត្តិការណ៍សហគមន៍២០កុម្ភៈ ចំនួន១ ២៩៣នាក់ និងមានស្លាប់ដោយសារជំងឺកូវីដ-១៩ ចំនួន៥នាក់ និង២នាក់ទៀតស្លាប់ដោយសារការរើថ្នាំញៀនធ្ងន់ធ្ងរ និងស្ទះសរសៃឈាមបេះដូង ក្នុងអំឡុងពេលកំពុងព្យាបាលជំងឺកូវីដ-១៩៕