ក្រសួងសុខាភិបាលរកឃើញអ្នកឆ្លងជំងឺកូវីដ-១៩ថ្មី ចំនួន៣៥នាក់បន្ថែមទៀត ក្នុងនោះមានអ្នកឆ្លងក្នុងព្រឹត្តិការណ៍២០កុម្ភៈ ចំនួន៣៣នាក់ និងអ្នកធ្វើដំណើរមកពីក្រៅប្រទេស២នាក់ ខណៈមានអ្នកជាសះស្បើយ៣២នាក់។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចុះថ្ងៃទី២៣ ខែមីនា ឆ្នាំ២០២១ ឱ្យដឹងថា អ្នកជំងឺកូវីដ-១៩ ចំនួន៣៣នាក់ដែលឆ្លងក្នុងព្រឹត្តិការណ៍សហគមន៍២០កុម្ភៈ ត្រូវបានរកឃើញនៅរាជធានីភ្នំពេញ ខេត្តកណ្ដាល ព្រះសីហនុ និងសៀមរាប។
ចំណែកអ្នកឆ្លងជំងឺនេះ២នាក់ទៀត ក្រសួងថា ជាបុរសជនជាតិឥណ្ឌូនេស៊ី ធ្វើអ្នកដំណើរមកពីប្រទេសឥណ្ឌូនេស៊ី មកដល់កម្ពុជា កាលពីថ្ងៃទី២១ ខែមីនា ឆ្នាំ២០២១។
ក្រសួងសុខាភិបាលបានបន្តថា កាលពីថ្ងៃម្សិលមិញ ក៏មានអ្នកជំងឺកូវីដ-១៩ ចំនួន៣២នាក់ដែរ ដែលជាអ្នកឆ្លងក្នុងព្រឹត្តិការណ៍សហគមន៍២០កុម្ភៈ និងជនបរទេសដែលធ្វើដំណើរមកពីប្រទេសលីប៊ី។
គិតចាប់តាំងពីថ្ងៃទី២០ ខែកុម្ភៈ ដល់ថ្ងៃទី២៣ ខែមីនា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ សរុប១ ២៦៦នាក់ ក្នុងនោះ អ្នកស្លាប់ចំនួន៤នាក់ ខណៈអ្នកឆ្លងទូទាំងប្រទេសសរុបបានកើនដល់១ ៧៨៨នាក់ ក្នុងនោះ ព្យាបាលជាសះស្បើយ៩៩៩នាក់ និងកំពុងសម្រាកព្យាបាល៧៨៣នាក់៕