ស្ត្រីវ័យចំណាស់ម្នាក់ទៀតបានស្លាប់ដោយសារជំងឺកូវីដ-១៩ វាយលុកសួតទាំងសងខាងធ្ងន់ធ្ងរ ដែលការស្លាប់នេះបានធ្វើឱ្យចំនួនអ្នកស្លាប់ដោយសារជំងឺកូវីដ-១៩ កើនដល់៥នាក់។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី២៣ ខែមីនា ឆ្នាំ ២០២១ ឱ្យដឹងថា ស្រ្តីអាយុ៦២ឆ្នាំ ដែលស្លាប់ដោយសារកូវីដ-១៩ រស់នៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ក្រសួងបន្តថា ស្ត្រីរូបនេះបានស្លាប់នៅមន្ទីរពេទ្យមិត្តភាពខ្មែរ-សូវៀត នៅវេលាម៉ោង៥និង៤០នាទីព្រឹក ថ្ងៃទី២៣ ខែមីនា ឆ្នាំ២០២១ ខណៈកំពុងសម្រាកព្យាបាលជំងឺនេះ ក្រោយពីបានរកឃើញមានផ្ទុកជំងឺកូវីដ-១៩ កាលពីថ្ងៃទី២០ ខែមីនា ឆ្នាំ២០២១។
នេះគឺជាករណីស្លាប់ទី៥ហើយ ក្នុងរយៈពេលជាង១ខែនៃការឆ្លងរាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈនៅកម្ពុជា ខណៈអ្នកឆ្លងក្នុងព្រឹត្តិការណ៍នេះបានកើនដល់១ ២៦៦នាក់។
រដ្ឋាលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់វីអូឌីនៅថ្ងៃនេះថា ក្រៅពីការស្លាប់របស់ស្ត្រីរូបនេះ បច្ចុប្បន្ន ក្រុមគ្រូពេទ្យកំពុងធ្វើការជួយសង្គ្រោះអ្នកជំងឺកូវីដ-១៩ ចំនួន៣នាក់ទៀតដែលមានស្ថានភាពជំងឺធ្ងន់ធ្ងរផងដែរ។
បើតាមទំព័រហ្វេសប៊ុករបស់ក្រុមសិល្បករកម្ពុជា ស្ត្រីវ័យ៦២ឆ្នាំដែលស្លាប់ដោយសារជំងឺកូវីដ១៩រូបនេះ ជាម្តាយរបស់សិល្បករផ្នែកកំប្លែង កញ្ញា ស្រីពីន៕
