ក្រសួងសុខាភិបាល ឱ្យដឹងថា បុរសវ័យចំណាស់ដែលជាគ្រូពេទ្យជំនាញជំងឺកុមារម្នាក់ បានស្លាប់ដោយសារជំងឺកូវីដ-១៩ ដែលធ្វើឱ្យចំនួនអ្នកស្លាប់ដោយសារជំងឺនេះបានកើនដល់៤នាក់។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃនេះ ឱ្យដឹងថា បុរសដែលស្លាប់ដោយសារជំងឺកូវីដ-១៩នោះ មានវ័យ៧៥ឆ្នាំ ជាវេជ្ជបណ្ឌិតចូលនិវត្តន៍ និងជាប្រធានគណៈកម្មការវេជ្ជសាស្ត្រ និងវិទ្យាសាស្ត្រកីឡា នៃគណៈកម្មការជាតិអូឡាំពិកកម្ពុជា រស់នៅភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
ក្រសួងបន្តថា បុរសរូបនោះបានស្លាប់នៅមន្ទីរពេទ្យមិត្តភាពខ្មែរ-សូវៀត នៅម៉ោង៨ព្រឹក នៅថ្ងៃទី២២ ខែមីនា ឆ្នាំ២០២១នេះ ដោយមានអាការខ្សោយសួត និងរលាកសួតធ្ងន់ធ្ងរខ្លាំង ដោយសារជំងឺកូវីដ-១៩។
ក្រសួងបញ្ជាក់ថា មុនពេលស្លាប់ បុរសវ័យចំណាស់រូបនេះបានចូលសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី២១ ខែមីនា ឆ្នាំ២០២១ ដោយក្នុងសភាពហត់ខ្លាំង។ ក្រោយពីមានអាការបែបនេះ ក្រុមគ្រូពេទ្យបានពិនិត្យ ដោយរកឃើញថា បុរសរូបនេះមានសភាពធ្ងន់ធ្ងរខ្លាំង៣ទៅ៤ថ្ងៃមុនចូលសម្រាកមន្ទីរពេទ្យម៉្លេះ ស្របពេលដែលគាត់ក៏មានជំងឺលើសឈាមផងដែរ។
នេះគឺជាករណីស្លាប់ទី៤ហើយក្នុងរយៈពេលជាង១ខែនៃការឆ្លងរាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈនៅកម្ពុជា ខណៈអ្នកឆ្លងក្នុងព្រឹត្តិការណ៍នេះបានកើនដល់ចំនួន១ ២៣៣នាក់។
លោកនាយករដ្ឋមន្ត្រី ហ៊ុន សែន ថ្លែងតាមរយៈសារជាសំឡេងនៅថ្ងៃទី១៩ ខែមីនា ឆ្នាំ២០២១ ថា ព្រឹត្តិការណ៍សហគមន៍២០កុម្ភៈ នៅមិនទាន់មានភាពធូរស្រាលនៅឡើយ បើទោះបីជារដ្ឋាភិបាលគ្រប់គ្រងស្ថានការណ៍នៅខេត្តព្រះសីហនុបាន ប៉ុន្តែសម្រាប់រាជធានីភ្នំពេញ និងខេត្តកណ្ដាល នៅតែបន្តកើតមាននៅឡើយ។
ក្រៅពីរាជធានីភ្នំពេញ និងខេត្តកណ្ដាល លោកបញ្ជាក់ថា នៅក្នុងខេត្តព្រៃវែង កោះកុង ក៏ស្ថិតនៅក្នុងស្ថានភាពត្រូវទប់ស្កាត់ផងដែរ៕