យុទ្ធនាការចាក់វ៉ាក់សាំង អាស្ត្រាហ្សេណិកា (Astra Zeneca) ជូនដល់ប្រជាពលរដ្ឋវ័យចាប់ពី៦០ឆ្នាំឡើង នៅរាជធានីភ្នំពេញ នឹងចាប់ផ្តើមធ្វើនៅថ្ងៃអង្គារស្អែកនេះ នៅមន្ទីរពេទ្យនិងមណ្ឌលសុខភាពចំនួន១៤ទីតាំង។
យោងតាមសេចក្តីជូនព័ត៌មាន ចុះថ្ងៃទី២២ ខែមីនានេះ របស់គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស ឱ្យដឹងថា យុទ្ធនាការចាក់វ៉ាក់សាំងកូវីដ-១៩ ក្នុងកម្រិតមនុស្សចំនួន៥៥ ៧០០នាក់ដែលមានអាយុចាប់ពី៦០ឆ្នាំឡើង នៅរាជធានីភ្នំពេញ នឹងចាប់ផ្តើមពីថ្ងៃទី២៣ ខែមីនាស្អែកនេះ នៅទីតាំងមន្ទីរពេទ្យនិងមណ្ឌលសុខភាពចំនួន១៤ទីតាំង ក្នុងខណ្ឌទាំង១៤។
សេចក្តីជូនព័ត៌មានបញ្ជាក់ថា៖ «ក្រុមមនុស្សវ័យចាស់ គឺជាក្រុមងាយរងគ្រោះខ្ពស់ បើមានការចម្លងជំងឺកូវីដ-១៩ វាងាយវិវត្តទៅជាធ្ងន់ធ្ងរ និងបណ្ដាលឱ្យមានអត្រាស្លាប់ខ្ពស់។ ការប្រើប្រាស់វ៉ាក់សាំងកូវីដ-១៩ គឺជាឧបករណ៍ដ៏សំខាន់មួយនៅក្នុងការរួមចំណែកបង្ការភាពធ្ងន់ធ្ងរពីការវាយលុកនៃជំងឺដ៏កាចសាហាវនេះ»។
បើតាមសេចក្តីជូនព័ត៌មាន បើទោះជាបុគ្គលម្នាក់ៗបានទទួលវ៉ាក់សាំងហើយក្តី ក៏ត្រូវតែបន្តចូលរួមអនុវត្តវិធានសុខាភិបាល និងការពារហានិភ័យនៃការចម្លងជំងឺកូវីដ-១៩ ដោយអនុវត្តវិធានការ ៣ការពារ (ពាក់ម៉ាក់ លាងដៃញឹកញាប់ និងរក្សាគម្លាតសុវត្ថិភាព) និង៣កុំ (កុំទៅកន្លែងមានមនុស្សកុះករច្រើន កុំទៅកន្លែងបិទជិតគ្មានខ្យល់ចេញចូល កុំប៉ះពាល់គ្នា)៕
