មន្ត្រីជាន់ខ្ពស់ក្រសួងសុខាភិបាល ឱ្យដឹងថា យុទ្ធនាការ១៥ថ្ងៃ ដើម្បីចាក់វ៉ាក់សាំងប្រឆាំងនឹងជំងឺកូវីដ-១៩ ជូនដល់មនុស្សចាស់អាយុចាប់ពី៦០ឆ្នាំឡើង នៅរាជធានីភ្នំពេញ នឹងត្រូវធ្វើឡើងនៅក្នុងសប្តាហ៍នេះ ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ក្នុងសហគមន៍។
អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ច ដែលទទួសខុសត្រូវលើការចាក់វ៉ាក់សាំង លោកស្រីវេជ្ជបណ្ឌិត ឱ វណ្ណឌីន ប្រាប់វីអូឌីនៅថ្ងៃចន្ទនេះថា យុទ្ធនាការនេះអាចចាប់ផ្តើមបានយ៉ាងយូរត្រឹម២ថ្ងៃទៀត។
លោកស្រីថា៖ «ថ្ងៃនេះយើងកំពុងតែធ្វើការបណ្តុះបណ្តាល [ពេល]បណ្តុះបណ្តាលចប់ហើយ ស្អែកយើងនឹងរៀបចំកន្លែងចាក់ ហើយអាចស្អែកនិងខានស្អែក យើងនឹងចាប់ផ្តើម»។
លោកស្រីបន្តថា គ្រូពេទ្យដែលត្រូវចុះបំពេញភារកិច្ចក្នុងយុទ្ធនាការនេះបានរៀបចំរួចហើយ និងថាយុទ្ធនាការនេះនឹងត្រូវធ្វើឡើងពេញមួយសប្តាហ៍ ដោយមិនមានការឈប់សម្រាកនៅថ្ងៃសៅរ៍និងថ្ងៃអាទិត្យទេ។
កាលពីថ្ងៃសុក្រសប្តាហ៍មុន លោកនាយករដ្ឋមន្ត្រី ហ៊ុន សែន បានប្រាប់ទៅក្រសួងសុខាភិបាល និងសាលារាជធានីភ្នំពេញ ឱ្យរៀបចំធ្វើយុទ្ធនាការ១៥ថ្ងៃ ចាក់វ៉ាក់សាំងប្រភេទ អាស្ត្រាហ្សេណិកា (Astra Zeneca) ជូនមនុស្សចាស់ជាង៥ម៉ឺននាក់ ដើម្បីការពារជំងឺកូវីដ-១៩។
លោកក៏បានក្រើនរំឭកផងដែរថា ដោយសារចំនួនវ៉ាក់សាំងប្រភេទនេះមានកំណត់ យុទ្ធនាការនេះ អាជ្ញាធរត្រូវផ្តល់អាទិភាពឬភាពចាំបាច់ដល់មនុស្សចាស់ដែលរស់នៅតំបន់ក្រីក្រ និងមិនត្រូវរើសអើងនិន្នាការនយោបាយឡើយ ។
លោកថា៖ «ព្រោះវ៉ាក់សាំងយើងក៏មិនគ្រប់សម្រាប់មនុស្សវ័យ៦០ឆ្នាំឡើង ដូច្នេះខ្ញុំសុំស្នើឱ្យផ្តល់អាទិភាពទៅតាមសម្រាប់ទីកន្លងតំបន់ក្រីក្រ ប្រជាជនក្រីក្រដែលត្រូវទទួលបានវ៉ាក់សាំង»។
រដ្ឋបាលរាជធានីភ្នំពេញ នៅថ្ងៃនេះ ក៏បានចង្អុលបង្ហាញពីទីតាំងសម្រាប់ចាក់វ៉ាក់សាំងដល់មនុស្សវ័យចំណាស់ផងដែរ នោះគឺនៅតាមមណ្ឌលសុខភាពប្រចាំខណ្ឌទាំង១៤ ក្នុងរាជធានីភ្នំពេញ។
បើតាមរដ្ឋបាលរាជធានីភ្នំពេញ មនុស្សប្រមាណជាង៣ពាន់នាក់ (៣ ៣៨០នាក់) ក្នុងមួយថ្ងៃ ត្រូវបានផ្តល់អាទិភាពសម្រាប់ការទទួលបានវ៉ាក់សាំងប្រឆាំងកូវីដ-១៩ នៅមណ្ឌលសុខភាពក្នុងខណ្ឌទាំង១៤នោះ។
អភិបាលខណ្ឌដង្កោ លោកស្រី គឹម ញឹប និយាយថា លោកស្រីបានជូនដំណឹងទៅប្រជាពលរដ្ឋដែលត្រូវទទួលបានវ៉ាក់សាំងនេះរួចរាល់ហើយ តាមការណែនាំរបស់រដ្ឋបាលរាជធានីភ្នំពេញ។
លោកស្រីថា៖ «យុទ្ធនាការ១៥ថ្ងៃណា! អ៊ីចឹងខ្ញុំធ្វើជូនគាត់១៥ថ្ងៃ ប៉ុន្តែបើគាត់មកអត់អស់ក្នុងរយៈពេល១៥ថ្ងៃ ក៏យើងនៅបន្តចាក់ជូនពួកគាត់ដែរ។ យើងមិនបោះបង់ពួកគាត់ទេ»។
ដូចគ្នានេះដែរ អភិបាលខណ្ឌ៧មករា លោក លីម សុភា អះអាងដោយខ្លីថា អាជ្ញាធរខណ្ឌបានជូនដំណឹងដល់ពលរដ្ឋវ័យចំណាស់រួចហើយ។
តំណាងសហគមន៍នៅបុរីកីឡា សង្កាត់វាលវង់ ខណ្ឌ៧មករា និងជាតំណាងអ្នកតវ៉ាដីធ្លី អ្នកស្រី ស ស៊ន អាយុ៦២ឆ្នាំ បាននិយាយថា គាត់និងអ្នកភូមិមួយចំនួនទៀតនៅសហគមន៍ក្រីក្រនេះ ដែលមានអាយុលើស៦០ឆ្នាំ មិនទាន់ទទួលបានការជូនដំណឹងឱ្យទៅទទួលវ៉ាក់សាំងនេះនៅឡើយទេ គិតត្រឹមថ្ងៃចន្ទនេះ។
អ្នកស្រីថា៖ «អត់រលីង! ស្ងាត់ទាំងអស់គ្នាហ្នឹង គ្មាននរណាប្រាប់ស្អីទេ […] អ្នកមានអាយុ៦០ជាង ច្រើនណាស់»។
ប្រធានផ្នែកសិទ្ធិមនុស្សនៅសមាគមអាដហុក លោក នី សុខា និយាយថា ការផ្តល់សេវាគាំពារសង្គម ជាកាតព្វកិច្ចរបស់រដ្ឋាភិបាល មានចែងក្នុងរដ្ឋធម្មនុញ្ញកម្ពុជា។
លោកគូសបញ្ជាក់ថា បើសិនជាអនុសាសន៍របស់ថ្នាក់ដឹកនាំ ជំរុញដល់ការគាំពារសង្គមនិងសុខភាពសាធារណៈ ប៉ុន្តែបែរជាមន្ត្រីក្រោមឱវាទអនុវត្តឱ្យមិនបានត្រឹមត្រូវឬរើសអើងក្រុមណាមួយ វានឹងប៉ះពាល់ដល់មុខមាត់ថ្នាក់ដឹកនាំ ដែលអាជ្ញាធរគួរពិនិត្យឡើងវិញ។
លោកថា៖ «ខ្ញុំគិតថា ការដែលមិនបានអនុវត្តទៅតាមអនុសាសន៍មួយដែលយើងគិតថាត្រឹមត្រូវ ហើយអាជ្ញាធរនៅតាមមូលដ្ឋានឬក៏មន្ត្រីនៅក្រោមឱវាទ អនុវត្តមិនបានត្រឹមត្រូវ […] អានេះវាជារឿងមួយធ្វើឱ្យប៉ះពាល់ដល់តម្លៃរបស់ថ្នាក់ដឹកនាំ»។
កម្ពុជាបានធ្វើយុទ្ធនាការចាក់វ៉ាក់សាំងប្រឆាំងជំងឺកូវីដ-១៩ ចាប់ពីថ្ងៃទី១០ ខែកុម្ភៈ ឆ្នាំ២០២១មក ទាំងការចាក់វ៉ាក់សាំងប្រភេទ«ស៊ីណូហ្វាម»របស់ចិន និង «អាស្រ្តាហ្សេណិកា» របស់ចក្រភពអង់គ្លេស ផលិតនៅប្រទេសឥណ្ឌា។
បើតាមក្រសួងសុខាភិបាល សម្រាប់រាជធានីភ្នំពេញ យុទ្ធនាការវគ្គទី១ មានមនុស្សជាង១ម៉ឺននាក់ទទួលបានវ៉ាក់សាំងនេះ និង ៥៥ ៧០០នាក់ទៀត ត្រូវធ្វើយុទ្ធនាការចាក់បន្ថែមទៀតរយៈពេល១៥ថ្ងៃ ដែលណែនាំដោយរដ្ឋាភិបាល ដើម្បីទប់ស្កាត់ការឆ្លងរាលដាលនៃជំងឺជាសកលនេះ ពាក់ព័ន្ធនឹងព្រឹត្តិការណ៍សហគមន៍២០កុម្ភៈ។
ជាង១ខែមកនេះ ព្រឹត្តិការណ៍សហគមន៍២០កុម្ភៈ បានសម្លាប់មនុស្ស៤នាក់ និងធ្វើឱ្យអ្នកឆ្លងកើនដល់ចំនួន១ ២៣៣នាក់ ខណៈចំនួនអ្នកឆ្លងសរុបនៅកម្ពុជារយៈពេលជាង១ឆ្នាំនេះ បានកើនដល់១ ៧៥៣នាក់ ក្នុងនោះបានព្យាបាលជាសះស្បើយចំនួន៩៦៧នាក់ និងកំពុងសម្រាកព្យាបាល៧៨១នាក់៕
