ក្រសួងការងារ និងបណ្តុះបណ្តាលវិជ្ជាជីវៈ បង្កើតអនុគណៈកម្មការចំពោះកិច្ចមួយ ដើម្បីចាក់វ៉ាក់សាំងកូវីដ-១៩ ជូនកម្មករនៅតាមបណ្តារោងចក្រសហគ្រាស និងកម្មករសេដ្ឋកិច្ចក្រៅប្រព័ន្ធ ខណៈជំងឺមួយនេះកំពុងរាលដាលខ្លាំងនៅកម្ពុជា។
ក្នុងសេចក្តីសម្រេចមួយចុះថ្ងៃទី១៧ ខែមីនា ឆ្នាំ២០២១ ក្រសួងការងារ បានឱ្យដឹងថា អនុគណៈកម្មការនេះមានប្រធាន អនុប្រធាន និងសមាជិកចំនួន៦៧រូប ក្នុងនោះ លោក ហេង សួរ រដ្ឋលេខាធិការក្រសួង ជាប្រធាន។
បើតាមសេចក្តីសម្រេចរបស់ក្រសួង អនុគណៈកម្មការនេះមានភារកិច្ចសហការជាមួយគណៈកម្មករចំពោះកិច្ច ចាក់វ៉ាក់សាំងកូវីដ-១៩ នៅក្របខណ្ឌទូទាំងប្រទេស ដើម្បីសម្របសម្រួលចាក់វ៉ាក់សាំងជូនមន្ត្រីក្រសួងការងារ ថ្នាក់ដឹកនាំអង្គការវិជ្ជាជីវៈ កម្មករនិយោជិតនៅតាមរោងចក្រសហគ្រាស និងកម្មករសេដ្ឋកិច្ចក្រៅប្រព័ន្ធ ជាដើម។
អនុគណៈកម្មការរបស់ក្រសួងនេះ ក៏មានតួនាទីរៀបចំផែនការពិនិត្យវាយតម្លៃកម្រិតហានិភ័យ និងកំណត់អាទិភាពនៅក្នុងភូមិសាស្ត្ររាជធានី-ខេត្ត នៃទីតាំងរោងចក្រសហគ្រាស និងមុខសញ្ញាកម្មករនិយោជិតទាំងក្នុងនិងក្រៅប្រព័ន្ធដែលត្រូវចាក់វ៉ាក់សាំង រួមទាំងសហការជាមួយអាជ្ញាធរដែនដី និងរដ្ឋបាលរោងចក្រ ដើម្បីគ្រប់គ្រងសណ្តាប់ធ្នាប់ គម្លាតសង្គម និងការងារសន្តិសុខនៅតាមបណ្តាទីតាំងចាក់វ៉ាក់សាំងនីមួយៗ និងបំពេញភារកិច្ចផ្សេងៗទៀត។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានបញ្ជាក់បន្ថែមថា ការបង្កើតអនុគណៈកម្មការនេះធ្វើឡើង ដើម្បីត្រៀមធ្វើការជាមួយគណៈកម្មការចំពោះកិច្ច សម្រាប់ចាក់វ៉ាក់សាំងក្នុងក្របខណ្ឌទូទាំងប្រទេស។
អ្នកនាំពាក្យរូបនេះឱ្យដឹងថា នៅព្រឹកមិញនេះ ថ្នាក់ដឹកនាំក្រសួងការងារបានជួបប្រជុំជាមួយលោកស្រី ឱ វណ្ណឌីន ប្រធានគណៈកម្មការចំពោះកិច្ច និងកំពុងរង់ចាំការណែនាំរបស់គណៈកម្មការនេះ ដើម្បីធ្វើការតាមមុខសញ្ញាដែលអនុគណៈកម្មការត្រូវទទួលបន្ទុក។
លោកបន្ថែមថា៖ «ខ្ញុំសូមបញ្ជាក់ឡើងវិញថា គ្មានអនុគណៈកម្មការចំពោះកិច្ចណាមួយធ្វើការដោយឯករាជ្យបានទេ។ អនុគណៈកម្មការចំពោះកិច្ច គឺជាយន្តការសម្របសម្រួលជួយទៅដល់គណៈកម្មការចំពោះកិច្ចរបស់រដ្ឋាភិបាល។ អ៊ីចឹងយើងបង្កើតនេះ គឺដើម្បីត្រៀមទទួលយកនូវផែនការមេដែលគណៈកម្មការចំពោះកិច្ចសម្រាប់ចាក់វ៉ាក់សាំងក្នុងក្របខណ្ឌទូទាំងប្រទេសនៅពេលខាងមុខនេះ»។
កម្មការិនីម្នាក់បម្រើការងារនៅរោងចក្រមួយក្នុងខណ្ឌពោធិ៍សែនជ័យ អ្នកស្រី ប្រាក់ ហ៊ន្នី និយាយថា អ្នកស្រីពេញចិត្តចំពោះការរៀបចំឱ្យមានការចាក់វ៉ាក់សាំងជំងឺកូវីដ-១៩ ជូនកម្មករនេះ ដោយថា កម្មករមានហានិភ័យខ្ពស់ក្នុងការឆ្លងជំងឺមួយនេះ ខណៈពួកគេសព្វថ្ងៃធ្វើការនៅទីកន្លែងដែលមានស្ថានភាពចង្អៀតណែន។
អ្នកស្រីថា៖ «ខ្ញុំគិតថា មានការចាក់វ៉ាក់សាំងជូនកម្មករទាំងអស់គ្នា វាជាការល្អ ព្រោះនៅក្នុងរោងចក្រ បើមានកម្មករណាម្នាក់កើតជំងឺនេះ វាងាយឆ្លងលឿនពីម្នាក់ទៅម្នាក់ ដោយសារយើងជុំគ្នាច្រើន ធ្វើការសព្វថ្ងៃ ពួកយើងមានការបារម្ភខ្លាំងណាស់»។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ការដែលក្រសួងកាងារ បង្កើតអនុគណៈកម្មការ ដើម្បីចាក់វ៉ាក់សាំងជូនកម្មករនេះ វាជាការល្អប្រសើរមួយសម្រាប់កម្មករ។ លោកបានជំរុញឱ្យក្រសួងពន្លឿនអនុវត្តកម្មវិធីចាក់វ៉ាក់សាំងជូនកម្មករនេះឱ្យបានឆាប់។
មេសហជីពរូបនេះ ក៏ស្នើដល់ក្រសួងបញ្ចូលសមភាពក្រុមសហជីពឯករាជ្យនៅក្នុងអនុគណៈកម្មការនេះដែរ ដើម្បីបង្ហាញពីតម្លាភាពនៃដំណើរការចាក់វ៉ាក់សាំងនោះ។
លោកបន្ថែមថា៖ «ឱ្យតែវ៉ាក់សាំងហ្នឹងពិតជាធានាថាល្អ វាមានប្រសិទ្ធភាព ហើយអត់មានអីដែលសង្ស័យ វាគួរតែត្រូវបានចាក់ចំពោះអ្នកងាយរងគ្រោះទាំងអស់ហ្នឹង ជាពិសេសកម្មករធ្វើការងារនៅក្នុងភោជនីយដ្ឋាន សេវាកម្ម ហើយកម្មករកាត់ដេរដែលធ្វើការងារកន្លែងប្រជុំជន ត្រូវតែចាក់ជាបន្តបន្ទាប់។ ហើយអ្នកពាក់ព័ន្ធផ្សេងទៀត ដូចជាអ្នកលក់ដូរម្ហូបអាហារ តំណាងសហជីព តំណាងផ្សេងទៀត ក៏ត្រូវចាក់ដែរ។ បើចាក់តែកម្មករ ហើយអ្នកលក់បាយ និងលក់អ្វីផ្សេងៗនៅជិតរោងចក្រ មិនត្រូវបានចាក់នោះ វានៅតែមិនអាចទប់ស្កាត់បានដដែល»។
កាលពីពេលថ្មីៗនេះ រដ្ឋាភិបាលចេញអនុក្រឹត្យមួយបង្កើតគណៈកម្មការចំពោះកិច្ចមួយ ដើម្បីរៀបចំផែនការមេក្នុងការបង្កើនប្រសិទ្ធភាពដំណើរការចាក់វ៉ាក់សាំងប្រឆាំងកូវីដ-១៩ ដែលកំពុងឆ្លងរាលដាលខ្លាំងនៅកម្ពុជា ខណៈវ៉ាក់សាំងចំនួន១លាន៥សែនដូសទៀតនឹងមកដល់កម្ពុជានៅពេលឆាប់ៗខាងមុខនេះ។
លោកនាយករដ្ឋមន្ត្រី ហ៊ុន សែន បានថ្លែងក្នុងសារមួយដែលផ្សព្វផ្សាយតាមហ្វេសប៊ុករបស់លោកនៅថ្ងៃសុក្រនេះដែរថា ការចាក់វ៉ាក់សាំងត្រូវផ្តល់អាទិភាពដល់ពលរដ្ឋដែលមានអាយុ៦០ឆ្នាំឡើងទៅ និងតំបន់រោងចក្រនៅរាជធានីភ្នំពេញដែលងាយនឹងឆ្លង។
លោកថា៖ «ដំណើរការចាក់វ៉ាក់សាំង ត្រូវផ្តល់អាទិភាពចំពោះការចាក់ជូនប្រជាជនដែលមានអាយុ៦០ឆ្នាំឡើងទៅ នៅទីក្រុងភ្នំពេញ ដែលជាតំបន់រាតត្បាត ហើយសម្រាប់រោងចក្រ គឺងាយនឹងការឆ្លង»។
ក្រៅពីក្រសួងការងារ ក៏មានក្រសួងអប់រំ យុវជន និងកីឡា, ក្រសួងទេសចរណ៍, និង ក្រសួងរ៉ែ និងថាមពល ជាដើម ក៏បានបង្កើតអនុគណៈកម្មការចំពោះកិច្ចនេះ សម្រាប់ចាក់វ៉ាក់សាំងប្រឆាំងកូវីដ-១៩ ដល់អ្នកពាក់ព័ន្ធក្នុងក្របខណ្ឌក្រសួងទាំងនោះដែរ៕
