អាជ្ញាធរសង្កាត់ក្រាំងធ្នុង ខណ្ឌសែនសុខ រាជធានីភ្នំពេញ អះអាងថា នឹងដាក់កម្លាំងឃ្លាំមើលបន្ថែម ដើម្បីហាមឃាត់អ្នកបោះចោលសំរាមនៅតាមដងផ្លូវមួយកន្លែង បន្ទាប់ពីមានប្លាស្ទិករាយប៉ាយតាមដងផ្លូវ បើទោះបីជាអាជ្ញាធរធ្លាប់បានសម្អាតជាច្រើនលើក។
ចៅសង្កាត់ក្រាំងធ្នុង លោក សឿន សួរ បានឱ្យដឹងថា មានប្រជាពលរដ្ឋមួយចំនួននៅតែបន្តយកសំរាមបោះចោលនៅតាមដងផ្លូវសាធារណៈក្នុងភូមិត្រពាំងជើងស្រុក និងភូមិក្រាំងអង្រ្កង បើទោះបីជាអាជ្ញាធរធ្លាប់បានអប់រំណែនាំពួកគេនាពេលកន្លងមក។
លោកបន្ថែមថា ក្រុមហ៊ុនប្រមូលសំរាម ស៊ីនទ្រី ក៏បានប្រមូលសំរាមនៅទីនោះជាប្រចាំផងដែរ ប៉ុន្តែសំរាមនៅតែកើតមាន។
លោក សឿន សួរ៖ «កន្លងមក យើងបានឱ្យឡាន ស៊ីនទ្រី [ទាល់តែ]បីបួនថ្ងៃ ឡាន ស៊ីនទ្រី មកយកម្តង។ តែយើងដាក់កម្លាំងចាំមើលពេលដែលយើងយកអស់ នៅពេលយើងលែងមើលគាត់មកដដែល។ ហើយសំរាមហ្នឹងច្រើនចេញមកពីគោករការ យកមកទម្លាក់ចោលហ្នឹង ពេលគាត់ទៅផ្សារ»។
ទោះយ៉ាងណាលោកបញ្ជាក់ថា អាជ្ញាធរនឹងសម្អាតទីតាំងគំនរសំរាមនោះជាថ្មីទៀត ហើយនិងដាក់កម្លាំងឃ្លាំមើលអ្នកចោលសំរាមបន្ថែម។
លោក សឿន សួរ៖ «យើងនឹងទាក់ទងទៅឡាន ស៊ីនទ្រី ឱ្យគេសម្អាតម្តង ហើយយើងនឹងដាក់កម្លាំងយាមកាម»។
កញ្ញា មាន ស្រីនុច ជាពលរដ្ឋរស់នៅភូមិត្រពាំងជើងស្រុក បានរៀបរាប់ថា សំរាមដែលកើតមាននៅអមសងខាងផ្លូវក្នុងសង្កាត់ក្រាំងធ្នុងនេះ មានរយៈពេលប្រមាណជាងមួយឆ្នាំមកហើយ។
កញ្ញាបន្តថា កញ្ញាធ្លាប់បានប្រមូលសំរាមទាំងនោះដុតចោលជាច្រើនលើក ប៉ុន្តែដោយសារមានអ្នកយកមកបោះចោលជាបន្តបន្ទាប់ ធ្វើឱ្យគំនរសំរាមមានការកើនឡើង ។
កញ្ញា មាន ស្រីនុច៖ «ឃើញអញ្ចឹងគគ្រិចណាស់។ ពេលខ្ញុំឃើញពួកបារាំងអីជិះមក គេងាកមើល [សំរាម] មានអារម្មណ៍ថាខ្មាសប្រទេសគេណាស់។ យើងត្រឹមប្រជាពលរដ្ឋ បើយើងណែនាំក៏មិនកើត ណែនាំទៅ គេថាអញ្ចេះអញ្ចុះ»។
ពលរដ្ឋរូបនេះបានស្នើឱ្យអាជ្ញាធរមានដំណោះស្រាយចំពោះគំនរសំរាមទាំងនោះ ដោយថា វាបានបង្កក្លិនស្អុយប៉ះពាល់ដល់សុខភាព។
កញ្ញា មាន ស្រីនុច៖ «ចង់ឱ្យឈប់បោះចោលកន្លែងហ្នឹង ព្រោះអីមើលទៅវាអាក្រក់មើលណាស់។ សូម្បីតែខ្ញុំអង្គុយនៅហ្នឹង ក្លិនស្អុយខ្លាំងណាស់ នៅពេលដែលបោះចោលទៅ ហើយខ្ញុំកើតអាជំងឺបេះដូងហ្នឹងទៅទៀត ហើយហិតរហូត ពិបាកដែរ បន់ឱ្យតែឡាន ស៊ីនទ្រី មកយក»។
ពលរដ្ឋម្នាក់ទៀត អ្នកស្រី នុច រីណា រស់នៅភូមិក្រាំងអង្ក្រង បានឱ្យដឹងថា អ្នកស្រីបានឃើញក្រុមហ៊ុនប្រមូលសំរាមមកប្រមូលជាប្រចាំផងដែរ ប៉ុន្តែអ្នកស្រីថា សំរាមទាំងនេះបានកើតមានជារៀងរាល់ថ្ងៃ ។
អ្នកស្រី នុច រីណា៖ «កន្លែងខ្ញុំលក់ យើងសម្អាតដុតរហូត តែគេបោះរហូត ដូចកន្លែងគេទម្លាប់បោះ។ ឃើញគេយកអស់ ព្រឹកឡើងពេញដដែល។ វាប៉ះពាល់ដល់បរិស្ថានហ្នឹង ហើយ មើលទៅសុទ្ធតែសំរាមឡើងសស្គុស តែមិនដឹងធ្វើម៉េច បើអ្នកបោះវាច្រើនជាងអ្នកសម្អាត»។
ចំណែកពលរដ្ឋម្នាក់ទៀត លោក សា មាន រស់នៅភូមិក្រាំងអង្ក្រង ក្នុងសង្កាត់ក្រាំងធ្នុង បានឱ្យដឹងថា ប្រជាពលរដ្ឋមួយចំនួនបានយកសំរាមច្រើនប្រភេទមកដាក់ចោលលើដងផ្លូវនេះ។
លោក សា មាន៖ «ខ្យល់កួចម្តងៗប៉ើងពេញហ្នឹង ហើរពេញហ្នឹង។ ជួនកាលគេយកគ្រឿងសមុទ្រ ដូចជាក្តាមស្អុយៗ មកចាក់ចោលនៅហ្នឹង ចាក់ហើយយកធុងទៅវិញ មិនចងថង់ចងអីមួយដុំ។ អ្នកមកយក មកប្រមូល គេជេរដែរ [ជេរអ្នកចាក់សំរាម] ស្អុយ! បើអត់ដាក់ថង់អីឱ្យត្រឹមត្រូវផង មកដល់ចាក់យកៗ យើងមិនដឹងធ្វើម៉េច បានត្រឹមអង្គុយមើល មិនហ៊ានថាអីឱ្យគេ»។
បើតាមលោក សឿន សួរ ចៅសង្កាត់ក្រាំងធ្នុង បានបញ្ជាក់ថា កន្លែងដែលមានប្រជាពលរដ្ឋយកសំរាមមកទម្លាក់ចោលនៅតាមដងផ្លូវក្នុងភូមិត្រពាំងជើងស្រុក និងភូមិក្រាំងអង្រ្កងនោះ គឺជាទីតាំងដែលត្រូវបានអាជ្ញាធរហាមឃាត់។
ទោះយ៉ាងណា ចៅសង្កាត់រូបនេះបានស្នើឱ្យប្រជាពលរដ្ឋទុកដាក់សំរាមឱ្យបានត្រឹមត្រូវ ចៀសវាងការយកសំរាមចោលពាសវាលពាសកាល។
យោងតាមរបាយការណ៍របស់ក្រសួងបរិស្ថាន បានបង្ហាញថា ប្រទេសកម្ពុជាបានផលិតសំរាមជាង១ម៉ឺនតោនក្នុងមួយថ្ងៃ ហើយក្នុងរាជធានីភ្នំពេញ មានសំរាមជិត៣ពាន់តោន ដោយការប្រើប្រាស់ថង់ប្លាស្ទិកប្រមាណជាង១០លានថង់ក្នុងមួយថ្ងៃ។
របាយការណ៍ដដែលបញ្ជាក់ថា បរិមាណសំរាមនៅទូទាំងប្រទេសកម្ពុជាមានប្រមាណជិត៤លានតោនក្នុងមួយឆ្នាំ៕
អត្ថបទដោយ ទួក ពិសិដ្ឋ
