ម្ដាយកញ្ញា វី ឌីណែត តារាចម្រៀងនៅផលិតកម្មហង្សមាស បានស្លាប់ដោយសារជំងឺកូវីដ-១៩ ក្នុងអំឡុងពេលព្យាបាលជំងឺនេះ។
ភរិយារបស់តារាជើងចាស់ ហួរ ឡាវី និងត្រូវជាម្តាយរបស់តារាចម្រៀង វី ឌីណែត គឺអ្នកស្រី នួន សុផាន្នី បានទទួលមរណភាពនៅថ្ងៃនេះ អំឡុងពេលដែលអ្នកស្រីកំពុងសម្រាកព្យាបាលជំងឺកូវីដ-១៩។
រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់វីអូឌីនៅថ្ងៃនេះថា ម្ដាយកញ្ញា វី ឌីណែត ពិតជាបានបាត់បង់ជីវិតមែន។
លោកស្រី ឱ វណ្ណឌីន មានប្រសាសន៍ថា៖ «ស្លាប់ដោយសារជំងឺកូវីដ-១៩! ចាំបន្តិចទៀតខ្ញុំចេញសេចក្ដីប្រកាសព័ត៌មានលម្អិត»។
នេះជាករណីទី២ហើយ ដោយកាលពីថ្ងៃទី១១ ខែមីនា ឆ្នាំ២០២១ ក៏មានបុរសជនជាតិខ្មែរ អាយុ៥០ឆ្នាំម្នាក់ រស់នៅសង្កាត់ចាក់អង្រែ ខណ្ឌមានជ័យ រាជធានីភ្នំពេញ បានស្លាប់ដោយសារ ជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ។
កម្ពុជាបានរកឃើញអ្នកឆ្លងជំងឺកូវីដ-១៩ ចំនួន១ ០៦២នាក់ គិតត្រឹមរយៈពេលមួយខែនៃការឆ្លងជំងឺក្នុងព្រឹត្តិការណ៍សហគមន៍២០កុម្ភៈ ដែលចំនួននេះត្រូវបានរដ្ឋាភិបាលបញ្ជាក់ថា កើនឡើងជាង២ដងក្នុងចំណោមអ្នកឆ្លងក្នុងឆ្នាំ២០២០កន្លងទៅ៕