ក្រុមសហជីពបង្ហាញការព្រួយបារម្ភពីការរីករាលដាលនៃការចម្លងវីរុសកូវីដ-១៩ ក្នុងចំណោមបុគ្គលិកនិងកម្មករនៅក្រុមហ៊ុននិងរោងចក្រមួយចំនួន ក្រោយពីមន្ត្រីសុខាភិបាលរកឃើញបុគ្គលិកណាហ្គាវើលដ៍២នាក់ សន្តិសុខរោងចក្រដេរស្បែកជើងម្នាក់ និងកម្មករប្រមូលសំរាមនៅក្រុមហ៊ុនស៊ីនទ្រីម្នាក់ បានឆ្លងជំងឺកូវីដ-១៩។
កាលពីថ្ងៃទី១៦ ខែមីនា ឆ្នាំ២០២១នេះ ស្រ្តីសន្តិសុខម្នាក់ធ្វើការនៅរោងចក្រដេរស្បែកជើងមួយឈ្មោះ Trax Apparel ក្នុងខណ្ឌសែនសុខ រាជធានីភ្នំពេញ ត្រូវបានសារព័ត៌មានក្នុងស្រុករាយការណ៍ថា បានឆ្លងជំងឺកូវីដ-១៩ និងមានអ្នកពាក់ព័ន្ធប្រមាណ៤០នាក់ត្រូវបានយកសំណាកទៅធ្វើតេស្ត។
ប្រធានសម្ព័ន្ធសហជីពកម្ពុជា លោកស្រី យ៉ាង សោភ័ណ្ឌ លើកឡើងថា កម្មកររោងចក្រនៅតែប្រឈមមុខខ្លាំងក្នុងការចម្លងនៃជំងឺកូវីដ-១៩ នៅពេលមាននរណាម្នាក់ក្នុងចំណោមពួកគេមានវិជ្ជមានកូវីដ-១៩ ដូចជាករណីរកឃើញលើសន្តិសុខរោងចក្រ Trax Apparel ដោយសារតែពួកគេនៅតែគ្មានជម្រើសអ្វីក្រៅពីធ្វើដំណើរទៅធ្វើការ និងសម្រាកញ៉ាំអាហារកៀកគ្នាក្នុងចំនួនច្រើនដដែល។
អ្នកស្រីមានប្រសាសន៍ថា៖ «ជាក្តីព្រួយបារម្ភដ៏ធំណាស់សម្រាប់ពួកគាត់ ហើយយើងមានការភ័យខ្លាចមែនទែន បើសិនវាដូចជាករណីកើតឡើងក្នុងរោងចក្រ Trax Apparel ហ្នឹងដែលសន្តិសុខ ហើយគាត់ជាអ្នកវាស់កម្តៅ គាត់ជាអ្នកបាញ់អាល់កុល ហើយគាត់ជាអ្នកប៉ះពាល់ខ្លួនកម្មករ អ៊ីចឹងវាអាចនឹង១០០ភាគរយ វាអាចឆ្លងទៅបងប្អូនកម្មករហើយ ព្រោះជំងឺនេះវាងាយនៅក្នុងការឆ្លងណាស់»។
បើតាមប្រធានសហជីពរូបនេះ ខាងក្រុមហ៊ុនដែលមានករណីសន្តិសុខយាមរោងចក្រឬកម្មករ ឆ្លង គួរតែអនុញ្ញាតឱ្យកម្មករឈប់សម្រាកជាបណ្តោះអាសន្ន ដោយមានការផ្តល់ប្រាក់ឧបត្ថម្ភ និងធ្វើតេស្តរកអ្នកដែលបានឆ្លង ចៀសវាងអ្នកទាំងនោះចម្លងតទៅអ្នកដទៃផ្សេងទៀត ដែលនាំឱ្យការរីករាលដាលនៃជំងឺផ្លូវដង្ហើមនេះកាន់តែធំនិងពិបាកក្នុងការទប់ស្កាត់។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា កម្មកររោងចក្រកំពុងប្រឈមហានិភ័យនៃការរីករាលដាលនៃមេរោគក្នុងកម្រិតខ្ពស់ ដោយសារពួកគេមិនអាចរក្សាគម្លាតសុវត្ថិភាពទាំងពេលធ្វើដំណើរនិងពេលញ៉ាំអាហារ។
លោក អាត់ ធន់ មានប្រសាសន៍ថា៖ «ខ្ញុំគិតថា វាជាការប្រឈមខ្លាំង ព្រោះពួកគាត់ជិះឡានជាមួយគ្នា ស្នាក់នៅជាមួយគ្នា ហូបបាយជាមួយគ្នា ចេញចូលមុខរោងចក្រជាមួយគ្នា ធ្វើការជាមួយគ្នា ដែលមិនមានគម្លាតសង្គមសោះ ប៉ុន្តែយើងឃើញថា កន្លងមក មានការតឹងតែងក្នុងការពាក់ម៉ាស់សម្អាតដៃបាន ប៉ុន្តែគម្លាតសុវត្ថិភាពគឺថាធ្វើអត់ទាន់បាន អញ្ចឹងយើងមានការបារម្ភមែនទែន»។
វីអូឌី មិនអាចសុំការបញ្ជាក់ពីប្រធានគ្រប់គ្រងទូទៅនៅរោងចក្រ Trax Apparel លោក Boonkiat Jungsaisawangphan ដោយថា លោកជាប់រវល់ប្រជុំ មិនអាចផ្តល់បទសម្ភាសន៍តាមទូរសព្ទបាន។
ដោយឡែក កាលពីថ្ងៃទី១២ ខែមីនា បុគ្គលិកកាស៊ីណូ ណាហ្គាវើលដ៍ ប្រមាណ៣ពាន់នាក់ បានទៅផ្តល់សំណាក ដើម្បីធ្វើតេស្តរកវីរុសកូវីដ-១៩ ជាលើកទី២ នៅមុខបរិវេណអាគារណាហ្គាវើលដ៍២ តាមការអំពាវនាវរបស់ក្រុមហ៊ុន ហើយការផ្តល់សំណាកនេះ ត្រូវបានគេមើលឃើញថា មានការប្រមូលផ្តុំគ្នាច្រើន ដោយមិនមានការរក្សាគម្លាតសុវត្ថិភាព។
ការធ្វើតេស្តលើបុគ្គលិកណាហ្គានោះ ត្រូវបានមន្ត្រីសុខាភិបាលបញ្ជាក់ថា បានរកឃើញករណីវិជ្ជមានវីរុសកូវីដ-១៩ លើមនុស្ស២នាក់ទៀត ខណៈការធ្វើតេស្តលើកទី១ កាលពីចុងខែកុម្ភៈ បានរកឃើញថា មានអ្នកឆ្លងចំនួន១១នាក់រួចទៅហើយ។
អភិបាលខណ្ឌឫស្សីកែវ លោក ជា ពិសី ឱ្យដឹងនៅថ្ងៃទី១៨ ខែមីនានេះថា បុគ្គលិកក្រុមហ៊ុន ណាហ្គាវើលដ៍ ពីរនាក់ប្តីប្រពន្ធដែលស្នាក់នៅផ្ទះជួលមួយកន្លែងក្នុងខណ្ឌឫស្សីកែវ ត្រូវបានទទួលលទ្ធផលវិជ្ជមានកូវីដ-១៩ ក្នុងការធ្វើតេស្តលើកទី២ និងត្រូវបានបញ្ជូនទៅសម្រាកព្យាបាលនៅសណ្ឋាគារ The Great Duke (អតីតសណ្ឋាគារ អ៊ីនធើខនទីណង់តាល់) នៅយប់ថ្ងៃទី១៧ ខែមីនា។
លោកថា៖ «ខ្ញុំអត់បានបញ្ជាក់ទេ គ្រាន់តែថា គាត់ធ្វើនៅណាហ្គាវើលដ៍ទាំង២នាក់ប្តីប្រពន្ធហ្នឹង។ គាត់ធ្វើតេស្តសំណាកលើកទី២ [ក្រោយមក] ១០ថ្ងៃហើយបានឃើញ Positive [វិជ្ជមាន]»។
ចាប់តាំងពីផ្ទុះករណីឆ្លងក្នុងចំណោមបុគ្គលិកក្រុមហ៊ុន ណាហ្គាវើលដ៍ មក នៅថ្ងៃទី១ ខែមីនា ក្រុមហ៊ុនបានប្រកាសផ្អាកដំណើរការជាបណ្តោះអាសន្ន ដើម្បីចូលរួមទប់ស្កាត់ការឆ្លងរាលដាលនៃជំងឺកូវីដ-១៩។ ការផ្អាកនេះបានបង្កើតឱ្យមានយុទ្ធនាការទាមទារប្រាក់ឈ្នួលនិងប្រាក់ឧបត្ថម្ភផ្សេងៗពីថៅកែរោងចក្រតាមបណ្តាញសង្គមហ្វេសប៊ុក (Facebook) ពីបុគ្គលិកកម្មកររបស់ក្រុមហ៊ុនកាស៊ីណូដែលកំពុងធ្វើចត្តាឡីស័កនៅផ្ទះដោយខ្លួនឯង។
ប្រធានសហជីពតំណាងបុគ្គលិកកម្មករខ្មែរនៅក្រុមហ៊ុន ណាហ្គាវើលដ៍ កញ្ញា ឈីម ស៊ីថរ បាននិយាយថា មានបុគ្គលិកប្រមាណ១ ០០០នាក់ បានបង្ហោះសារដោយភ្ជាប់ជាមួយពាក្យថា “#គ្រួសារNaGa” ដើម្បីទាមទារឱ្យក្រុមហ៊ុនផ្តល់ប្រាក់ឈ្នួលដល់ពួកគេ អំឡុងពេលក្រុមហ៊ុនផ្អាកដំណើរការបណ្តោះអាសន្ន។
កញ្ញាបន្ថែមថា បើតាមស្ថានភាពឆ្លងរីករាលដាលបច្ចុប្បន្ន ប្រតិបត្តិការអាជីវកម្មកាស៊ីណូ ណាហ្គាវើលដ៍ អាចនឹងបន្តបិទក្នុងរយៈពេលយូរទៅមុខទៀត ដែលករណីនេះ ខាងក្រុមហ៊ុនគួរតែផ្តល់ប្រាក់ខែ ប្រាក់អត្ថប្រយោជន៍ និងប្រាក់ឧបត្ថម្ភដល់បុគ្គលិកដែលកំពុងដាក់ខ្លួនឯងនៅផ្ទះ ដើម្បីបង្ការនិងទប់ស្កាត់ការរីករាលដាលនៃជំងឺឆ្លង។
កញ្ញា ស៊ីថរ និយាយថា៖ «នៅក្នុងអំឡុងពេលនេះ គឺបុគ្គលិកត្រូវការប្រាក់ឧបត្ថម្ភ ត្រូវការប្រាក់ខែ ត្រូវការប្រាក់អតីតភាពពួកគាត់ ដើម្បីពួកគាត់អាចបន្តជីវភាពរស់នៅបាន ហើយបើសិនជាក្រុមហ៊ុននៅតែបន្តព្រងើយកន្តើយ មិនព្រមបើកប្រាក់អតីតការងារ បើកប្រាក់ឧបត្ថម្ភឱ្យបុគ្គលិក ប្រាក់ខែបុគ្គលិក នៅក្នុងអំឡុងពេលបិទទេ គឺពួកគាត់អត់អាចរស់បានទេ»។
ចំណែកប្រធានសហជីពកម្មករក្រុមហ៊ុន ស៊ីនទ្រី លោក កៅ សាវ៉ាត ក៏បានការព្រួយបារម្ភផងដែរ ពីការចម្លងវីរុសកូវីដ-១៩ ក្នុងចំណោមកម្មករក្រុមហ៊ុនប្រមូលសំរាម ស៊ីនទ្រី បន្ទាប់ពីមានករណីកម្មករម្នាក់ត្រូវបានរកឃើញថាបានឆ្លងជំងឺនេះ នៅពេលរូបគេទៅលេងស្រុកកំណើតនៅខេត្តតាកែវ។ លោកថា លោកនិងក្រុមហ៊ុន ស៊ីនទ្រី កំពុងសហការគ្នាស្វែងរកអ្នកប៉ះផ្ទាល់និងប្រយោលជាមួយកម្មករដែលឆ្លង។
លោក កៅ សាវ៉ាត និយាយថា៖ «ប្រសិនមានកើតអ៊ីចឹង ពួកខ្ញុំអាចនឹងប្រឈមមុខនឹងការចម្លងច្រើន ដោយសារការជួបជុំរបស់ពួកគាត់ហ្នឹង។ មួយឡានៗ បងដឹងស្រាប់ហើយ ជិះក្នុងឡានហ្នឹង បើសិនកើតមួយ វាទៅតែទាំងអស់មួយឡាន។ វាឆ្លងគ្នាពេញហ្នឹង ព្រោះយើងអង្គុយជិតៗគ្នា ហើយធ្វើការក៏ជាមួយគ្នា»។
តាមរបាយការណ៍ក្រសួងសុខាភិបាល ឱ្យដឹងថា គិតត្រឹមថ្ងៃទី១៩ ខែមីនា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ នៅទូទាំងប្រទេសសរុប១ ៥៧៨នាក់ ដោយបន្ថែម៣៩ករណីថ្មីនៅថ្ងៃម្សិលមិញ ក្នុងនោះ ព្យាបាលជាសះស្បើយ៩១៧នាក់ និងកំពុងសម្រាកព្យាបាល៦៥៨នាក់ ព្រមទាំងមានករណីស្លាប់ម្នាក់៕
