អាជ្ញាធរ និងតុលាការខេត្តកោះកុងនេះ កំពុងស៊ើបអង្កេតលើករណីឈ្មួញដីម្នាក់ចាក់ដីចូលព្រែករំលោភយកដីព្រៃកោងកាង ស្ថិតក្នុងស្រុកមណ្ឌលសីមា ខេត្តកោះកុង ដើម្បីយកធ្វើកម្មសិទ្ធិ។
កាលពីថ្ងៃទី១៦ ខែមីនា ឆ្នាំ២០២១ ទំព័រហ្វេសប៊ុកមួយឈ្មោះ Taing Sonny បានផ្សព្វផ្សាយតាមរយៈឃ្លីបវីដេអូជិត៣នាទី ដោយបានរៀបរាប់ថា ដីព្រៃកោងកាងរបស់រដ្ឋ និងដីចំណីមាត់ព្រែកជាច្រើនហិកតា ស្ថិតនៅភូមិទួលគគីរក្រោម ឃុំទួលគគីរ ត្រូវជនខិលខូចចាក់ដីលុបយ៉ាងអនាធិបតេយ្យ ដោយគ្មានការទប់ស្កាត់ពីអាជ្ញាធរមូលដ្ឋានឡើយ។
លោក Taing Sonny និយាយថា៖ «ដើមកោងកាងស្រស់ៗរាប់រយហិកតា គេបម្រុងនឹងព័ទ្ធយកធ្វើជាកម្មសិទ្ធិ ដែលគួរឱ្យសោកស្តាយបំផុត អាជ្ញាធរមូលដ្ឋានដែលឈានដល់ដំណាក់កាលនេះហើយ នៅតែបណ្តែតបណ្តោយឱ្យឈ្មួញនៅតែបំពាន»។
អភិបាលខេត្តកោះកុង លោកស្រី មិថុនា ភូថង ទទួលស្គាល់ថា ពិតជាមានករណីចាក់ដីលុបព្រែក និងការរំលោភយកដីព្រៃកោងកាងពិតមែន។ ករណីនេះ លោកស្រីបានប្រាប់ទៅអាជ្ញាធរស្រុកចុះស្រាវជ្រាវ ហើយថា តុលាការខេត្តកោះកុង ក៏កំពុងស៊ើបអង្កេតករណីនេះដែរ ដើម្បីចាត់វិធានការផ្លូវច្បាប់លើជនល្មើស។
អភិបាលរងខេត្តកោះកុង លោក សុខ សុទ្ធី ដែលធ្វើការលើកិច្ចការងារនេះ ឱ្យដឹងថា អ្នកដែលចាក់ដីលុបមាត់ព្រែកនិងព្រៃកោងកាងនោះ ឈ្មោះ លាង ហ៊ីម ភេទស្រី ជាឈ្មួញដីដ៏ល្បីម្នាក់នៅខេត្តកោះកុង។ លោកថា មាត់ព្រែកនិងព្រៃកោងកាងដែលឈ្មួញដីបានចាក់លុបនោះមានទំហំប្រហែល៣ ៣០២ម៉ែត្រការ៉េ។
លោកបន្តថា អាជ្ញាធរបានតម្រូវឱ្យអ្នកដែលចាក់រំលោភចូលដីរដ្ឋនោះ កាយអាចម៍ដីចេញ និងស្តារព្រៃកោងកាងឡើងវិញផងដែរ។
លោកបន្ថែមថា៖ «ក្រៅពីមានវិធានការរដ្ឋបាល យើងក៏ប្រគល់កិច្ចការនេះជូនទៅតុលាការផងដែរ ក្នុងគោលបំណងដាក់ទោសលើបុគ្គលដែលប្រព្រឹត្តបទល្មើសក្នុងតំបន់ការពារធម្មជាតិ»។
អ្នកនាំពាក្យសាលាដំបូងខេត្តកោះកុង លោក អ៊ីន សុវណ្ណធាន្នី ប្រាប់ វីអូឌី យ៉ាងខ្លីថា រឿងនេះបច្ចុប្បន្នកំពុងស្ថិតនៅក្នុងចំណាត់ការនៃការស៊ើបអង្កេត។
មេឃុំទួលគគីរ អ្នកស្រី គឹម សុខេម ទទួលស្គាល់ថា អ្នកស្រីបានដឹងរឿងនេះយឺតពេលបន្តិចមែន ប៉ុន្តែក្រោយមក អ្នកស្រីបានចុះហាមឃាត់ដែរ ហើយថា អ្នកចាក់ដីនោះក៏បានទទួលកំហុសនិងបានធ្វើកិច្ចសន្យាឈប់ប្រព្រឹត្តផងដែរ។
អ្នកស្រីបន្ថែមថា៖ «ពេលចាក់ហ្នឹង ខ្ញុំអត់បានទៅមើលទេ ពីព្រោះខ្ញុំជាប់រវល់ដែរ ហើយមួយទៀតមានភ្លៀងធ្លាក់ផង។ ប៉ុន្តែពេលយើងឃើញ មន្ត្រីភូមិឃុំយើងហ្នឹងក៏បានចុះធ្វើការហាមឃាត់ជាបន្ទាន់ ឱ្យគាត់បញ្ឈប់សកម្មភាព ឱ្យគាត់ធ្វើកិច្ចសន្យា ហើយគាត់ក៏បានព្រមព្រៀងប្រគល់ដីនោះឱ្យវិញអស់ហើយដែរ»។
វីអូឌី មិនអាចសុំការឆ្លើយតបពីអ្នកស្រី លាង ហ៊ីម ដែលរងការចោទប្រកាន់ថាបានចាក់ដីចូលមាត់ព្រែកនិងលុបដីលើព្រៃកោងកាងបានទេ នៅថ្ងៃនេះ។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូប្រចាំខេត្តកោះកុង លោក ប៉ែន វុទ្ធា បានដាក់ការសង្ស័យថា ករណីដែលជនខិលខូចលួចចាក់ដីរំលោភចូលឆ្នេរសមុទ្រ មាត់ព្រែក និងការទន្ទ្រានយកដីព្រៃកោងកាងរបស់រដ្ឋនោះ អាចមានការជាប់ពាក់ព័ន្ធអំពើពុករលួយរវាងអាជ្ញាធរមូលដ្ឋាន និងជនល្មើស។ លោកបន្តថា ករណីដែលអាជ្ញាធរមូលដ្ឋានឆ្លើយថាមិនបានដឹងថាមានជនល្មើសធ្វើសកម្មភាពនោះ ជាការឆ្លើយដោះសារគេចវេះពីការទទួលខុសត្រូវតែប៉ុណ្ណោះ។
មន្ត្រីសិទ្ធិមនុស្សរូបនេះស្នើឱ្យអាជ្ញាធរចាត់វិធានការច្បាប់ឱ្យបានតឹងរ៉ឹងចំពោះអ្នកជាប់ពាក់ព័ន្ធ និងអ្នកប្រព្រឹត្តបទល្មើស ដើម្បីជាការព្រមានដល់ជនខិលខូចផ្សេងទៀត។ លោក ប៉ែន វុទ្ធា លើកឡើងថា កន្លងមកមានតែអ្នកមានលុយមានអំណាចប៉ុណ្ណោះដែលហ៊ានរំលោភបំពានដីរដ្ឋឬដីតំបន់ការពារ ធ្វើជាកម្មសិទ្ធិ។
លោកបន្ថែមថា៖ «កន្លងមក អាជ្ញាធរតែងតែចាត់វិធានការដោយគ្រាន់តែធ្វើកំណត់ហេតុ ហើយដកហូតយកដីនោះមកវិញ ឬក៏តម្រូវឱ្យកាយអាចម៍ដីនោះឡើងវិញប៉ុណ្ណោះ ដែលធ្វើឱ្យជនខិលខូចមិនខ្លាច នៅតែធ្វើសកម្មភាពនេះដដែល អញ្ចឹងវិធានការហ្នឹងមិនមានប្រសិទ្ធភាពទេក្នុងការទប់ស្កាត់។ អញ្ចឹងអាជ្ញាធរមិនព្រមចាប់ជនខិលខូលទាំងអស់នោះបញ្ជូនទៅតុលាការ ក្នុងការព្រមាន ក្នុងការដាក់ពិន័យ ដាក់ទោសធ្ងន់ធ្ងរទេ។ អញ្ចឹងរឿងហ្នឹងមិនអាចបញ្ចប់បានឡើយ»។
ក្នុងពិធីបុណ្យសមុទ្រលើកទី៨ នៅខេត្តកំពត កាលពីខែធ្នូ ឆ្នាំ២០១៩ លោកនាយករដ្ឋមន្រ្តី ហ៊ុន សែន បានថ្លែងថា កម្ពុជាត្រូវការពារឆ្នេរសមុទ្រឱ្យបានគង់វង្ស ដោយមិនត្រូវឱ្យមានការចាក់ដីចូលសមុទ្រ ឬការកាប់ព្រៃកោងកាង ដើម្បីទន្ទ្រានយកដីនោះឡើយ៕