អាជ្ញាធរខេត្តកំពង់ស្ពឺ កំពុងរកអត្តសញ្ញាណអ្នកដែលបានលួចឈូសឆាយ និងទន្ទ្រានរំលោភយកដីរដ្ឋក្នុងដែនជម្រកសត្វព្រៃភ្នំឱរ៉ាល់ជាង២០០ហិកតា។
អភិបាលខេត្តកំពង់ស្ពឺ លោក វ៉ី សំណាង មានប្រសាសន៍នៅថ្ងៃទី១៧ ខែមីនា ឆ្នាំ២០២១នេះថា រដ្ឋបាលខេត្ត កាលពីថ្ងៃម្សិលមិញ បានចេញដីកាដកហូតដីព្រៃឈើចំនួន២៦៦,៣១ហិកតា ស្ថិតនៅ៩ទីតាំងផ្សេងៗគ្នាក្នុងភូមិសាស្ត្រឃុំតាសាល និងឃុំត្រពាំងជោ ស្រុកឱរ៉ាល់ មកធ្វើជាសម្បត្តិរដ្ឋវិញ។
លោកថា៖ «ដីហ្នឹងជាដីគម្របព្រៃឈើដែលស្ថិតនៅតំបន់ការពារ ស្ថិតនៅក្រោមការគ្រប់គ្រងរបស់ក្រសួងបរិស្ថាន ហើយជនខិលខូចបានលួចទៅធ្វើការទន្ទ្រានកាន់កាប់ដីហ្នឹងដោយខុសច្បាប់។ អ៊ីចឹងយើងរកឃើញការចុះទន្ទ្រានដោយខុសច្បាប់ គឺយើងជាអាជ្ញាធរបានដកហូតឡើងមកវិញទុកជាសម្បត្តិរដ្ឋវិញ»។
អភិបាលខេត្តកំពង់ស្ពឺរូបនេះបន្តថា បច្ចុប្បន្ន អាជ្ញាធរក៏កំពុងស៊ើបអង្កេតនិងស្រាវជ្រាវរកជនខិលខូចដែលបានលួចឈូសឆាយនិងទន្ទ្រានរំលោភយកដីព្រៃនោះផងដែរ។
លោកថា៖ «កំពុងរកមុខអ្នកពាក់ព័ន្ធ ដើម្បីប្ដឹងផ្ដល់ទៅតុលាការ។ អាហ្នឹងនីតិវិធី វារយៈពេល១០ឆ្នាំ អាជ្ញាយុកាលវា! អ៊ីចឹងយើងអាចស្វែងរកជនហ្នឹងរហូត មិនដឹងថ្ងៃណាវាជួប[ឬ]មិនជួប តែរយៈពេល១០ឆ្នាំ។ តែបើសិនជាអត់មានជនណាមកអះអាងថា ដីហ្នឹងជាដីរបស់ខ្លួនទេ វានៅជារបស់រដ្ឋ ប៉ុន្តែបើអះអាងជារបស់ខ្លួន អាហ្នឹងបើនិយាយពីឥរិយាបថនៃការចូលកាន់កាប់ដីព្រៃឈើរបស់រដ្ឋ អ៊ីចឹងប្រឈមនឹងការជាប់គុកជាប់ច្រវាក់»។
ទោះយ៉ាងណាក៏ដោយ អភិបាលខេត្តរូបនេះមិនអាចបញ្ជាក់បាននោះទេថា សកម្មភាពនៃការកាប់ទន្រ្ទាននោះបានចាប់ផ្តើមតាំងពីពេលណា ដោយលោកថា មន្រ្តីអភិរក្សនៅមានចំនួនតិចនៅឡើយបើប្រៀបធៀបនឹងទំហំដីឧទ្យាន។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា មានប្រសាសន៍ថា ក្រសួងនឹងបញ្ជូនសំណុំរឿងនេះទៅតុលាការ ប្រសិនបើជាមានភស្តុតាងគ្រប់គ្រាន់ និងរកឃើញអត្តសញ្ញាណជននោះ។
លោកថា៖ «យើងបានចុះបង្ក្រាប ហើយបានដកហូតវត្ថុតាងមួយចំនួនមានទាំងគ្រឿងចក្រ មានទាំងសម្ភារមួយចំនួនដែលប្រើប្រាស់សម្រាប់ទន្ទ្រានកាន់កាប់ដីព្រៃដោយខុសច្បាប់។ ខ្ញុំមិនមានទិន្នន័យច្បាស់ថា យើងមានប៉ុន្មានករណីជារួមមកទេតាំងពីនេះមកនោះ ប៉ុន្តែខ្ញុំសុំបញ្ជាក់ថា រាល់សំណុំរឿងដែលពាក់ព័ន្ធនឹងការទន្ទ្រានកាន់កាប់ដីព្រៃដោយខុសច្បាប់ គឺយើងបានអនុវត្តច្បាប់ ហើយបានកសាងសំណុំរឿងទៅតុលាការ ហើយសំណុំរឿងខ្លះបានជំនុំជម្រះរួច ហើយជនមួយចំនួនបានជាប់ទោស»។
ការឈូសឆាយនិងទន្ទ្រានកាន់កាប់ដីក្នុងដែនជម្រកសត្វព្រៃភ្នំឱរ៉ាល់ មិនមែនកើតឡើងតែនៅខេត្តកំពង់ស្ពឺឡើយ នៅខេត្តពោធិ៍សាត់ និងខេត្តកំពង់ឆ្នាំង ក៏ធ្លាប់មានករណីនេះដែរ។
ជាក់ស្ដែង កាលពីថ្ងៃទី២ ខែតុលា ឆ្នាំ២០២០កន្លងមក រដ្ឋមន្ត្រីក្រសួងមហាផ្ទៃ លោក ស ខេង បញ្ជាឱ្យអភិបាលខេត្តកំពង់ឆ្នាំង ដកហូតដីដែលរងការទន្ទ្រានកាន់កាប់ខុសច្បាប់ក្នុងដែនជម្រកសត្វព្រៃភ្នំឱរ៉ាល់ យកមកទុកជាសម្បត្តិរដ្ឋវិញ។
ក្រៅពីបញ្ជាឱ្យដកហូត លោក ស ខេង ក៏បានបញ្ជាឱ្យស្រាវជ្រាវនិងចាត់វិធានការច្បាប់ចំពោះ មេខ្លោងដែលបានញុះញង់ឱ្យប្រជាពលរដ្ឋចូលទៅកាប់រានដីព្រៃនិងកាន់កាប់ខុសច្បាប់នៅក្នុងដែនជម្រកសត្វព្រៃភ្នំឱរ៉ាល់ យកមកដាក់ទោសផងដែរ។
អ្នកសម្របសម្រួលនៃសមាគមការពារសិទ្ធិមនុស្សអាដហុកប្រចាំខេត្តកំពង់ស្ពឺ លោក រ័ត្ន ថាវី ស្វាគមន៍ចំពោះការដកហូតដីមកទុកជាសម្បត្តិរដ្ឋវិញ ប៉ុន្តែលោកជំរុញឱ្យអាជ្ញាធរចាប់ខ្លួនអ្នកប្រព្រឹត្តបទល្មើសនិងអ្នកពាក់ព័ន្ធមកដាក់ទោស ទើបអាចទប់ស្កាត់ការឈូសឆាយនិងទន្ទា្រនដីក្នុងដែនជម្រកមានប្រសិទ្ធភាព។
លោកថា៖ «ខ្ញុំស្វាគមន៍ចំពោះការដកហូតដីមកវិញ ប៉ុន្តែខ្ញុំហាក់ដូចជានៅមិនទាន់យល់ដែរ ព្រោះការដកហ្នឹង ឃើញតែដកជារៀងរាល់ឆ្នាំ ហើយដកមិនចេះអស់សោះ។ អត់ឃើញចាប់អ្នកប្រព្រឹត្តមកដាក់ទោសសោះ ដល់អ៊ីចឹងទៅយើងមើលឃើញថា ធ្វើឱ្យតែល្អមើល»។
រដ្ឋាភិបាលបានចេញអនុក្រឹត្យមួយកាលពីឆ្នាំ១៩៩៣ ដោយសម្រេចដាក់ដែនជម្រកសត្វព្រៃភ្នំឱរ៉ាល់ជាតំបន់ការពារ ដែលមានផ្ទៃដីទំហំជាង២៥ម៉ឺនហិកតា ស្ថិតនៅខេត្តកំពង់ស្ពឺ ពោធិ៍សាត់ និងកំពង់ឆ្នាំង។ ដែនជម្រកសត្វព្រៃនេះត្រូវបានរដ្ឋាភិបាលដាក់ឱ្យស្ថិតនៅក្រោមការគ្រប់គ្រងរបស់ក្រសួងបរិស្ថាន៕
