អតីតមន្រ្តីជាន់ខ្ពស់បក្សសង្រ្គោះជាតិ និងជាអតីតសមាជិកព្រឹទ្ធសភា លោកស្រី ថាក់ ឡានី ត្រូវបានប្រមុខរដ្ឋស្តីទី លើកលែងទោសកាលពីដើមខែមីនានេះ។
លោកស្រី ថាក់ ឡានី ត្រូវបានតុលាការសាលាដំបូងរាជធានីភ្នំពេញ កាត់ទោសកាលពីថ្ងៃទី១៧ ខែវិច្ឆិកា ឆ្នាំ២០១៦ ដាក់ពន្ធនាគាររយៈពេល ១ឆ្នាំ ៦ខែ និងពិន័យជាប្រាក់ ៨ ០០០ ០០០ រៀល ព្រមទាំងបង់ប្រាក់ជំងឺចិត្តដល់លោកនាយករដ្ឋមន្ត្រី ហ៊ុន សែន ចំនួន១០០រៀល ក្រោមការចោទប្រកាន់ពីបទ «បរិហារកេរ្តិ៍ជាសាធារណៈ» និងបទ«ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
បណ្តឹងបរិហារកេរ្តិ៍ ដែលប្តឹងដោយលោកនាយករដ្ឋមន្ត្រី ហ៊ុន សែន ធ្វើឡើងបន្ទាប់ពីលោកស្រី បានថ្លែងនៅក្នុងវេទិកាសាធារណៈមួយនៅក្នុងខេត្តរតនគិរី កាលពីខែកក្កដា ឆ្នាំ២០១៦ ដោយបានចោទប្រកាន់លោកនាយករដ្ឋមន្ត្រី ហ៊ុន សែន ថាជាអ្នករៀបចំការបាញ់សម្លាប់លោកបណ្ឌិត កែម ឡី។ ជុំវិញបណ្តឹងនេះ លោកស្រី ថាក់ ឡានី ដោយសម្អាងលើអភ័យឯកសិទ្ធសមាជិកព្រឹទ្ធសភា លោកស្រីបានបដិសេធមិនចូលខ្លួនទៅឆ្លើយបំភ្លឺចំនួនពីរលើក។ កាលណោះ លោកស្រី គឺជាសមាជិកព្រឹទ្ធសភាអតីតគណបក្ស សម រង្ស៊ី នៅក្នុងនីតិកាលទី៣។
យោងតាមព្រះរាជក្រឹត្យដែលចុះហត្ថលេខាដោយប្រមុខរដ្ឋស្តីទី លោក សាយ ឈុំ ចុះថ្ងៃទី៣ ខែមីនា ឆ្នាំ២០២១ និងត្រូវបានផ្សព្វផ្សាយជាសាធារណៈនៅថ្ងៃនេះ បានត្រាស់បង្គាប់លើកលែងទោសលោកស្រី ថាក់ ឡានី ដែលត្រូវបានតុលាការសម្រេចផ្តន្ទាទោសដាក់ពន្ធនាគារកំណត់ ១ឆ្នាំ ៦ខែ និងពិន័យជាប្រាក់ចំនួន ៨ ០០០ ០០០រៀល តាមអំណាចសាលដីកាព្រហ្មទណ្ឌចុះថ្ងៃទី២៦ ខែកុម្ភៈ ឆ្នាំ២០១៨ របស់តុលាការកំពូល។
ព្រះរាជក្រឹត្យលើកលែងទោសនេះ បានធ្វើឡើងបន្ទាប់ពីមានការស្នើសុំពីលោកនាយករដ្ឋមន្រ្តី ហ៊ុន សែន។
វីអូឌី មិនអាចសុំការបញ្ជាក់ពីមូលហេតុនៃការលើកលែងទោសនេះពីអ្នកនាំពាក្យក្រសួងយុត្តិធម៌ លោក គឹម សន្តិភាព និងលោក ជិន ម៉ាលីន បានទេ។
លោកស្រី ថាក់ ឡានី មិនអាចសុំការបញ្ជាក់បន្ថែមបានទេ នៅថ្ងៃនេះ។
ចំណែកអតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន បានសាទរចំពោះការលើកលែងទោសនេះ។ លោកបានចាត់ទុកថា ការលើកលែងទោសនេះជាអំពើមនុស្សធម៌មួយ ខណៈលោកស្រី ថាក់ ឡានី ក៏មានវ័យចាស់ជរាទៅហើយនោះ។
លោកថា៖ «ខ្ញុំដឹងដំណឹងរហៀងៗដែរថា លោកជំទាវនឹងស្នើឱ្យមានការលើកលែងទោសនេះ ហើយខ្ញុំយល់ថា មិនមានរឿងអីធំដុំពេកទេ។ សម្រាប់លោកជំទាវ ថាក់ ឡានី ចាស់ហើយ ហើយរត់ភៀសខ្លួនទៅរស់នៅស្រុកគេ ខ្ចាត់ព្រាត់ពីប្រទេស ពីភូមិកំណើត ពីគ្រួសារអ៊ីចឹង។ ហើយការលើកលែងទោសឱ្យលោកជំទាវត្រលប់មកវិញ គឺជារឿងត្រឹមត្រូវហើយ រឿងសីលធម៌ និងគុណធម៌សម្រាប់ស្រុកខ្មែរយើង»។
ចំណែកលោក កន សាវាង្ស មន្ត្រីសម្របសម្រួលផ្នែកអង្កេតនិងតស៊ូមតិ នៃអង្គការខុមហ្រ្វែល (Comfrel) បានចាត់ទុកការលើកលែងទោសដល់អតីតសមាជិកព្រឹទ្ធសភាអតីតគណបក្ស សម រង្ស៊ី នេះ គឺមានចំណុចខ្លះបានឆ្លើយតបទៅនឹងការទាមទាររបស់សហគមន៍អន្តរជាតិ ក៏ប៉ុន្តែវាមិនទាន់គ្រប់គ្រាន់នៅឡើយទេ។
លោកមានប្រសាសន៍ថា៖ «ខ្ញុំយល់ឃើញថា មិនមានត្រឹមប៉ុណ្ណឹងទេ នៅមានអ្នកនយោបាយច្រើនទៀត ដែលមានការលើកឡើងដែលមានជាប់ពាក់ព័ន្ធជាមួយផ្នែកនយោបាយហ្នឹង គួរតែរដ្ឋាភិបាលគិតគូរដូចគ្នា មើលលើការពិចារណា ហើយលើកលែងការចោទប្រកាន់ឬសម្របសម្រួលនយោបាយយ៉ាងម៉េច គឺធ្វើតាមលទ្ធភាពដែលអាចធ្វើទៅបាន ឱ្យស្ថានភាពហ្នឹងដូចស្ថានភាពនៅមុនឆ្នាំ២០១៧នេះ គឺជាការមួយដ៏ប្រសើរ ហើយយើងសាទរនូវការដោះស្រាយបញ្ហាដោយសន្តិវិធី ការដោះស្រាយខាងសិទ្ធិនយោបាយនេះដែលអាចទទួលយកបាន»។
បច្ចុប្បន្ន លោកស្រី ថាក់ ឡានី ត្រូវបានគេដឹងថា កំពុងស្នាក់នៅក្នុងប្រទេសស៊ុយអ៊ែត ចាប់តាំងពីលោកស្រីបានរត់ភៀសខ្លួនចេញពីប្រទេសកម្ពុជា កាលពីអំឡុងខែកក្កដា ឆ្នាំ២០១៦មក៕
