ក្រសួងសុខាភិបាល រកឃើញអ្នកឆ្លងកូវីដ-១៩ ក្នុងព្រឹត្តិការណ៍សហគមន៍២០កុម្ភៈ ចំនួន១០៥ នាក់បន្ថែមទៀត ដែលជាចំនួនមួយច្រើនមិនធ្លាប់មានពីមុនមក ចាប់តាំងពីកម្ពុជាបានរកឃើញជំងឺឆ្លងនៅក្នុងប្រទេសរបស់ខ្លួននេះ។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី១៦ ខែមីនា ឆ្នាំ២០២១ ឱ្យដឹងថា អ្នកឆ្លងជំងឺកូវីដ-១៩ ទាំង១០៥នាក់នោះ រួមមាន ជនជាតិខ្មែរ ៣៥នាក់ ជនជាតិចិន ៥០នាក់ ជនជាតិវៀតណាម ១១នាក់ ជនជាតិថៃ ៨នាក់ និងជនជាតិម៉ាឡេស៊ីម្នាក់។
អ្នកឆ្លងជំងឺកូវីដ-១៩ខាងលើ ត្រូវបានក្រសួងសុខាភិបាលរកឃើញនៅរាជធានីភ្នំពេញ ចំនួន២៩នាក់ ក្នុងខេត្តកណ្ដាល ចំនួន៦៤នាក់ ខេត្តព្រះសីហនុ ចំនួន៨នាក់ ខេត្តកោះកុងចំនួន៣នាក់ និងខេត្តព្រៃវែងម្នាក់។
ក្រៅពីមានអ្នកឆ្លង ក្រសួងថាក៏មានអ្នកជាសះស្បើយចំនួន៨៨នាក់ ដែលបច្ចុប្បន្នអ្នកទាំងនោះ ត្រូវបានគ្រូពេទ្យអនុញ្ញាតឱ្យចេញពីមន្ទីរពេទ្យរួចហើយ។
សម្រាប់ព្រឹត្តិការណ៍ឆ្លងក្នុងព្រឹត្តិការណ៍សហគមន៍២០កុម្ភៈនេះ ក្រសួងថា បានកើនដល់៩១៥នាក់។
គិតត្រឹមថ្ងៃទី១៦ ខែមីនា ឆ្នាំ២០២១ ក្រសួងសុខាភិបាលរកឃើញអ្នកឆ្លងជំងឺកូវីដ-១៩ នៅទូទាំងប្រទេសចំនួន១ ៤៣០នាក់ ក្នុងនោះ ព្យាបាលជាសះស្បើយចំនួន៨១៨នាក់ ហើយកំពុងសម្រាកព្យាបាលនៅមន្ទីរពេទ្យមានចំនួន៦០៩នាក់ និងស្លាប់ម្នាក់ផងដែរ៕