របាយការណ៍អង្កេតមួយរបស់កម្មវិធីអភិវឌ្ឍន៍សហប្រជាជាតិ (UNDP) បានរកឃើញថា ប្រាក់ឈ្នួលរវាងស្ត្រីនិងបុរសនៅក្នុងប្រទេសកម្ពុជានៅតែមានគម្លាត ទោះបីជាស្ថិតនៅក្នុងការងារដូចគ្នាក្តី។
យោងតាមរបាយការណ៍អង្កេតរបស់អង្គការ UNDP ដែលបានលើកឡើងនៅក្នុងសេចក្តីប្រកាសព័ត៌មាននៅថ្ងៃទី១១ ខែមីនា ឆ្នាំ២០២១នេះ បានលើកឡើងថា តាមរយៈការប្រើប្រាស់ទិន្នន័យដែលបានមកពីការអង្កេតសេដ្ឋកិច្ច សង្គមកិច្ចកម្ពុជា (CSES) ឆ្នាំ២០១៤ ឆ្នាំ២០១៧ និងឆ្នាំ២០១៩ និងប្រើប្រាស់វិធីសាស្រ្តវិភាគ Oaxaca-Blinder បានរកឃើញថា ស្ត្រីកម្ពុជា ជាមធ្យមទទួលបានប្រាក់ឈ្នួលតិចជាងបុរសចំនួន ១៩% សម្រាប់ការងារដូចគ្នា។
បើតាមរបាយការណ៍នេះ មានកត្តាមួយចំនួនដែលមានឥទ្ធិពលលើគម្លាតប្រាក់ឈ្នួលរវាងស្ត្រីនិងបុរសនៅកម្ពុជា ក្នុងនោះ គម្លាតនៃការអប់រំរវាងស្ត្រីនិងបុរសចំនួន ៦% គម្លាតនៃបទពិសោធន៍ចំនួន ១៤% និងការធ្វើការងារដែលមានជំនាញទាបបានរួមចំណែកចំនួន ៤%។
របាយការណ៍ដដែលក៏បានរកឃើញដែរថា លក្ខណៈដែលមិនអាចអង្កេតវាស់វែងបាន បានរួមចំណែកដល់ទៅ ១០៥%។ លក្ខណៈទាំងនោះមានដូចជា ការរើសអើងក្នុងទីផ្សារការងារ ប៉ុន្តែក៏អាចកើតឡើងដោយសារកត្តាផ្សេងទៀត ដូចជា កង្វះជំនាញទន់ ឬគុណភាពនៃការអប់រំ ជាដើម ដែលពុំត្រូវបានបញ្ចូលទៅក្នុងការអង្កេតនេះឡើយ។
ដោយឡែក សម្រាប់លក្ខណៈប្រជាសាស្រ្តវិញ របាយការណ៍នេះថា ស្ថានភាពអាពាហ៍ពិពាហ៍ ត្រូវបានរកឃើញថា ជាកត្តាសំខាន់បំផុតដែលកំណត់ពីការងារទទួលបានប្រាក់កម្រៃរបស់ស្រ្តី ដែលវាធ្វើឱ្យលទ្ធភាពទទួលបានការងារធ្វើសម្រាប់ស្រ្តីដែលរៀបការហើយ ថយចុះ ៣៨%។ ដោយឡែក ការកើនឡើងនូវទំហំគ្រួសារ និងកម្រិតនៃការអប់រំរបស់មេគ្រួសារ បង្កើនលទ្ធភាពរបស់ស្រ្តីក្នុងការក្លាយជាអ្នកធ្វើការដែលទទួលបានប្រាក់កម្រៃទាប។
តំណាង UNDP ប្រចាំកម្ពុជា លោក Nick Beresford មានប្រសាសន៍ក្នុងរបាយការណ៍នោះថា នៅកម្ពុជា ស្ត្រីជាមធ្យមទទួលបានប្រាក់ឈ្នួលតិចជាងបុរសចំនួន ១៩% សម្រាប់ការងារដូចគ្នា ដែលបញ្ហានេះ ពាក់ព័ន្ធទៅនឹងសិទ្ធិរបស់ស្ត្រីក្នុងការទទួលបានភាពស្មើគ្នាជាមួយបុរស ប៉ុន្តែវាក៏ពាក់ព័ន្ធនឹងឱកាសក្នុងការបង្កើតនូវទីផ្សារការងារដែលកាន់តែមានប្រសិទ្ធភាពនិងប្រសិទ្ធផល។
លោកថា៖ «ប្រសិនបើយើងអាចធ្វើបាន យើងនឹងអាចបង្កើនភាពរុងរឿងសម្រាប់គ្រប់គ្នា ទាំងស្ត្រីនិងបុរស ទាំងកុមារីនិងកុមារា»។
បើតាមសេចក្តីប្រកាសព័ត៌មាននេះ UNDP បានអះអាងថា អង្គការនេះនឹងបន្តគាំទ្រដល់ការលើកកម្ពស់ស្រ្តីនៅកម្ពុជា ដូចជា តាមរយៈការគាំទ្រដល់ក្រសួងកិច្ចការនារី ក្នុងការពិនិត្យនិងរៀបចំផែនការយុទ្ធសាស្រ្តនារីរតនៈ និងគោលនយោបាយយេនឌ័ររបស់កម្ពុជា ជាដើម។ កម្មវិធីជាច្រើនរបស់ UNDP ក៏ផ្ដោតការយកចិត្តទុកដាក់លើការពង្រីកការចូលរួមរបស់ស្រ្តី ក្នុងសកម្មភាពសង្គម សេដ្ឋកិច្ច និងនយោបាយផងដែរ៕