មន្ត្រីជាន់ខ្ពស់ក្រសួងសុខាភិបាលស្នើដល់ប្រជាពលរដ្ឋដែលទៅចាក់វ៉ាក់សាំងកូវីដ-១៩ រក្សាគម្លាតសុវត្ថិភាព ដោយចៀសវាងទៅឈរប្រជ្រៀតគ្នានៅពេលរង់ចាំចាក់វ៉ាក់សាំង ដើម្បីបញ្ចៀសការចម្លងកាន់តែធ្ងន់ធ្ងរចូលទៅក្នុងសហគមន៍។
ការស្នើនេះបានធ្វើឡើងក្រោយពីមានការចែករំលែកនូវរូបថតមួយចំនួនពីទិដ្ឋភាពដែលមានប្រជាពលរដ្ឋយ៉ាងច្រើនកុះករ បាននាំគ្នាទៅឈរប្រជ្រៀតគ្នារង់ចាំចាក់វ៉ាក់សាំងនៅតាមមន្ទីរពេទ្យធំៗមួយចំនួនក្នុងរាជធានីភ្នំពេញ ចាប់តាំងពីថ្ងៃម្សិលមិញមកដល់ថ្ងៃព្រហស្បតិ៍នេះ។
ការសម្រុកទៅចាក់វ៉ាក់សាំងប្រជ្រៀតគ្នានេះ ធ្វើឡើងស្របពេលដែលកម្ពុជាកំពុងឆ្លងរីករាលដាលនៃជំងឺកូវីដ-១៩ ទាំងនៅរាជធានីភ្នំពេញ និងនៅតាមបណ្ដាខេត្តមួយចំនួនទៀតផងដែរ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់ វីអូឌី នៅថ្ងៃទី១០ ខែមីនា ឆ្នាំ២០២១នេះថា ពាក់ព័ន្ធនឹងការចាក់វ៉ាក់សាំងប្រឆាំងកូវីដ-១៩ ជូនប្រជាពលរដ្ឋនេះនៅតាមមន្ទីរពេទ្យនីមួយៗ បានរៀបចំរក្សាគម្លាតសុវត្ថិភាពដែរ ប៉ុន្តែគ្រូពេទ្យនិងសមត្ថកិច្ចនៅតែពិបាកគ្រប់គ្រង ដោយសារតែអ្នកទៅចាក់មានចំនួនច្រើន។
ករណីនេះ លោកស្រីបានបង្ហាញក្ដីបារម្ភខ្លាចមានការឆ្លងជំងឺកូវីដ-១៩ ក្នុងចំណោមប្រជាពលរដ្ឋទាំងនោះ ខណៈកម្ពុជាកំពុងផ្ទុះការឆ្លងរាលដាលនៃជំងឺនេះកាន់តែខ្លាំង។
លោកថា៖ «សុំអធ្យាស្រ័យ ដោយសារវ៉ាក់សាំងមានកម្រិត អ្នកដែលមិនស្ថិតនៅក្រុមមនុស្សដែលក្រសួងបានប្រកាសអញ្ជីញហ្នឹង សូមកុំមកមន្ទីរពេទ្យអី ពីព្រោះចៀសវាងការឆ្លងរោគ បើអត់កូវីដ ក៏វាឆ្លងរោគអីផ្សេងទៀតដែរ។ មន្ទីរពេទ្យជាកន្លែងមើលជំងឺ មិនមែនជាកន្លែងកម្សាន្តណា! អ៊ីចឹងខ្លាចមានការឆ្លងរោគ ជាពិសេសខ្លាចផ្ទុះការឆ្លងជំងឺកូវីដ-១៩។ អ៊ីចឹងបានសុំអង្វរដ៏ទទូចដល់បងប្អូនយើងទាំងអស់ សូមឱ្យគោរពមានសណ្ដាប់ធ្នាប់ ហើយគោរពតាមវិធានការសុខាភិបាលតាមការចាត់ចែងរបស់មន្ទីរពេទ្យ»។
លោកស្រីបន្តថា នៅរាជធានីភ្នំពេញបច្ចុប្បន្ន នៅសល់តែវ៉ាក់សាំងប្រភេទ អាស្ត្រាហ្ស៊ីណិកា (AstraZeneca) ដែលចាក់សម្រាប់មនុស្សអាយុ៦០ឆ្នាំឡើងតែប៉ុណ្ណោះ ដែលករណីនេះ លោកស្រីបានអំពាវនាវដល់ប្រជាពលរដ្ឋដែលមានអាយុក្រោម៦០ឆ្នាំ កុំអាលទៅចាក់វ៉ាក់សាំង ដើម្បីបញ្ចៀសការឆ្លងជំងឺកូវីដ-១៩។
ក្រសួងសុខាភិបាលក៏បានចេញសេចក្តីប្រកាសព័ត៌មានមួយនៅថ្ងៃនេះ ដោយសម្រេចផ្អាកការចាក់វ៉ាក់សាំងប្រឆាំងនឹងជំងឺកូវីដ-១៩ ប្រភេទ «ស៊ីណូហ្វាម» របស់ចិន ជាបណ្ដោះអាសន្នសិន ចាប់ពីថ្ងៃជូនដំណឹងនេះតទៅ ដោយសារវ៉ាក់សាំង ស៊ីណូហ្វាម ដែលនៅសេសសល់ ទុកសម្រាប់ចាក់ឱ្យអ្នកធ្លាប់ចាក់លើកទី១រួចហើយប៉ុណ្ណោះ។
ជាមួយគ្នានេះដែរ ក្រសួងក៏បានអំពាវនាវដល់ប្រជាពលរដ្ឋឱ្យឈប់ទៅឈរប្រជ្រៀតគ្នានៅមន្ទីរពេទ្យកុមារជាតិ មន្ទីរពេទ្យមិត្តភាពខ្មែរសូវៀត មន្ទីរពេទ្យព្រះអង្គឌួង និងមន្ទីរពេទ្យមិត្តភាពខ្មែរ ចិនព្រះកុសមៈ រួមទាំងនៅតាមបណ្ដាខេត្តផ្សេងៗទៀត ដើម្បីកុំឱ្យមានការកកស្ទះមនុស្សច្រើននៅកន្លែងចាក់ និងការពារការចម្លងវីរុសកូវីដ-១៩ផងដែរ។
ប្រធានមន្ទីរពេទ្យកុមារជាតិ រាជធានីភ្នំពេញ លោក ញឹម អង្គារបុស្ស ប្រាប់វីអូឌីថា ពលរដ្ឋជាច្រើនបាននាំគ្នាមកចាក់វ៉ាក់សាំងប្រឆាំងកូវីដ-១៩ ទាំងប្រភេទ ស៊ីណូហ្វាម (Sinopharm) និងអាស្ត្រាហ្ស៊ីណិកា (AstraZeneca) ដែលធ្វើឱ្យមន្ទីរពេទ្យនេះមានភាពចង្អៀតណែន ពិបាកក្នុងការគ្រប់គ្រង។
លោកថា៖ «គ្រូពេទ្យក៏រវល់ចាក់ផង និងរវល់រៀបចំ។ យើងសហការជាមួយរដ្ឋអំណាចជួយហើយ ប៉ុន្តែពេលខ្លះនៅមានការលំបាក ដូចខ្ញុំជម្រាបជូនអ៊ីចឹង ដូចវែកចកអ៊ីចឹង មានតែសំណូមពរឱ្យបងប្អូនយើងសហការ ព្រោះយើងមកចាក់វ៉ាក់សាំងការពារ តែ[ខ្លាច]វាមិនបានការពារ [បែរជា]វាបានជំងឺទៅវិញ ពេលយើងមក[ប្រជ្រៀតគ្នា]ហ្នឹង»។
អភិបាលរាជធានីភ្នំពេញ លោក ឃួង ស្រេង មានប្រសាសន៍ថា អាជ្ញាធរគ្រប់គ្រងតែនៅតាមមន្ទីរពេទ្យបង្អែកតែប៉ុណ្ណោះ ប៉ុន្តែសម្រាប់មន្ទីរពេទ្យជាតិ ក្រសួងជាអ្នករៀបចំនិងចាត់ចែង។
លោកថា៖ «ប៉ុន្តែខាងខ្ញុំធ្វើបានល្អណាស់ ខ្ញុំមានទាំងរោង មានទាំងកៅអី ដើម្បីឱ្យបងប្អូនប្រជាពលរដ្ឋយើងដែលទៅចាក់ហ្នឹង អាចឈប់ ឬចាក់ហើយ អាចមកសម្រាកតាមការណែនាំរបស់ក្រសួងសុខាភិបាល»។
គិតចាប់តាំងពីថ្ងៃទី២០ ខែកុម្ភៈ ដល់ថ្ងៃទី១១ ខែមីនា ឆ្នាំ២០២១ កម្ពុជារកឃើញអ្នកឆ្លងកូវីដ-១៩ ក្នុងព្រឹត្តិការណ៍សហគមន៍២០កុម្ភៈ ចំនួន៦៥២នាក់ ខណៈចំនួនអ្នកឆ្លងនៅទូទាំងប្រទេសសរុប១ ១៦៣នាក់ ក្នុងនោះមានអ្នកជាសះស្បើយ៥៩៧នាក់ និងអ្នកជំងឺ៥៦៥នាក់ កំពុងសម្រាកព្យាបាល៕