មន្ត្រីជាន់ខ្ពស់ក្រសួងមហាផ្ទៃ ជំរុញឱ្យអាជ្ញាធរខេត្តស្ទឹងត្រែង រិះរកវិធីលើកទឹកចិត្តស្ត្រីនគរបាលម្នាក់ដែលបំបៅដោះកូននៅពេលបំពេញបេសកកម្មតាមដងផ្លូវ ជាជាងកោះហៅស្ត្រីរូបនោះទៅធ្វើកិច្ចសន្យា ក្រោមហេតុផលថាប៉ះពាល់កិត្តិយសនគរបាលនិងស្ត្រីខ្មែរ។
ការស្នើនេះបានធ្វើឡើងតាមរយៈលិខិតមួយច្បាប់របស់លោកស្រី ជូ ប៊ុនអេង រដ្ឋលេខាធិការ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សនៃក្រសួងមហាផ្ទៃ ផ្ញើជូនអភិបាលខេត្តស្ទឹងត្រែង នៅថ្ងៃពុធនេះ។
លិខិតនោះបានធ្វើឡើងក្រោយពីមានការផ្សព្វផ្សាយព័ត៌មានពាក់ព័ន្ធនឹងអធិការស្រុកសៀមប៉ាង បានកោះហៅស្ត្រីនគរបាលផ្នែកចរាចរណ៍ម្នាក់ អ្នកស្រី ស៊ីថុង សុខា ដែលបំបៅដោះកូននៅតុការងារតាមផ្លូវ ដើម្បីទៅព្រមាននិងឱ្យធ្វើកិច្ចសន្យាបញ្ឈប់ការបំបៅដោះកូនបែបនេះទៀត។
លិខិតរបស់លោកស្រី ជូ ប៊ុនអេង បានបង្ហាញនូវការសោកស្ដាយដែលអធិការស្រុកសៀមប៉ាង បានធ្វើបែបនេះ ដោយមិនបានវែកញែកច្បាស់ពីកំហុសនិងគុណសម្បត្តិ។
លោកស្រីបន្តថា ក្នុងស្ថានភាពជាស្ត្រីដែលមានភារកិច្ចទទួលសុខត្រូវទ្វេដងលើសពីបុរស គឺបំពេញការងារស្នូលក្នុងអង្គភាពស្ថាប័នផង និងត្រូវចិញ្ចឹមបីបាច់កូនផង បើទោះជាបុរសជាស្វាមី ឬអ្នកដែលជាថ្នាក់ដឹកនាំមិនបានយកចិត្តទុកដាក់បង្កលក្ខណៈងាយស្រួលដល់រូបគាត់ក្នុងការថែទាំក៏ដោយ។
លោកស្រីបន្ថែមថា៖ «លោកអធិការគួរតែសម្ដែងនូវការកោតសរសើរ លើកទឹកចិត្ត និងរិះរកមធ្យោបាយ ឱ្យមន្ត្រីស្ត្រីបែបនេះទទួលបាននូវការយកចិត្តទុកដាក់ និងឱ្យគាត់មានឱកាសគ្រប់គ្រាន់ថែទាំកូន ដូចម្ដាយលោកថែទាំលោកកាលពីនៅទារក និងភរិយាលោកថែទាំកូនលោកដូចគ្នាដែរ។ គាត់មិនបានសម្តែងការបញ្ចេញភាពសិចស៊ី ដើម្បីថតបង្ហាញសាធារណជន ដើម្បីទាក់ទាញដូចអ្នករកស៊ីលក់ភាពសិចស៊ីដែលលោកត្រូវមានចំណាត់ការនោះទេ»។
លោកស្រី ជូ ប៊ុនអេង ក៏បានស្នើដល់អភិបាលខេត្ត ស្នងការ និងថ្នាក់ដឹកនាំខេត្តទាំងអស់ ពិនិត្យករណីនេះ និងរិះរកវិធីលើកទឹកចិត្តដល់ស្ត្រីនគរបាលមានឋានៈជាអនុសេនីយ៍ទោរូបនោះតាមដែលអាចធ្វើទៅបាន ដើម្បីកុំឱ្យមានការបាក់ទឹកចិត្ត ស្របពេលកម្ពុជាប្រារព្ធទិវាសិទ្ធិនារីអន្តរជាតិខួបទី១១០នេះផងដែរ។
ពាក់ព័ន្ធនឹងស្រ្តីនគរបាលដែលបំបៅកូន ហើយរងនូវការស្តីបន្ទោសពីថ្នាក់លើនេះដែរ អ្នកប្រើប្រាស់បណ្តាញសង្គមក៏ផ្ទុះការរិះគន់យ៉ាងច្រើនទៅលើចំណាត់ការរបស់អធិការស្រុកដែលតម្រូវឱ្យគាត់ធ្វើកិច្ចសន្យា។
អធិការនគរបាលស្រុកសៀមប៉ាង លោក ជឹម អេន មានប្រសាសន៍ថា ការដែលអាជ្ញាធរស្រុកតម្រូវឱ្យស្ត្រីនគរបាលរូបនោះធ្វើកិច្ចសន្យា គឺធ្វើឡើងគ្រាន់តែក្នុងន័យអប់រំឱ្យបំពេញការងារឱ្យបានល្អប៉ុណ្ណោះ និងមិនមានការដាក់ពិន័យណាមួយឡើយ។
លោកបន្តថា ការបំបៅដោះកូនជាកាតព្វកិច្ចរបស់ម្ដាយ ប៉ុន្តែការយករូបបង្ហោះក្នុងបណ្ដាញសង្គមក្នុងពេលបំពេញការងារគឺតម្រូវឱ្យការអនុញ្ញាតពីអង្គភាព។
លោកថា៖ «វាមិនមែនជាទណ្ឌកម្ម មិនមែនជាអីទេ វាគ្រាន់តែជាកិច្ចសន្យាផ្ទៃក្នុង ដើម្បីអប់រំពង្រឹងឱ្យរឹតតែបំពេញការងារល្អទៅទៀតអញ្ចឹង មិនមែនទៅកាត់ទោសរឿងបំបៅកូននោះទេ»។
ចំណែកស្នងការរងនៃស្នងការដ្ឋាននគរបាលខេត្តស្ទឹងត្រែង ទទួលបន្ទុកផ្នែកចរាចរណ៍ផ្លូវគោក លោក ហុង យូ មានប្រសាសន៍ថា ថ្នាក់លើគ្រាន់តែចង់ណែនាំស្ត្រីនគរបាលរូបនោះអំពីការបំបៅដោះកូន ដោយគួររកកន្លែងណាដែលសមរម្យ និងមិនសូវមានមនុស្សច្រើន។
លោកបន្តថា ការបង្ហោះរូបភាពនេះមិនបានបង្កឱ្យប៉ះពាល់ដល់កិត្តិយសរបស់នគរបាលនោះទេ គ្រាន់តែកន្លែងដែលបំបៅដោះនោះ អាជ្ញាធរកំពុងរឹងបន្តឹងច្បាប់ចរាចរណ៍ ហើយលោកក៏មិនចង់ឱ្យប្រជាពលរដ្ឋគិតថាយកស្រ្តីកូនខ្ចីមកធ្វើការប៉ុណ្ណោះ។
លោកថា៖ «ខ្ញុំក៏ប្រាប់គាត់ [ស្ត្រីនគរបាលបំបៅដោះកូន] ទៅ អូនហ្អា! កុំធ្វើអញ្ចឹង វាមិនល្អមើលទេ។ គាត់ថា ខ្ញុំខឹងប្ដីខ្ញុំ។ គាត់ផុសក្នុងបំណងថាឱ្យប្ដីមើលឃើញថា វាលំបាកអញ្ចឹងស្រ្តី»។
ស្របពេលដែលមានការស្នើឱ្យមានការលើកទឹកចិត្តដល់ស្ត្រីនគរបាលរូបនោះ អគ្គស្នងការនគរបាលជាតិ លោក នេត សាវឿន ក៏បានឧបត្ថម្ភថវិកាចំនួន ៥០០ ០០០រៀល រួមនឹងភេសជ្ជៈមួយចំនួនទៀតដល់ស្ត្រីនគរបាលដែលជាអធិការរងស្រុកសៀមប៉ាង ដែលបំបៅដោះកូនពេលកំពុងចុះអនុវត្តរឹតបន្តឹងច្បាប់ចរាចរណ៍ផ្លូវគោកនោះ។
វីអូឌី ពុំអាចសុំការអត្ថាធិប្បាយជុំវិញករណីនេះ ពីអ្នកនាំពាក្យក្រសួងកិច្ចការនារី លោកស្រី ម៉ាន ចិន្តា បានទេនៅថ្ងៃពុធនេះ។
ប៉ុន្តែក្នុងទំព័រហ្វេសប៊ុករបស់ខ្លួននៅថ្ងៃនេះ ក្រសួងកិច្ចការនារី បានចែករំលែកសារពីសារៈសំខាន់នៃការបំបៅដោះកូន ហើយជំរុញឱ្យភាគីពាក់ព័ន្ធទាំងអស់ចូលរួមបង្កើតបរិយាកាសសម្រាប់ស្រ្តីធ្វើកិច្ចការនេះ ដោយសារទឹកដោះម្តាយមានប្រយោជន៍ចំពោះការអភិវឌ្ឍរាងកាយ និងខួរក្បាលកុមារ។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មានប្រសាសន៍ថា ការបំបៅដោះកូនគួរត្រូវបានលើកទឹកចិត្ត ស្របពេលដែលក្រសួងនិងស្ថាប័នជាច្រើនបានធ្វើការផ្សព្វផ្សាយចង់ឱ្យពលរដ្ឋបំបៅកូនដោយទឹកដោះម្តាយតែមួយគត់។
មួយវិញទៀត លោកស្រីថា តាមច្បាប់និងទំនួលខុសត្រូវរបស់ស្ថាប័ន អង្គភាពទាំងឡាយគួរបង្កបរិយាកាសអំណោយផលដល់សហការី ជាពិសេសសម្រាប់ស្ត្រីជាម្តាយ និងគួរពិចារណារកកន្លែងសម្រាប់កុមារនៅស្ថាប័ន និងការអនុញ្ញាតឱ្យក្រុមការងារអាចយកកូនតូចៗមកកន្លែងធ្វើការជាមួយបាន។
លោកស្រី ចក់ សុភាព មានប្រសាសន៍ថា៖ «សារៈសំខាន់នៃមាតាដែលគាត់ត្រូវចិញ្ចឹមកូន ហើយការចិញ្ចឹមកូន បំបៅកូនក្នុងម៉ោងការងារនេះ គឺត្រូវបានគាំពារនៅក្នុងច្បាប់ទៀត អញ្ចឹងខ្ញុំមិនដឹងថាគាត់យកច្បាប់អីមកក្នុងការអះអាង»។
លោកស្រីបន្ថែមថា៖ «នៅពេលដែលស្រ្តីបំបៅកូន ហើយត្រូវបានថ្នាក់លើរបស់គាត់ថាជាទង្វើមិនសមរម្យ ហើយត្រូវធ្វើកិច្ចសន្យា ដោយអះអាងថានឹងមិនធ្វើទង្វើបែបនេះទៀត ខ្ញុំអត់យល់ថាតើអង្គភាពនោះគាត់កំពុងតែគិតយ៉ាងមិច»។
មន្ត្រីសិទ្ធិមនុស្សរូបនេះក៏បានជំរុញមន្ត្រីពាក់ព័ន្ធដែលបានដាក់បន្ទុកឱ្យស្ត្រីនគរបាលដែលបំបៅដោះកូនធ្វើការសុំទោសនិងចុះកិច្ចសន្យានោះ ត្រូវតែសុំទោសស្ត្រីរូបនោះជាសាធារណៈវិញ និងបង្ហាញពីវិធានការគាំពារស្ត្រី ដេីម្បីឆ្លេីយតបគោលដៅសមភាពយេនឌ័រដែលរដ្ឋាភិបាលបានដាក់ចេញ៕