មេដឹកនាំអតីតគណបក្សប្រឆាំង លោក សម រង្ស៊ី បាននិយាយថា ទោសសរុប៤៧ឆ្នាំដែលតុលាការកម្ពុជាបានចោទប្រកាន់និងផ្តន្ទាទោសទៅលើរូបលោក អាចជាកំហុសមកពីលោកជួយការពារជនរងគ្រោះរាប់លាននាក់ដែលគ្មានសំឡេងប្រឆាំងនឹងភាពអយុត្តិធម៌។
ការលើកឡើងរបស់លោក សម រង្ស៊ី ធ្វើឡើងតាមរយៈសារបង្ហោះលើបណ្តាញសង្គមហ្វេសប៊ុកផ្លូវការរបស់លោក កាលពីថ្ងៃអង្គារម្សិលមិញ។ លោកនិយាយថា ២០ឆ្នាំមកនេះ លោកត្រូវបានតុលាការកម្ពុជាផ្តន្ទាទោសឱ្យជាប់ពន្ធនាគារ៤៧ឆ្នាំ នេះបើតាមការបូកសរុបសាលក្រមទាំងអស់ ដែលលោកបានទទួល។
លោក សម រង្ស៊ី និយាយទៀតថា ក្នុងឋានៈជាមេដឹកនាំអតីតគណបក្សប្រឆាំងនៅកម្ពុជា លោកត្រូវគេទទួលស្គាល់គ្រប់គ្នាថា មិនដែលបៀតបៀនបុគ្គលណាម្នាក់ មិនដែលលួចនរណា សូម្បីតែមួយរៀល រួមទាំងទ្រព្យសម្បត្តិជាតិ។
លោកថា៖ «ទោសកំហុសរបស់ខ្ញុំ គឺគ្រាន់តែបានផ្តល់សំឡេងរបស់ខ្ញុំ ដើម្បីជួយការពារជនរងគ្រោះរាប់លាននាក់ដែលគ្មានសំឡេង ក្នុងការប្រឆាំងភាពអយុត្តិធម៌ ដែលមានគ្រប់ទីកន្លែង ក្រោមរបបមួយដ៏ពុករលួយ ផ្តាច់ការ ឃោរឃៅ និងអមនុស្សធម៌»។
ការលើកឡើងរបស់លោក សម រង្ស៊ី បែបនេះ បានធ្វើឡើងបន្ទាប់ពីសហគមន៍អន្តរជាតិ មានសហភាពអឺរ៉ុប សហរដ្ឋអាមេរិក និងគណៈកម្មាធិការសិទ្ធិមនុស្សសហភាពអន្តរសភា (IPU) ដែលមានសមាជិក ១៧៤ប្រទេស រិះគន់សាលក្រម ចុះថ្ងៃទី១ ខែមីនា របស់សាលាដំបូងរាជធានីភ្នំពេញ ដែលសម្រេចផ្តន្ទាទោសលោក សម រង្ស៊ី និងថ្នាក់ដឹកនាំ៨រូបទៀត ឱ្យជាប់ពន្ធនាគារម្នាក់ចម្លោះពី២០ទៅ២៥ឆ្នាំ រួមទាំងដកសិទ្ធិធ្វើនយោបាយ ក្រោមការចោទពីបទ «ឧបឃាត» ឬ «ប៉ុនប៉ងផ្តួលរំលំរដ្ឋាភិបាលកម្ពុជា» តាមរយៈផែនការមាតុភូមិនិវត្តន៍មិនបានសម្រេចកាលពីថ្ងៃទី៩ ខែវិច្ឆិកា ឆ្នាំ២០១៩។
សហគមន៍អន្តរជាតិតាមរយៈសេចក្តីថ្លែងការណ៍ បានចាត់ទុកការផ្តន្ទាទោសនោះថា ជាការកាត់ទោសដ៏គួរឱ្យរន្ធត់ចិត្ត និងធ្វើឡើងដោយមិនមានភស្តុតាងគួរឱ្យជឿទុកចិត្ត ដែលទាមទារឱ្យរដ្ឋាភិបាលកម្ពុជាចាប់ផ្តើមដំណើរការផ្សះផ្សាជាតិឡើងវិញ តាមរយៈការសន្ទនាស្មោះត្រង់ដោយមានការចូលរួមពីគ្រប់ភាគី។
ប្រធានក្រុមអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានច្រានចោលការលើកឡើងរបស់លោក សម រង្ស៊ី ដោយថា សារនេះគ្មានតម្លៃសម្រាប់រដ្ឋាភិបាលក្នុងការឆ្លើយតបទេ។
លោកថា៖ «គាត់ [លោក សម រង្ស៊ី] ប្រឆាំង មិនមែនក្នុងន័យនយោបាយទេ។ គាត់ជាឧទ្ទាមអ្នកផ្តួលរំលំធ្វើរដ្ឋប្រហារ មិនគោរពប្រជាធិបតេយ្យ គាត់គ្មានតម្លៃសម្រាប់ខ្ញុំឆ្លើយឆ្លង»។
អ្នកនាំពាក្យក្រសួងយុត្តិធម៌ លោក ជិន ម៉ាលីន ក៏បានច្រានចោលដូចគ្នា និងបានចាត់ទុកការលើកឡើងរបស់លោក សម រង្ស៊ី ថាជាការព្យាយាមបិទបាំងកំហុស ដើម្បីគេចចេញពីការទទួលខុសត្រូវចំពោះមុខច្បាប់នៅកម្ពុជា។
លោកថា៖ «ទម្លាប់របស់គាត់ [សម រង្ស៊ី ] គេដឹងគ្រប់គ្នាអស់ទៅហើយថា [គាត់] ជាអ្នកនយោបាយមួយដែលមិនញញើតទៅនឹងការបំពានច្បាប់នៅកម្ពុជាទេ សូម្បីតែព្រះមហាក្សត្រក៏ខ្លួនហ៊ានប្រមាថដោយចំហផងដែរនោះ»។
នាយកវិទ្យាស្ថានប្រជាធិបតេយ្យកម្ពុជា លោក ប៉ា ចន្ទរឿន មានប្រសាសន៍ថា សារនយោបាយរបស់គណបក្សទាំងពីរ បង្ហាញពីការប្រកួតអំណាចនៅកម្ពុជា បន្តដើរលើទម្រង់យកគ្នាជាសត្រូវ ដែលទម្រង់នេះនឹងជំរុញឱ្យជម្លោះនយោបាយកាន់តែអូសបន្លាយទៅមុខទៀត។
លោកថា៖ «បើសិនជារដ្ឋាភិបាលនិងបក្សកាន់អំណាចមើលឃើញថា មានតែការប្រើប្រាស់ការកៀបសង្កត់ ដើម្បីទប់ស្កាត់កុំឱ្យមានចលនានិងចលនាកើតឡើងរបស់អ្នកគាំទ្ររបស់អតីតគណបក្សសង្គ្រោះជាតិនេះ វានឹងឃើញមានការចាប់ចងក្នុងទម្រង់នៃអំពើហិង្សាខ្លះកើតឡើងនៅពេលប៉ុន្មានខែខាងមុខនេះ»។
អតីតគណបក្សសង្គ្រោះជាតិ ត្រូវបានរំលាយចេញពីឆាកនយោបាយក្រោមសាលដីកាតុលាការកំពូល កាលពីថ្ងៃទី១៦ ខែវិច្ឆិកា ឆ្នាំ២០១៧ ដែលមុនការរំលាយ អតីតគណបក្សប្រឆាំងនេះ ទទួលបានសំឡេងឆ្នោតជាង៣លានសំឡេង ស្មើនឹងជាង៤៣ភាគរយ មានអាសនៈឃុំ-សង្កាត់ចំនួន៥ ០០៧ និងតំណែងប្រធានក្រុមប្រឹក្សាចំនួន៤៨៩នាក់៕