លោកនាយករដ្ឋមន្ត្រី ហ៊ុន សែន ជំរុញឱ្យក្រសួងពាក់ព័ន្ធ និងដៃគូអភិវឌ្ឍន៍ បន្តការពារសិទ្ធិស្ត្រី ដើម្បីឱ្យពួកគេអាចសម្រេចចិត្តនៅគ្រប់កម្រិត រួមទាំងក្នុងវិស័យនយោបាយ ខណៈលោកលើកឡើងថា ស្រ្តីមានចំនួនកាន់តែច្រើនបានក្លាយជាអ្នកដឹកនាំ។
តាមរយៈសារលិខិតអបអរខួបទី១១០ នៃទិវាអន្តរជាតិ ៨មីនា ឆ្នាំ២០២១ លោកនាយករដ្ឋមន្ត្រី ហ៊ុន សែន បានលើកឡើងថា ជានិច្ចកាល រដ្ឋាភិបាលបានយកចិត្តទុកដាក់ក្នុងការបង្កើនសមាមាត្រស្ត្រីក្នុងស្ថាប័នសាធារណៈ ដើម្បីឱ្យស្ត្រីបានចូលរួមកាន់តែច្រើនឡើងក្នុងការដឹកនាំនិងធ្វើសេចក្តីសម្រេចចិត្ត ទាំងនៅថ្នាក់ជាតិនិងថ្នាក់ក្រោមជាតិ ដែលធ្វើឱ្យចំនួនស្ត្រីនៅក្នុងស្ថាប័ននីតិបញ្ញត្តិ មានការកើនឡើងគួរឱ្យកត់សម្គាល់ពីមួយអាណត្តិទៅមួយអាណត្តិ។
លោកបន្តថា ក្នុងស្ថាប័ននីតិប្រតិបត្តិ ស្ត្រីដែលមានមុខតំណែងជាឧបនាយករដ្ឋមន្ត្រី រដ្ឋមន្ត្រី រដ្ឋលេខាធិការ និងអនុរដ្ឋលេខាធិការ មានការកើនឡើង និងក្នុងវិស័យសាធារណៈ ចំនួនមន្ត្រីរាជការជាស្ត្រី ក៏បានកើនឡើង ៣២ភាគរយ នៅឆ្នាំ២០០៧ ដល់ ៤១ភាគរយ នៅឆ្នាំ២០២០ផងដែរ។
លោកនាយករដ្ឋមន្ត្រី បញ្ជាក់ថា នៅថ្នាក់ក្រោមជាតិ មានស្ត្រីជាអភិបាលខេត្ត ២រូប ស្ត្រីជាអភិបាលក្រុង-ស្រុក-ខណ្ឌ ៦រូប និងស្ត្រីជាមេឃុំ-ចៅសង្កាត់ កើនឡើងពី ៤២រូប នៅឆ្នាំ២០០២ ទៅ ១៣០រូប នៅឆ្នាំ២០១៧ ហើយថា ចាប់ពីឆ្នាំ២០០៦ ស្ត្រីក្នុងកងកម្លាំងបេសកកម្មរក្សាសន្តិភាពសហប្រជាជាតិ មានចំនួន ៣៨៧នាក់ ក្នុងចំណោមកងកម្លាំងសរុប ៧ ០៤០នាក់។
ករណីនេះ លោកគូសបញ្ជាក់ថា ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាព និងមិនទុកនរណាម្នាក់ឱ្យនៅឯកា រដ្ឋាភិបាលបានស្នើគ្រប់ក្រសួងស្ថាប័នពាក់ព័ន្ធ ដៃគូអភិវឌ្ឍន៍ សង្គមស៊ីវិល និងវិស័យឯកជន ព្រមទាំងប្រជាពលរដ្ឋគ្រប់រូប រួមគ្នាផ្តោតការយកចិត្តទុកដាក់ទៅលើចំណុចអាទិភាព៧ចំណុច។
ចំណុចអាទិភាពទាំង៧នោះ រួមមានទាំងការបន្តពង្រឹងវិសាលភាពនៃប្រព័ន្ធគ្រប់គ្រងគាំពារសង្គម អភិវឌ្ឍន៍ធនធានមនុស្ស សម្រាប់ស្ត្រី និងកុមារី «បន្តធានាការការពារសិទ្ធិ ដោយស្មើភាពដល់ស្ត្រី ដើម្បីឱ្យស្រ្តីអាចធ្វើសេចក្តីសម្រេចចិត្តគ្រប់កម្រិត ជួយដោះស្រាយរាល់ឧបសគ្គនានា ដែលរើសអើងចំពោះស្ត្រី ក្នុងការចូលរួមធ្វើសេចក្តីសម្រេចនៅក្នុងស្ថាប័នសាធារណៈ នៅគ្រប់កម្រិត និងក្នុងវិស័យនយោបាយ» ជាដើម៕
