ក្រសួងសុខាភិបាលប្រកាសរកឃើញអ្នកឆ្លងកូវីដ១៩ ចំនួន៤៩នាក់បន្ថែមទៀត ហើយស្របពេលគ្នានេះ តារាចម្រៀងប្រចាំផលិតកម្មហង្សមាសម្នាក់បានប្រកាសនៅថ្ងៃនេះថា ខ្លួនបានឆ្លងជំងឺកូវីដ១៩ នេះដែរ។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី៩ ខែមីនា ឆ្នាំ២០២១ ថា ក្នុងចំណោមអ្នកឆ្លងជំងឺកូវីដ១៩ ទាំង៤៩នាក់នោះ មានជនជាតិចិន ២៨នាក់ ជនជាតិខ្មែរ ២០នាក់ និងជនជាតិឥណ្ឌូនេស៊ីម្នាក់ ស្របពេលអ្នកឆ្លងម្នាក់ទៀតជាបុរសជនជាតិលីប៊ី ធ្វើដំណើរមកពីប្រទេសលីប៊ី មកដល់កម្ពុជា នៅថ្ងៃទី០៧ ខែមីនា ឆ្នាំ២០២១។
បើតាមក្រសួងសុខាភិបាល ក្នុងចំណោមអ្នកឆ្លងជនជាតិខ្មែរទាំង២០នាក់ ក៏មានពិធីការិនីប្រចាំទូរទស្សន៍ហង្សមាសមួយរូបឈ្មោះ កែវ ច័ន្ទនិមល រួមនឹងសមាជិកគ្រួសារ២នាក់ទៀតក៏បានឆ្លងជំងឺនេះដែរ។
ដោយឡែក អ្នកចម្រៀងម្នាក់ប្រចាំនៅផលិតកម្មហង្សមាស លោក ណុប បាយ៉ារិទ្ធ បានប្រកាសនៅលើបណ្តាញសង្គមហ្វេសប៊ុកនៅថ្ងៃអង្គារនេះថា លទ្ធផលសំណាករបស់លោកបានទទួលលទ្ធផលវិជ្ជមានវីរុសកូវីដ១៩។
ចំណែកនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានអំពាវនាវដល់អ្នកពាក់ព័ន្ធនឹងតារាចម្រៀង លោក ណុប បាយ៉ារិទ្ធ ត្រូវទៅធ្វើតេស្តនៅក្រុមហ៊ុនហង្សមាស មណ្ឌលសុខភាពចាក់អង្រែក្រោម មន្ទីរពេទ្យខ្មែរសូវៀត និងមន្ទីរពេទ្យបង្អែកនៅតាមបណ្តាខេត្តនានា។
យោងតាមរបាយការណ៍ពីក្រសួងសុខាភិបាល ចាប់តាំងពីមានការផ្ទុះឡើងនូវការឆ្លងជំងឺកូវីដ១៩ ក្នុងព្រឹត្តិការណ៍«សហគមន៍២០កុម្ភៈ»មក អ្នកឆ្លងជំងឺនេះបានកើនដល់៥៤៩នាក់ហើយ ដែលអ្នកទាំងនោះមានអាសយដ្ឋាននៅរាជធានីភ្នំពេញ ខេត្តព្រះសីហនុ ព្រៃវែង កំពង់ធំ និងខេត្តកណ្តាល ជាដើម។
ដោយឡែក គិតត្រឹមព្រឹកថ្ងៃទី០៩ ខែមីនា ឆ្នាំ២០២១នេះ ក្រសួងថា កម្ពុជារកឃើញអ្នកឆ្លងកូវីដ១៩ សរុបចំនួន ១ ០៦០ នាក់ ក្នុងនោះ អ្នកជាសះស្បើយចំនួន ៥៣៨នាក់ និងអ្នកជំងឺសម្រាកព្យាបាលចំនួន ៥២២នាក់៕