សមាគមសម្ព័ន្ធអ្នកសារព័ត៌មានកម្ពុជា (ខេមបូចា) អំពាវនាវឱ្យអាជ្ញាធរអនុញ្ញាតឱ្យអ្នកកាសែតអាចចូលយកព័ត៌មានក្នុងកម្មវិធីនានា ជាពិសេសកម្មវិធីដែលមាននាយករដ្ឋមន្ត្រីចូលរួម ដោយមិនត្រូវរើសអើងស្ថាប័នណាមួយឡើយ ដើម្បីឱ្យពួកគេមានឱកាសស្មើគ្នាក្នុងការផ្សព្វផ្សាយព័ត៌មានពិតជូនដល់ប្រជាពលរដ្ឋ។
ការស្នើនេះធ្វើឡើងបន្ទាប់ពីអ្នកសារព័ត៌មានមួយចំនួនមិនត្រូវបានអនុញ្ញាតឱ្យចូលទៅថតរូប និងយកព័ត៌មានក្នុងកម្មវិធីចាក់វ៉ាក់សាំងការពារជំងឺកូវីដ១៩ ឈ្មោះ«អាស្ត្រាហ្សេនីកា (Astra Zeneca)» នៅមន្ទីរពេទ្យកាល់ម៉ែត ដែលកម្មវិធីនោះមានលោកនាយករដ្ឋមន្ត្រី ហ៊ុន សែន និងភរិយារបស់លោក ព្រមទាំងមន្ត្រីជាន់ខ្ពស់រដ្ឋាភិបាលជាច្រើនរូបទៀតចូលរួម។
តាមសេចក្តីថ្លែងការណ៍របស់ខេមបូចា អ្នកសារព័ត៌មាននិងអ្នកថតរូបដែលមិនត្រូវបានអនុញ្ញាតឱ្យចូលក្នុងកម្មវិធីកាលពីម្សិលមិញ មកពីវិទ្យុសំឡេងសហរដ្ឋអាមេរិក (VOA) ទីភ្នាក់ងារព័ត៌មានរ៉យទ័រ (Reuters) ទីភ្នាក់ងារសារព័ត៌មានអេភី (AP) សារព័ត៌មានវីអូឌី (VOD) សារព័ត៌មានថ្មីៗ និងខេមបូចាញូស៍។
សមាគមនេះបន្តថា ផ្ទុយទៅវិញ មានតែអ្នកសារព័ត៌មានមកពីស្ថាប័នរដ្ឋ និងស្និទ្ធនឹងរដ្ឋាភិបាលចំនួន៤ប៉ុណ្ណោះដែលត្រូវបានអនុញ្ញាតឱ្យចូលយកព័ត៌មាន ក្នុងនោះមាន សារព័ត៌មាន Fresh News ទូរទស្សន៍ជាតិកម្ពុជា ទូរទស្សន៍បាយ័ន និងទូរទស្សន៍ CNC ។
ខេមបូចា គូសបញ្ជាក់ថា៖ «ការណ៍នេះធ្វើឱ្យប៉ះពាល់ដល់សិទ្ធិក្នុងការទទួលបានព័ត៌មានរបស់អ្នកសារព័ត៌មាន ដូចមានចែងក្នុងមាត្រា៤១នៃច្បាប់រដ្ឋធម្មនុញ្ញ និងមាត្រា៥នៃច្បាប់ស្តីពីរបបសារព័ត៌មាន ព្រមទាំងបង្ហាញអំពីវិសមភាព[ភាពមិនស្មើគ្នា]រវាងអ្នកសារព័ត៌មានមកពីស្ថាប័នផ្សេងៗទៀត»។
ខេមបូចា ទទូចដល់រដ្ឋាភិបាលឱ្យធានាសេរីភាពនិងសិទ្ធិទទួលបានព័ត៌មានរបស់អ្នកសារព័ត៌មានទាំងអស់ ដោយមិនរើសអើង ដើម្បីឱ្យពួកគេអាចផ្សព្វផ្សាយព័ត៌មានស្តីពីវ៉ាក់សាំងការពារជំងឺកូវីដ១៩ ដោយសេរីនិងស្មើភាពគ្នា។
ប្រធានក្រុមអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ប្រាប់ថា កម្មវិធីនាយករដ្ឋមន្ត្រីមិនអាចគ្រប់គ្នាចូលបាននោះទេ ព្រោះអ្នករៀបចំកម្មវិធីមានការទទួលខុសត្រូវការពារសន្តិសុខនិងការពារសុវត្ថិភាពជូនថ្នាក់ដឹកនាំ។
លោកបន្តថា អ្នកសារព័ត៌មានដែលអាចចូលថតឬរាយការណ៍ព័ត៌មានក្នុងកម្មវិធីនោះបាន ទាល់តែមានការអនុញ្ញាតពីអ្នករៀបចំកម្មវិធីរបស់នាយករដ្ឋមន្ត្រី ឬមានកាតសម្គាល់ពីការអនុញ្ញាតឱ្យចូលរួមកម្មវិធីនាយករដ្ឋមន្ត្រី។
លោកថា៖ «ដោយសារគាត់អត់យល់ពីបំណងរបស់រាជរដ្ឋាភិបាលក្នុងការថែរក្សាសុវត្ថិភាពសណ្តាប់ធ្នាប់ ដូចអ្នកសារព័ត៌មានប៉ុន្មាននាក់ដែលគេឱ្យចូលហ្នឹងសុទ្ធតែមានកាត។ អ៊ីចឹងបានថាយើងមិនធ្វើអាក្រក់ពេកទេ ក៏ប៉ុន្តែយើងសាកល្បងសុំគេទៅ ដើម្បីបានផ្លាកមួយដែលគេអនុញ្ញាតទៅតាមសម្តេច [នាយករដ្ឋមន្ត្រី]»។
អ្នកយកព័ត៌មានឱ្យកាសែតបរទេសមួយត្រូវបានហាមឃាត់ដែរនោះគឺលោក អូន ឆេងប៉រ និយាយថា ការដែលអ្នកសារព័ត៌មានមួយក្រុមមានឱកាសចោទសួរប្រភពធំជាងគេក្នុងប្រទេស ហើយមួយក្រុមទៀតត្រូវបានរារាំង វាហាក់បង្ហាញពីភាពលម្អៀង។ លោកថា ភាពលម្អៀងនេះនឹងធ្វើឱ្យមេដឹកនាំកំពូលបន្តបាត់ឱកាសបកស្រាយដល់សាធារណជននូវបញ្ហាសង្គមមួយចំនួន ដែលកំពុងកើតឡើង។
លោកថា៖ «ពេលដែលយើងនៅជិតប្រភពអ៊ីចឹង ខ្ញុំគិតថា មានសារៈប្រយោជន៍ខ្លាំងក្នុងការចោទជាសំណួរដែលត្រូវសួរ ហើយជាសំណួរដែលមានប្រយោជន៍សម្រាប់សាធារណជន និងសេចក្តីរាយការណ៍របស់យើង អ៊ីចឹងខ្ញុំគិតថា នៅពេលដែលមានអ្នកបានចូល ហើយអ្នកដែលមិនបានចូល វាជារឿងអយុត្តិធម៌ ហើយជាការរើសអើង»។
លោកនិយាយទៀតថា ករណីនេះគួរតែមានការបកស្រាយពន្យល់ពីស្ថាប័នពាក់ព័ន្ធ ដើម្បីឱ្យអ្នកសារព័ត៌មានមានឱកាសស្មើគ្នាក្នុងការប្រកួតប្រជែង។
វីអូឌី មិនអាចសុំការបញ្ជាក់ជុំវិញករណីនេះពីអ្នកនាំពាក្យក្រសួងព័ត៌មាន លោក មាស សុភ័ណ្ឌ បានទេ។
ប្រធានក្លឹបអ្នកកាសែតកម្ពុជា លោក ប៉ែន បូណា មានប្រសាសន៍ថា ការរារាំងនោះមិនប៉ះពាល់ដល់សិទ្ធិទទួលបានព័ត៌មានទេ ដោយថា សន្និសីទសារព័ត៌មានរបស់នាយករដ្ឋមន្ត្រីត្រូវបានសារព័ត៌មានច្រើនលើសលុបបានដកស្រង់សម្តីមកចុះផ្សាយ។
លោកាថា៖ «ធម្មតា អ្នកខ្លះចង់សួរតែមិនបានសួរ វាអាចលើកឡើងអ៊ីចឹងបានហើយ។ ប៉ុន្តែគ្រាន់ថាព័ត៌មានជាទូទៅហ្នឹងសុទ្ធតែទទួលបានយ៉ាងទូលំទូលាយដូចតែគ្នាហ្នឹង សុទ្ធតែអាចផ្សាយបានទាំងអស់គ្រប់ប្រព័ន្ធ មិនថាអនឡាញ វិទ្យុ ឬទូរទស្សន៍ទេ នូវអ្វីដែលសម្តេចនាយករដ្ឋមន្ត្រីគាត់មានប្រសាសន៍»។
កាលពីខែមេសា ឆ្នាំមុន អង្គការអ្នកសារព័ត៌មានគ្មានព្រំដែន បានចេញរបាយការណ៍វាយតម្លៃសេរីភាពសារព័ត៌មានប្រចាំឆ្នាំ២០២០ ដោយដាក់ពិន្ទុកម្ពុជាជាប់ចំណាត់ថ្នាក់ទី១៤៤ ក្នុងចំណោម១៨០ប្រទេសនៅលើពិភពលោក។ របាយការណ៍នោះបន្តថា តាមចំណាត់ថ្នាក់នេះ កម្ពុជាបានធ្លាក់ចុះជាបន្តបន្ទាប់ចាប់តាំងពីឆ្នាំ២០១៨ ដែលជាឆ្នាំនៃការបង្ក្រាបយ៉ាងខ្លាំងមួយពីសំណាក់រដ្ឋាភិបាលកម្ពុជា ទៅលើសារព័ត៌មានឯករាជ្យដែលមិនចំណុះឱ្យខ្លួន៕