ក្រសួងសុខាភិបាល នៅថ្ងៃនេះ ប្រកាសរកឃើញអ្នកឆ្លងកូវីដ១៩ លើមនុស្សចំនួន៣១នាក់បន្ថែមទៀត ខណៈអ្នកជាសះស្បើយក្នុងសហគមន៍នៃព្រឹត្តិការណ៍២០កុម្ភៈ មានចំនួន២នាក់។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី០៤ ខែមីនា ឆ្នាំ២០២១ ឱ្យដឹងថា ក្នុងចំណោមអ្នកឆ្លងជំងឺកូវីដ១៩ ទាំង៣១នាក់នោះ មានអ្នកឆ្លងក្នុងព្រឹត្តិការណ៍សហគមន៍២០កុម្ភៈ ចំនួន២៨នាក់ និងអ្នកដំណើរមកពីក្រៅប្រទេសចំនួន៣នាក់។
ក្រសួងបន្តថា អ្នកឆ្លងកូវីដ១៩ក្នុងព្រឹត្តិការណ៍សហគមន៍ទាំង២៨នាក់ ត្រូវបានរកឃើញនៅខេត្តព្រះសីហនុ និងរាជធានីភ្នំពេញ ក្នុងនោះមានជនជាតិចិន១៧នាក់ ជនជាតិខ្មែរ១០នាក់ និងជនជាតិវៀតណាមម្នាក់។
ចំណែកអ្នកឆ្លងកូវីដ៣នាក់ទៀតដែលជាករណីនាំចូលនោះ ក្រសួងថា ជាជនជាតិឥណ្ឌូនេស៊ី ធ្វើដំណើរមកពីប្រទេសឥណ្ឌូនេស៊ី មកដល់កម្ពុជា នៅថ្ងៃទី០២ ខែមីនា ឆ្នាំ២០២១។
ក្រសួងសុខាភិបាលបានបន្ថែមថា ក្រៅពីមានអ្នកឆ្លង ក៏មានអ្នកជាសះស្បើយពីជំងឺកូវីដ១៩ក្នុងព្រឹត្តិការណ៍សហគមន៍២០កុម្ភៈ ចំនួន២នាក់ផងដែរ។
គិតត្រឹមព្រឹកថ្ងៃទី០៤ ខែមីនា ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន៩០៩នាក់ ក្នុងនោះ អ្នកជាសះស្បើយចំនួន៤៨៤នាក់ និងកំពុងសម្រាកព្យាបាលចំនួន៤២៥នាក់៕
