អភិបាលខេត្តព្រះសីហនុ ណែនាំដល់ប្រជាពលរដ្ឋដែលកំពុងស្នាក់នៅក្នុងខេត្តនេះ ផ្អាកការធ្វើដំណើរទៅកាន់រាជធានីនិងខេត្តផ្សេងទៀត និងផ្អាកការធ្វើអាជីវកម្មដឹកអ្នកដំណើរតាមរថយន្តគ្រប់ប្រភេទចេញ-ចូលខេត្តនេះមួយរយៈ ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩។
ការណែនាំនេះបានធ្វើឡើងក្រោយពីលោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញ បានបញ្ជាឱ្យអាជ្ញាធរខេត្តផ្អាកនិងបិទការធ្វើចរាចរណ៍ចេញចូលក្នុងខេត្តព្រះសីហនុ ដោយលោកចាត់ទុកថា ស្ថានភាពនៃការឆ្លងរាលដាលមេរោគកូវីដ១៩នៅទីនោះស្ថិតនៅក្នុងស្ថានភាពអាក្រក់។
ក្នុងសេចក្ដីជូនដំណឹងចុះថ្ងៃទី០៤ ខែមីនា ឆ្នាំ២០២១នេះ រដ្ឋបាលខេត្តព្រះសីហនុបានតម្រូវឱ្យម្ចាស់ក្រុមហ៊ុនរថយន្តដឹកអ្នកដំណើរ អ្នកបើករថយន្តឈ្នួល អ្នកបើករថយន្តតាក់ស៊ី និងប្រជាពលរដ្ឋដែលស្នាក់នៅក្នុងខេត្តនេះ អនុវត្តនូវការណែនាំមួយចំនួនរបស់អាជ្ញាធរខេត្ត ដើម្បីទប់ស្កាត់ការឆ្លងរាលដាលនៃជំងឺកូវីដ១៩ក្នុងសហគមន៍។
ការណែនាំរដ្ឋបាលខេត្ត បានតម្រូវឱ្យផ្អាកអាជីវកម្មដឹកអ្នកដំណើរតាមមធ្យោបាយដឹកអ្នកដំណើរគ្រប់ប្រភេទចេញ-ចូលខេត្តនេះមួយរយៈសិន លើកលែងតែរថយន្តដឹកជញ្ជូនទំនិញដែលអាចបន្តដំណើរការធម្មតា ប៉ុន្តែត្រូវកម្រិតចំនួនមនុស្សជាក់លាក់ត្រឹម២នាក់ប៉ុណ្ណោះ គឺអ្នកបើកបរនិងជំនួយការអ្នកបើកបរ។
រដ្ឋបាលខេត្តក៏បានណែនាំដល់ប្រជាពលរដ្ឋដែលកំពុងស្នាក់នៅក្នុងខេត្តនេះ ផ្អាកការធ្វើដំណើរចេញចូលទៅមករាជធានីនិងខេត្តផ្សេងៗទៀត និងបញ្ឈប់ការជួបជុំនៅកន្លែងប្រមូលផ្តុំដែលមានមនុស្សច្រើនក្នុងករណីមិនចាំបាច់ ព្រមទាំងត្រូវអនុវត្តការរស់នៅតាមគន្លងបែបថ្មី ជាពិសេសអនុវត្តនូវវិធានសុខាភិបាល តាមការណែនាំរបស់ប្រមុខរដ្ឋាភិបាលនិងក្រសួងសុខាភិបាល។
អ្នកនាំពាក្យសាលាខេត្តព្រះសីហនុ លោក ឃាង ភារម្យ មានប្រសាសន៍ថា គិតត្រឹមថ្ងៃព្រហស្បតិ៍នេះ អាជ្ញាធរនិងមន្ទីរសុខាភិបាលខេត្តបានយកវត្ថុសំណាកមនុស្សជិត១ម៉ឺននាក់ (៩ ៩៧០នាក់) ទៅធ្វើតេស្តរកវីរុសកូវីដ១៩ ក្នុងនោះមានអ្នកវិជ្ជមានចំនួន៨០នាក់។
លោកបន្តថា គិតត្រឹមថ្ងៃនេះមានទីតាំងចំនួន៣៧កន្លែងហើយនៅក្នុងខេត្តនេះត្រូវបានអាជ្ញាធរបិទ និងបានយកទីតាំងនោះជាកន្លែងសម្រាក់ធ្វើចត្តាឡីស័កផងដែរ។
ក្រៅពីបិទទីតាំងនោះ លោក ឃាង ភារម្យ ថាអាជ្ញាធរក៏បានដាក់ពង្រាយកម្លាំងនៅតាមកន្លែងមួយចំនួនទៀតមិនឱ្យមានការចល័តចេញ-ចូលឆ្លងខេត្តផងដែរ។
លោកថា៖ «ដោយឡែកការបិទការចេញ-ចូលមកខេត្តព្រះសីហនុហ្នឹង យើងធ្វើនៅលើទីតាំងសំខាន់ៗជាពិសេសនៅតាមព្រំប្រទល់ខេត្តតែម្ដង យើងមានកម្លាំងយើងនៅព្រំប្រទល់ខេត្តកំពត ព្រំប្រទល់ខេត្តកោះកុង និងព្រំប្រទល់ខេត្តកំពង់ស្ពឺ»។
ក្នុងសន្និសីទសារព័ត៌មាននៅមន្ទីរពេទ្យកាល់ម៉ែត នៅព្រឹកថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន ក៏បានអំពាវនាវដល់ប្រជាពលរដ្ឋកុំធ្វើដំណើរទៅកាន់ខេត្តព្រះសីហនុ បើមិនមានការងារចាំបាច់នោះទេ ខណៈដែលខេត្តមួយនេះកំពុងមានការឆ្លងរាលដាលជំងឺកូវីដ១៩ច្រើនក្នុងសហគមន៍។
លោកបន្តថា មូលហេតុដែលលោកមិនបិទខេត្តព្រះសីហនុ ព្រោះខេត្តនោះមានកំពង់ផែដែលត្រូវធ្វើចរាចរណ៍ដោះដូរទំនិញ និងសម្រាប់ធ្វើពាណិជ្ជកម្មផ្សេងៗ ដូច្នេះបើបិទអាចនឹងជួបបញ្ហាប្រឈមខ្លាំងទៅលើបញ្ហាសេដ្ឋកិច្ចសម្រាប់កម្ពុជានិងពាណិជ្ជករ។
លោក ហ៊ុន សែន អំពាវនាវថា៖ «ម្សិលមិញខ្ញុំបាននិយាយជាមួយចៅហ្វាយខេត្តក្រុងព្រះសីហនុ យើងមិនអាចបិទទីនោះបានទេ មានកំពង់ផែ ទំនិញចេញ-ចូល ក៏ប៉ុន្តែសូមឱ្យប្រយ័ត្នប្រយែង អំពាវនាវប្រជាពលរដ្ឋគ្មានការចាំបាច់កុំអាលធ្វើដំណើរទៅខេត្តព្រះសីហនុ។ ឯអ្នកនៅខេត្តព្រះសីហនុ សូមកុំអាលនឹងចាកចេញមកកាន់កន្លែងផ្សេង ព្រោះវាអាចចម្លងមកតាមផ្លូវជាតិលេខ៣ ខេត្តកែប និងខេត្តកំពត អ៊ីចឹងសូមឱ្យរក្សាភាពស្ងប់ស្ងាត់នៅទីនោះ»។
គិតត្រឹមព្រឹកថ្ងៃទី០៤ ខែមីនា ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន៩០៩នាក់ ក្នុងនោះ អ្នកជាសះស្បើយចំនួន៤៨៤នាក់ និងកំពុងសម្រាកព្យាបាលចំនួន៤២៥នាក់។ សម្រាប់ ករណីឆ្លងក្នុងព្រឹត្តិការណ៍សហគមន៍២០កុម្ភៈវិញ ក្រសួងសុខាភិបាលឱ្យដឹងថា បានកើនដល់៤០២នាក់ហើយ៕