រដ្ឋសភាស្នើទៅរដ្ឋមន្ត្រីក្រសួងសុខាភិបាលចាក់វ៉ាក់សាំងអាស្ត្រាហ្សឺណិកា (Astra Zeneca) ដែលទើបដឹកមកដល់កម្ពុជាកាលពីល្ងាចម្សិលមិញ ជូនថ្នាក់ដឹកនាំនិងសមាជិកក្នុងស្ថាប័ននេះ ដើម្បីការពារជំងឺកូវីដ១៩ ខណៈសមាជិកសភាជាង៧០ភាគរយ មានវ័យលើសពី៦០ឆ្នាំ។
កាលពីថ្ងៃម្សិលមិញ វ៉ាក់សាំងអាស្ត្រាហ្សឺណិកា ចំនួន ៣២៤ ០០០ ដូស ដែលជាជំនួយរបស់មជ្ឈមណ្ឌលកូវ៉ាក់ ត្រូវបានដឹកមកដល់ប្រទេសកម្ពុជា។ វ៉ាក់សាំងនេះទទួលបានអាជ្ញាបណ្ណផលិតដោយវិទ្យាស្ថានសេរ៉ុម នៃប្រទេសឥណ្ឌា។
ក្នុងលិខិតរបស់អគ្គលេខាធិការដ្ឋានរដ្ឋសភា បានឱ្យដឹងនៅថ្ងៃទី៣ ខែមីនានេះថា រដ្ឋសភាស្នើសុំទៅរដ្ឋមន្ត្រីក្រសួងសុខាភិបាល លោក ម៉ម ប៊ុនហេង ជួយសម្រួលចាក់វ៉ាក់សាំង AstraZeneca ដែលផលិតនៅប្រទេសឥណ្ឌា ជូនថ្នាក់ដឹកនាំរដ្ឋសភា សមាជិក-សមាជិការដ្ឋសភា ព្រមទាំងក្រុមគ្រួសារ និងទីប្រឹក្សា ជំនួយការ ដើម្បីការពារជំងឺកូវីដ១៩ នៅមន្ទីរពេទ្យកាល់ម៉ែត្រ។
អ្នកនាំពាក្យរដ្ឋសភា លោក ឡេង ប៉េងឡុង បានមានប្រសាសន៍បន្ថែមលើខ្លឹមសារលិខិតនោះថា ដើមចមដែលនាំឱ្យរដ្ឋសភាស្នើទៅក្រសួងសុខាភិបាល ចាក់វ៉ាក់សាំងដល់សមាជិករដ្ឋសភា១២៥រូប ដោយសារតែពួកគាត់ជាង ៧០% មានអាយុលើសពី៦០ឆ្នាំ និងជាង ៣០% មានអាយុក្រោម៦០ឆ្នាំ ដើម្បីការពារ បង្ការ និងទប់ស្កាត់កុំឱ្យឆ្លងរាលដាលជំងឺកូវីដ១៩ដល់ពួកគាត់។
លោកមានប្រសាសន៍ថា៖ «វ៉ាក់សាំងមែនទែនទៅ វាមិនទាន់គ្រប់ទេ វ៉ាក់សាំងក្រោយនេះ គឺសម្រាប់អ្នកចាស់ៗគេទៅចាក់។ សំណូមពររបស់តំណាងរាស្ត្រ សូមឱ្យចាស់ៗដែលជាទីប្រឹក្សារបស់គាត់ […] បានទៅចាក់ នេះសំណូមពរ! ហើយវិធានការរបស់ក្រសួងសុខាភិបាលគាត់គិតយ៉ាងណា យើងមិនទាន់ដឹងទេ ខ្ញុំក៏មិនទាន់ទទួលបានចម្លើយពីក្រសួងសុខាភិបាលដែរ»។
តែយ៉ាងណា អ្នកនាំពាក្យក្រសួងសុខាភិបាល លោកស្រី ឱ វណ្ណឌីន មិនទាន់មានការឆ្លើយតបយ៉ាងណានៅឡើយ ដោយគ្រាន់តែមានប្រសាសន៍យ៉ាងខ្លីតាមតេឡេក្រាមថា ចាំស្តាប់ប្រសាសន៍របស់លោកនាយករដ្ឋមន្ត្រី ហ៊ុន សែន នៅថ្ងៃស្អែក។
លោកស្រី Li Ailan តំណាងអង្គការសុខភាពពិភពលោក (WHO) ប្រចាំនៅកម្ពុជា មានប្រសាសន៍តាមរយៈអ្នកបកប្រែជាភាសាខ្មែរ នៅព្រលានយន្តហោះអន្តរជាតិភ្នំពេញ កាលពីម្សិលមិញថា កម្ពុជា ជាប្រទេសមួយក្នុងចំណោមប្រទេសដំបូងគេផ្សេងទៀតនៅតំបន់ប៉ាស៊ីហ្វិកខាងលិច ដែលមានសំណាងទទួលបានវ៉ាក់សាំងប្រភេទថ្មីឈ្មោះ «អាស្ត្រាហ្សឺណិកា» នេះ ដើម្បីការពារសុខភាពនិងសុវត្ថិភាពជូនប្រជាពលរដ្ឋ។
លោកស្រី Ailan ចង់ឃើញភាគីពាក់ព័ន្ធទាំងអស់ រួមទាំងប្រជាពលរដ្ឋ ត្រូវរួមគ្នាសហការដោយភាពស្មោះត្រង់ ក្នុងការទប់ស្កាត់និងលុបបំបាត់ការឆ្លងរាលដាលជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ ឱ្យមានប្រសិទ្ធភាពខ្ពស់។
លោកស្រីអំពាវនាវដូច្នេះថា៖ «គោលដៅរបស់យើង គឺរួមគ្នាទប់ស្កាត់ការផ្ទុះជាចង្កោមនេះឱ្យបានលឿនបំផុតតាមដែលអាចធ្វើបាន និងដើម្បីការពារនូវព្រឹត្តិការណ៍២០កុម្ភៈ ចៀសវាងកុំឱ្យមានការចម្លងរាតត្បាតទ្រង់ទ្រាយធំនៅក្នុងសហគមន៍។ យើងទាំងអស់គ្នាត្រូវតែចូលរួមជាលក្ខណៈសាមគ្គីភាព ហើយត្រូវធ្វើការងារចូលរួមឱ្យបានឆាប់រហ័ស ដើម្បីការពារនូវសេនារីយ៉ូដ៏អាក្រក់នេះកុំឱ្យកើតមានឡើង»។
ចំណែក អ្នកនាំពាក្យព្រឹទ្ធសភា លោក ម៉ម ប៊ុននាង មានប្រសាសន៍ប្រាប់ វីអូឌី នៅថ្ងៃនេះថា បើតាមព័ត៌មានពីអគ្គលេខាធិការដ្ឋានព្រឹទ្ធសភា គឺសមាជិកព្រឹទ្ធសភាទាំង៦២រូបនឹងត្រូវទៅចាក់វ៉ាក់សាំង AstraZeneca នៅមន្ទីរពេទ្យកាល់ម៉ែត្រ នៅថ្ងៃទី៩ ខែមីនា ឆ្នាំ២០២១ ខាងមុខនេះ ដោយចាប់ផ្តើមពីម៉ោង៨ព្រឹករហូតដល់ពេលល្ងាច។
លោកមានប្រសាសន៍ថា៖ «តាមអគ្គលេខាធិការជូនដំណឹងចាក់វ៉ាក់សាំងនេះ សម្រាប់តែសមាជិក-សមាជិកាព្រឹទ្ធសភា ទៅចាក់ថ្ងៃទី៩។ ខ្ញុំនឹងទៅចាក់នៅថ្ងៃទី៩ ក្រោយពីប្រជុំអចិន្ត្រៃយ៍ចប់»។
លោក ម៉ម ប៊ុននាង បានឱ្យដឹងបន្ថែមថា ថ្មីៗនេះ មន្ត្រីនិងបុគ្គលមួយចំនួននៅព្រឹទ្ធសភា ក៏បានទៅចាក់វ៉ាក់សាំងប្រភេទ «ស៊ីណូហ្វាម» ដែលជាជំនួយរបស់ចិនរួចរាល់ហើយដែរ ខណៈការចាក់វ៉ាក់សាំងប្រភេទថ្មីលើកទី២នេះ នឹងចាក់សម្រាប់តែសមាជិកព្រឹទ្ធសភា៦២រូបតែប៉ុណ្ណោះ។
អាស្ត្រាហ្សឺណិកា (Astra Zeneca) ជាវ៉ាក់សាំងដែលអង្គការសុខភាពពិភពលោកបានទទួលស្គាល់ និងណែនាំឱ្យមានការចាក់វ៉ាក់សាំងនេះដើម្បីការពារខ្លួនពីការឆ្លងនូវជំងឺកូវីដ១៩។ វ៉ាក់សាំងនេះត្រូវបានផលិតដោយសាកលវិទ្យាល័យ Oxford របស់អង់គ្លេស និងក្រុមហ៊ុនអាស្ត្រាហ្សឺណិកា។
តាមសេចក្តីប្រកាសព័ត៌មានចេញថ្ងៃទី១២ ខែកុម្ភៈ អង្គការសុខភាពពិភពលោក លើកឡើងថាដោយសារវ៉ាក់សាំងនេះមានចំនួនកំណត់ ដូច្នេះការចាក់ត្រូវផ្តល់អាទិភាពឱ្យអ្នកដែលធ្វើការប្រឈមនឹងការឆ្លងខ្ពស់ ដូចជា ក្រុមគ្រូពេទ្យ និងមនុស្សចាស់ ជាពិសេសអ្នកដែលមានអាយុចាប់ពី៦៥ឆ្នាំឡើងទៅ។ អង្គការសុខភាពពិភពលោក មិនណែនាំឱ្យមនុស្សដែលមានអាយុក្រោម១៨ឆ្នាំចាក់វ៉ាក់សាំងនេះទេ។
តាមអង្គការសុខភាពពិភពលោកដដែល អាស្ត្រាហ្សឺណិកាមានប្រសិទ្ធភាព ៦៣,០៩ ភាគរយប្រឆាំងនឹងជំងឺកូវីដ១៩។
ការចាក់វ៉ាក់សាំងដំបូងបង្អស់នៅកម្ពុជា ត្រូវបានធ្វើឡើងកាលពីថ្ងៃទី១០ ខែកុម្ភៈ ឆ្នាំ២០២១។
បើតាមរបាយការណ៍របស់ក្រសួងសុខាភិបាល គិតមកដល់ថ្ងៃទី២ ខែមីនានេះ មានមនុស្សជាង ៦៥ ០០០ នាក់ បានទៅចាក់វ៉ាក់សាំងប្រភេទ «ស៊ីណូហ្វាម» របស់ចិន។
ចំណែកវ៉ាក់សាំងប្រភេទថ្មីឈ្មោះ AstraZeneca ដែលផលិតនៅប្រទេសឥណ្ឌា ចំនួន ៣២៤ ០០០ដូសនោះ កម្ពុជាទើបតែទទួលបានពីកូវ៉ាក់ ដែលជាកម្មវិធីមួយរបស់អង្គការសុខភាពពិភពលោក កាលពីម្សិលមិញ ហើយការទទួលវ៉ាក់សាំងថ្មីបន្ថែមទៀតនេះ ក៏ជាជំហានមួយទៀត ឆ្ពោះទៅការសម្រេចគោលដៅរបស់រដ្ឋាភិបាលកម្ពុជា ដែលមានបំណងចាក់វ៉ាក់សាំងប្រឆាំងកូវីដ១៩ ដល់ប្រជាពលរដ្ឋឱ្យបាន១០លាននាក់នាពេលឆាប់ៗខាងមុខនេះ៕