រោងចក្រកាត់ដេរសម្លៀកបំពាក់ Y&W នៅខណ្ឌដង្កោ រាជធានីភ្នំពេញ បានរឹតបន្តឹងវិធានការបង្ការនិងទប់ស្កាត់ជំងឺកូវីដ១៩ បន្ទាប់ពីរកឃើញកម្មករម្នាក់ឆ្លងជំងឺនេះកាលពីចុងសប្តាហ៍មុន ដែលតម្រូវឱ្យកម្មករជាង៧០០នាក់ធ្វើតេស្តរកវីរុសកូវីដ១៩។
ប្រធានគ្រប់គ្រងរដ្ឋបាលនិងច្បាប់ នៃរោងចក្រ Y&W លោក ធី ប៊ុនថុន ប្រាប់ VOD ឱ្យដឹងនៅថ្ងៃទី០៣ ខែមីនានេះថា កម្មករចំនួន៧១៦នាក់ដែលប៉ះផ្ទាល់និងប្រយោលជាមួយអ្នកជំងឺដែលជាកម្មករផ្នែកបោកគក់ ត្រូវបានប្រមូលសំណាកទៅធ្វើតេស្តភ្លាមៗ និងទទួលបានលទ្ធផលអវិជ្ជមានទាំងអស់។
លោកថា ក្រុមហ៊ុនបានផ្អាកការងារកម្មករទាំងនោះ និងបិទទ្វារអគារដែលពួកគេធ្វើការជាបណ្តោះអាសន្ន តាមការណែនាំរបស់ក្រសួងសុខាភិបាល ហើយតម្រូវឱ្យកម្មករទាំងអស់ពាក់ម៉ាស់មុខ វាស់កម្តៅ និងបាញ់ទឹកអាល់កុលនៅតាមច្រកចេញចូល។
លោក ប៊ុនថុន ប្រាប់ថា៖ «ដោយសារតែរោងចក្រយើងធំ មានកម្មកររហូតដល់៥ ០០០នាក់ជាង ដល់ពេលវាកើតឡើងអញ្ចឹង យើងមានអារម្មណ៍មួយថា គឺរឿងមួយដែលយើងត្រូវតែទប់ស្កាត់ឱ្យបានលឿនបំផុត ព្រោះកម្មករ[ដូច]បងដឹងស្រាប់ហើយ គឺគាត់អង្គុយនៅជាមួយគ្នា ញ៉ាំបាយជាមួយគ្នា។ អញ្ចឹងយើងត្រូវតែរឹតបន្ដឹងខ្លាំងបំផុត»។
ប្រធានផ្នែកគ្រប់គ្រងការផលិតនៃរោងចក្រ Y&W អ្នកស្រី ឈួន ស្រីពេជ្រ លើកឡើងថា អគារដែលអ្នកស្រីធ្វើការនៅតែដំណើរការធម្មតា ដោយសារតែករណីឆ្លងរកឃើញលើកម្មករនៅអគារផ្សេង។
ដោយក្នុងដៃកាន់ថង់ទឹកសុទ្ធ និងមានដបអាល់កុលតូចមួយផងនោះ អ្នកស្រី ស្រីពេជ្រ ប្រាប់ថា ដំបូងឡើយ អ្នកស្រីមានការបារម្ភចំពោះការរីករាលដាលនៃជំងឺក្នុងចំណោមកម្មករដូចគ្នា ប៉ុន្តែក្រោយដឹងលទ្ធផលថា អ្នកដែលបានប្រមូលសំណាកអវិជ្ជមានទាំងអស់ គាត់ក៏បានធូរស្បើយចិត្តវិញ។
អ្នកស្រីប្រាប់ថា៖ «បារម្ភដែរហ្នឹង តែដល់ពេលឮគេថាអត់មានកើតអញ្ចឹង ក៏ចេះតែធូរទ្រូងគ្រប់គ្នាអញ្ចឹង! ខ្លាចវាឆ្លងដល់ដែរ ព្រោះយើងនៅឆ្ងាយពីគ្នាដែរ»។
កម្មករផ្នែកដេរអាវគំរូ អ្នកនាង ម៉េង ស្រីរ៉ា ឱ្យដឹងថា ខាងរោងចក្រពិតជាបានវាស់កម្ដៅនិងបាញ់អាល់កុលដល់កម្មករនៅតាមច្រកទ្វារចេញចូល។ គាត់បន្ថែមថា គាត់មិនបារម្ភនោះទេ ដោយសារករណីឆ្លងរកឃើញនៅអគារផ្សេង ហើយផ្នែកអ្នកនាងអង្គុយឃ្លាតពីគ្នាឆ្ងាយ ខុសពីផ្នែកកាត់ដេរធម្មតា។
អ្នកនាង ម៉េង ស្រីរ៉ា និយាយថា៖ «ខ្ញុំអត់បារម្ភ ព្រោះអីគេថាអត់សូវអី។ ខ្ញុំអត់សូវបារម្ភ»។
អ្នកនាងបន្ថែមថា៖ «ខ្ញុំពាក់ម៉ាស់ លាងជែល បាញ់អាល់កុលរហូតហ្នឹងបង»។
ប្រធានសហភាពការងារកម្ពុជា លោក អាត់ ធន់ លើកឡើងថា ការរឹតបន្តឹងវិធានការបង្ការ និងទប់ស្កាត់ការឆ្លងរាលដាលនៃជំងឺកូវីដ១៩ នៅក្នុងចំណោមកម្មកររោងចក្រកាត់ដេរនោះ នៅពេលរកឃើញករណីឆ្លងកើតមាន ដោយប្រមូលអ្នកពាក់ព័ន្ធទៅធ្វើតេស្តនិងដាក់ពួកគេនៅដោយឡែក គឺជាការល្អប្រសើរ។ ប៉ុន្តែលោកថា ពួកគេនៅតែមានហានិភ័យខ្ពស់ពីការឆ្លងក្នុងស្ថានការណ៍បច្ចុប្បន្ន ដោយសារមិនអាចរក្សាគម្លាតសុវត្ថិភាពបាន។
លោក អាត់ ធន់ មានប្រសាសន៍ថា៖ «ខ្ញុំគិតថា វាជាការប្រឈមខ្លាំង ព្រោះពួកគាត់ជិះឡានជាមួយគ្នា ស្នាក់នៅជាមួយគ្នា ហូបបាយជាមួយគ្នា ចេញចូលមុខរោងចក្រជាមួយគ្នា ធ្វើការជាមួយគ្នា ដែលមិនមានគម្លាតសង្គមសោះ ប៉ុន្តែយើងឃើញថា កន្លងមក មានការតឹងតែងក្នុងការពាក់ម៉ាស់សម្អាតដៃបាន ប៉ុន្តែគម្លាតសុវត្ថិភាពគឺថាធ្វើអត់ទាន់បាន អញ្ចឹងយើងមានការបារម្ភមែនទែន»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បដិសេធមិនឆ្លើយតបសំណួរពាក់ព័ន្ធនឹងករណីឆ្លងក្នុងចំណោមកម្មកររោងចក្រ និងវិធានការទប់ស្កាត់ការចម្លងរបស់ជំងឺចំពោះពួកគេ ដោយលោករុញសំណួរទៅសួរក្រសួងសុខាភិបាល។
វីអូឌី មិនអាចទាក់ទងអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានទេនៅល្ងាចនេះ។
តាមរបាយការណ៍ពីក្រសួងសុខាភិបាល គិតត្រឹមថ្ងៃទី៣ ខែមីនា ឆ្នាំ២០២១ កម្ពុជាបានរកឃើញអ្នកឆ្លងកូវីដ១៩ សរុបចំនួន៨៧៨នាក់ ក្នុងនោះអ្នកជាសះស្បើយចំនួន៤៨២នាក់ និងអ្នកកំពុងសម្រាកព្យាបាលចំនួន៣៩៦នាក់។ ក្នុងចំណោមអ្នកឆ្លងសរុប គឺមានអ្នកឆ្លងនៅក្នុងព្រឹត្តិការណ៍សហគមន៍២០កុម្ភៈ មានចំនួន៣៧៤នាក់៕
