រដ្ឋសភា នៅថ្ងៃនេះ បានអនុម័តទទួលយកសេចក្តីព្រាងច្បាប់ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ដើម្បីប្រគល់ឱ្យគណៈកម្មការជំនាញពិនិត្យនិងសិក្សាតាមសំណើរបស់រដ្ឋាភិបាល។
ការអនុម័តទទួលយកសេចក្តីព្រាងច្បាប់នេះ បានធ្វើឡើងនៅក្នុងកិច្ចប្រជុំគណៈកម្មាធិការអចិន្រ្តៃយ៍រដ្ឋសភា នៅព្រឹកថ្ងៃទី០២ ខែមីនា ឆ្នាំ២០២១នេះ។
យោងតាមលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ឱ្យដឹងថា អង្គប្រជុំបានអនុម័តប្រគល់សេចក្តីព្រាងច្បាប់ថ្មីនេះដល់គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី សហការជាមួយគណៈកម្មការនីតិកម្ម និងយុត្តិធម៌ ពិនិត្យ សិក្សា និងធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ។
រដ្ឋសភា ឱ្យដឹងក្នុងទំព័រហ្វេសប៊ុកផ្លូវការរបស់ខ្លួនដែរថា សេចក្តីព្រាងច្បាប់នេះមាន ៦ជំពូក និង ១៨មាត្រា បានរៀបចំឡើងក្នុងបរិការណ៍ដែលពិភពលោក ក៏ដូចជាកម្ពុជា កំពុងប្រឈមមុខនឹងការឆ្លងរាលដាលនៃជំងឺកូវីដ-១៩ កាន់តែខ្លាំង ស្មុគស្មាញ និងក្នុងទ្រង់ទ្រាយកាន់តែធំ និងបានបង្កឱ្យមានផលប៉ះពាល់ធ្ងន់ធ្ងរដល់សុខភាពសាធារណៈ វិស័យសេដ្ឋកិច្ច-សង្គម និងជីវភាពរស់នៅជាប្រក្រតីរបស់មនុស្សជាតិ។
រដ្ឋសភាបន្តថា សេចក្តីព្រាងច្បាប់នេះបង្កើតឱ្យមានមូលដ្ឋានគតិយុត្តិមួយរឹងមាំនិងគ្រប់ជ្រុងជ្រោយបន្ថែមទៀត ដល់ការគ្រប់គ្រងស្ថានការណ៍នៃការឆ្លងរាលដាលនៃជំងឺកូវីដ-១៩ និងជំងឺឆ្លងដ៏កាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត នៅក្នុងព្រះរាជាណាចក្រកម្ពុជា។
គួរបញ្ជាក់ថា គណៈរដ្ឋមន្ត្រី កាលពីថ្ងៃអាទិត្យ ទី២៨ ខែកុម្ភៈ ឆ្នាំ២០២១ បានបើកកិច្ចប្រជុំបន្ទាន់មួយដោយបានអនុម័តសេចក្ដីព្រាងច្បាប់ ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងបានដាក់ជូនរដ្ឋសភាពិនិត្យកាលពីថ្ងៃម្សិលមិញ។
កាលពីឆ្នាំ២០២០ កម្ពុជាក៏បានបង្កើតច្បាប់ស្តីពីការគ្រប់គ្រងប្រទេសជាតិក្នុងភាពអាសន្ន ដោយលោកនាយករដ្ឋមន្ត្រី ហ៊ុន សែន អះអាងថា ជាការចាំបាច់ដើម្បីទប់ស្កាត់ចលនានានាក្នុងពេលដែលប្រឈមនឹងវិបត្តិកូវីដ១៩៕