សាលាដំបូងរាជធានីភ្នំពេញនៅថ្ងៃទី ០១ ខែមីនា ឆ្នាំ២០២១នេះ បានប្រកាសសាលក្រមកំបាំងមុខដាក់ទោសលោក សម រង្ស៊ី ឱ្យជាប់ពន្ធនាគាររយៈពេល២៥ឆ្នាំ ក៏ដូចជា ហាមមិនឱ្យបោះឆ្នោត និងឈរឈ្មោះឱ្យគេបោះឆ្នោតក្រោមបទប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាលកម្ពុជា។
លោក អ៊ី រិន អ្នកនាំពាក្យអយ្យការអមតុលាការសាលាដំបូងរាជធានីភ្នំពេញ បានថ្លែងថា សាលក្រមនេះ ត្រូវបានប្រកាសនៅចំពោះមុខមេធាវីតំណាងរដ្ឋាភិបាល និងចាត់ទុកថា នៅចំពោះមុខជនជាប់ចោទផងដែរ។
ក្រៅពីលោក សម រង្ស៊ី សាលក្រមក៏បានសម្រេចដាក់ទោសលោកស្រី មូរ សុខហួរ និងលោក អេង ឆៃអ៊ាង ឱ្យជាប់ពន្ធនាគារម្នាក់ៗចំនួន២២ឆ្នាំ និងកាត់ទោសលោកស្រី ជូឡុង សូមួរ៉ា លោក ម៉ែន សុថាវរិន្ទ្រ លោក អ៊ូ ច័ន្ទឫទ្ធិ លោក ហូរ វ៉ាន់, លោក ឡុង រី និងលោក នុត រំដួល ឱ្យជាប់ពន្ធនាគារក្នុងម្នាក់ៗចំនួន២០ឆ្នាំ។ ក្រៅពីផ្តន្ទាទោសឱ្យជាប់ពន្ធនាគារហើយ លោក សម រង្ស៊ី និងថ្នាក់ដឹកនាំកំពូលៗនៃអតីតគណបក្សសង្គ្រោះជាតិទាំង៨រូប ក៏ត្រូវបានតុលាការសម្រេចដកហូតសិទ្ធិបោះឆ្នោត និងសិទ្ធិឈរឈ្មោះឱ្យគេបោះឆ្នោតផងដែរ។
លោក សំ សុខគង់ មេធាវីការពារក្តីឱ្យលោក សម រង្ស៊ី និងថ្នាក់ដឹកនាំនៃអតីតគណបក្សសង្គ្រោះជាតិមិនអាចទាក់ទងសុំការឆ្លើយតបចំពោះសាលក្រមនៅថ្ងៃនេះបាននៅឡើយទេ ដោយទូរសព្ទជាច្រើនដងតែមិនមានអ្នកលើក។
ទោះយ៉ាងណាក្តីលោក សម រង្ស៊ី បានសរសេរនៅលើហ្វេសប៊ុករបស់លោកថាសាលក្រមដែលតុលាការប្រកាសនៅថ្ងៃនេះឆ្លុះបញ្ចាំងពីការភ័យខ្លាចរបស់លោកនាយករដ្ឋមន្រ្តី ហ៊ុន សែន ដែលចង់កម្ចាត់លោកចេញពីឆាកនយោបាយកម្ពុជា។
កាលពីដើមខែកុម្ភៈឆ្នាំ២០២១នេះ តុលាការសាលាដំបូងរាជធានីភ្នំពេញ បានបើកសវនាការកាត់ទោសលោក សម រង្ស៊ី និងមន្ត្រីជាន់ខ្ពស់អតីតគណបក្សសង្គ្រោះជាតិ៩នាក់ ពីបទឧបឃាត ឬ ប៉ុនប៉ងផ្តួលរំលំរដ្ឋាភិបាលកម្ពុជា តាមមាត្រា២៧ និង៤៥១ នៃក្រមព្រហ្មទណ្ឌតាមរយៈផែនការមាតុភូមិនិវត្តន៍កាលពីថ្ងៃទី ៩ វិច្ឆិកា ២០១៩៕