រថយន្តដឹកឈើ១៣គ្រឿងរបស់ក្រុមហ៊ុន លឹមរ៉ូយ៉ាល់ ត្រូវបានកម្លាំងចម្រុះខេត្តមណ្ឌលគិរី បានចាប់ឃាត់ទុក ដើម្បីត្រួតពិនិត្យរកអាជ្ញាបណ្ណធ្វើអាជីវកម្ម ប៉ុន្តែមន្ត្រីបានផ្តល់ព័ត៌មានខុសគ្នា ពីភាពស្របច្បាប់នៃការធ្វើអាជីវកម្មនេះ។
នាយកខណ្ឌរដ្ឋបាលព្រៃឈើខេត្តមណ្ឌលគិរី លោក អ៊ុំ វណ្ណសុភ៌ក បាននិយាយថា កាលពីថ្ងៃទី២៨ ខែកុម្ភៈ រថយន្តដឹកឈើ១៣គ្រឿងត្រូវបានកម្លាំងចម្រុះខេត្តឃាត់នៅក្រុងសែនមនោរម្យ ដើម្បីធ្វើការត្រួតពិនិត្យ។
លោកគូសបញ្ជាក់ថា គិតត្រឹមថ្ងៃចន្ទនេះ សមត្ថកិច្ចមិនទាន់អាចសន្និដ្ឋានបានថា តើឈើទាំងនោះស្របច្បាប់ឬក៏យ៉ាងណានៅឡើយទេ ហើយក៏សុំមិនប្រាប់ឈ្មោះរបស់ក្រុមហ៊ុនដែលដឹកឈើនោះដែរ។
លោកថា៖ «អូ! រឿងហ្នឹងកំពុងតែត្រួតពិនិត្យ អត់ទាន់ដឹងយ៉ាងម៉េចទេ! ចាំត្រួតពិនិត្យចប់ ចាំខ្ញុំប្រាប់ព័ត៌មានទៅវិញ»។
មេបញ្ជាការកងរាជអាវុធហត្ថខេត្តមណ្ឌលគិរី លោក ហែម បូណារ៉ែល ប្រាប់ថា កម្លាំងរបស់លោកបានសហការក្នុងការចុះឃាត់រថយន្តដឹកឈើទាំងនោះ។
លោកថា ឈើនោះដឹកចេញពីស្រុកកោះញែក ខេត្តមណ្ឌលគិរី របស់ក្រុមហ៊ុន លឹមរ៉ូយ៉ាល់ ដឹកទៅទម្លាក់នៅរោងចក្រមួយរបស់ក្រុមហ៊ុននេះនៅខេត្តក្រចេះ ដែលលោកថា ឈើទាំងនោះមិនខុសច្បាប់ទេ។
លោកថា៖ «ជំនាញគេត្រួតពិនិត្យហើយ ខ្ញុំសួរទៅជំនាញរដ្ឋបាលព្រៃឈើ គេថាអត់អីផង [មានការឃាត់ខ្លួនមនុស្សទេ?] អត់ទេ! ពួកគេអត់មានខុសអីផង»។
អ្នកសម្របសម្រួលសហគមន៍ជនជាតិដើមភាគតិចខេត្តមណ្ឌលគិរី លោក ក្រឿង តុលា និយាយថា បទល្មើសព្រៃឈើនៅក្នុងខេត្តនេះមិនថយចុះទេ ទោះមានការឆ្មក់ចាប់ពីក្រុមការងារថ្នាក់ជាតិ ដែលបង្កើតឡើងដោយរដ្ឋាភិបាលក៏ដោយ។
លោកថា ការបកស្រាយផ្សេងគ្នាពីភាពស្របច្បាប់របស់ក្រុមហ៊ុន ពីសំណាក់មន្ត្រីពាក់ព័ន្ធពេលនេះ វាគួរតែមានការបើកការស៊ើបអង្កេតដ៏ជាក់លាក់មួយពីស្ថាប័នជាតិ ដើម្បីទប់ស្កាត់កុំឱ្យមានការគប់គិតគ្នាប្រព្រឹត្តអំពើពុករលួយ ធ្វើឱ្យធនធានធម្មជាតិបន្តបាត់បង់ទៅយ៉ាងគំហុកដូចបច្ចុប្បន្ន។
លោកថា៖ «ខ្ញុំគិតថា សម្តេច [ហ៊ុន សែន] គួរតែអនុវត្តច្បាប់ឱ្យបានម៉ឺងម៉ាត់។ បើសិនជនណាមានការគប់គិត ត្រូវប្រើអភិក្រមទី៥ គាត់ត្រូវតែប្រើតែម្តង មានន័យថា វះកាត់ចំពោះថ្នាក់ក្រោមជាតិណាដែលពុករលួយ ថ្នាក់ក្រោមជាតិណាដែលមិនស្មោះត្រង់នឹងថ្នាក់ជាតិ យើងគួរតែប្រើ[ចាត់វិធានការ]»។
អ្នកនាំពាក្យកងរាជអាវុធហត្ថលើផ្ទៃប្រទេស ដែលជាគណៈកម្មាធិការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ លោក អេង ហ៊ី និងក្រុមហ៊ុន លឹមរ៉ូយ៉ាល់ មិនទាន់អាចទំនាក់ទំនងសុំការឆ្លើយបំភ្លឺបាននៅឡើយទេ នៅរសៀលម៉ោង៥ថ្ងៃនេះ។
តែយ៉ាងណា តាមរយៈការចុះបង្ក្រាបបទល្មើសព្រៃឈើជាទ្រង់ទ្រាយធំរបស់គណៈកម្មាធិការនេះ ចាប់ពីឆ្នាំ២០១៦ រហូតដល់ចុងឆ្នាំ២០១៩ មានឧកញ៉ាយ៉ាងតិច៥នាក់ជាប់ពាក់ព័ន្ធបទល្មើសព្រៃឈើ ក្នុងនោះឧកញ៉ា គង់ ក្រឹង និងឧកញ៉ា សឹង សំអុង ត្រូវបានចាប់ខ្លួន និងឧកញ៉ា៣រូបទៀតកំពុងរត់គេចខ្លួន ដូចជា ឧកញ៉ា វន់ ប៊ុនថៃ, ឧកញ៉ា ស៊្រុន ម៉េងលាង ម្ចាស់ក្រុមហ៊ុន ម៉េងលាង ជាដើម៕