ក្រសួងព័ត៌មាន តម្រូវឱ្យអង្គភាពដែលធ្វើការលើវិស័យព័ត៌មានទាំងអស់ ត្រូវជូនដំណឹងទៅក្រសួងជាមុន បើចង់រៀបចំសិក្ខាសាលាបណ្តុះបណ្តាលវិជ្ជាជីវៈអ្នកសារព័ត៌មាន ដើម្បីឱ្យស្របតាមក្បួនខ្នាតក្រមសីលធម៌ និងមានគុណភាពខ្ពស់។
លិខិតចុះថ្ងៃ២៥ ខែកុម្ភៈ ឆ្នាំ២០២១ របស់រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ផ្ញើទៅម្ចាស់ប្រព័ន្ធផ្សព្វផ្សាយ និងប្រធានអង្គការសមាគមអ្នកសារព័ត៌មានទាំងអស់ បានលើកឡើងថាកន្លងមក ស្ថាប័នមួយចំនួនបានរៀបចំសិក្ខាសាលានិងបើកវគ្គបណ្តុះបណ្តាលជំនាញផ្នែកសារព័ត៌មាន ប៉ុន្តែពុំមានកិច្ចសហប្រតិបត្តិការជាមួយក្រសួងនិងស្ថាប័នពាក់ព័ន្ធ ដើម្បីធ្វើការអប់រំ បណ្តុះបណ្តាលឱ្យបានត្រឹមត្រូវ តាមក្រិត្យក្រមក្បួនខ្នាត ក្រមសីលធម៌ វិជ្ជាជីវៈសារព័ត៌មាននៅឡើយទេ។
ករណីនេះ រដ្ឋមន្ត្រីបានណែនាំទៅម្ចាស់ប្រព័ន្ធផ្សព្វផ្សាយ និងអង្គការសមាគមទាំងអស់ ត្រូវជូនដំណឹងជាមុនទៅក្រសួងព័ត៌មាន មុននឹងធ្វើសិក្ខាសាលាឬបើកវគ្គបណ្តុះបណ្តាល ដើម្បីលើកកម្ពស់វិស័យនេះឱ្យកាន់តែមានប្រសិទ្ធភាព គុណភាព មានវិជ្ជាជីវៈ និងលើកស្ទួយសិទ្ធិសេរីភាពខាងព័ត៌មាន ស្របតាមរដ្ឋធម្មនុញ្ញ និងច្បាប់ស្តីពីរបបសារព័ត៌មាន។
អគ្គនាយក នៃអគ្គនាយកដ្ឋានព័ត៌មានវិទ្យា និងសោតទស្សន៍ លោក ផុស សុវណ្ណ មានប្រសាសន៍បន្ថែមលើសេចក្តីណែនាំរបស់ក្រសួងថា ដើមចមដែលនាំឱ្យក្រសួងតម្រូវឱ្យគ្រប់អង្គភាព អង្គការ និងសមាគមអ្នកសារព័ត៌មាន ជូនដំណឹងមុននឹងធ្វើសិក្ខាសាលាបណ្តុះបណ្តាលអ្នកសារព័ត៌មាន គឺដើម្បីពង្រឹងប្រសិទ្ធភាពការងារឱ្យកាន់តែល្អប្រសើរជាងមុន។
លោបន្តថា បើសិនជាក្នុងវគ្គបណ្តុះបណ្តាលនោះ មិនទាន់មានវាគ្មិនគ្រប់គ្រាន់ ក៏ក្រសួងនឹងជួយរកអ្នកបណ្តុះបណ្តាលឱ្យតាមលទ្ធភាពទៀតផង។
លោកថា៖ «វិស័យព័ត៌មានយើងមានច្រើនណាស់ ពាក់ព័ន្ធនឹងវិស័យអប់រំ ទាក់ទងកិច្ចការនារី បរិស្ថាន កសិកម្មផ្សេងៗ ខ្លាចយើងធ្វើក្នុងកម្រិតយើង ដោយមិនបានទាក់ទងមុន ឬយើងទាក់ទងបានមុនហើយគ្រាន់តែជូនដំណឹងទៅក្រសួងបានជ្រាបទៅ ថាខ្ញុំបានធ្វើ។ យើងមានវាគ្មិនពីខាងក្រសួងកសិកម្ម វាគ្មិនខាងក្រសួងអប់រំចូលហើយ ដើម្បីឱ្យវាអស់ចិត្តត្រង់ថា សិក្ខាសាលាដែលយើងរៀប វាមានគុណភាព [នេះជា]គោលបំណងរបស់ក្រសួងចង់បាន»។
លោក ផុស សុវណ្ណ បញ្ជាក់ថា ចំពោះអង្គការ សមាគម និងអង្គភាពសារព័ត៌មានដែលមិនបានជូនដំណឹងមកក្រសួងមុននឹងធ្វើវគ្គបណ្តុះបណ្តាលនោះ គឺនៅពេលមានបញ្ហាសួរនាំពីសមត្ថកិច្ចឬមានបញ្ហាប្រឈមនានាជាដើមនោះ ក្រសួងមិនទទួលខុសត្រូវនោះទេ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី ស្វាគមន៍កិច្ចសហការជាមួយក្រសួង ដើម្បីបង្កលក្ខណៈងាយស្រួលរវាងអង្គការសង្គមស៊ីវិល សមាគម និងអាជ្ញាធរពាក់ព័ន្ធ។
លោកមានប្រសាសន៍ថា៖ «ខាងយើងនឹងពិចារណាលើសំណើរបស់ក្រសួងព័ត៌មាន ហើយយើងអាចនឹងពិនិត្យលទ្ធភាព ថាតើយើងអាចរៀបចំមធ្យោបាយបែបណា ដើម្បីបង្កលក្ខណៈងាយស្រួលសម្រាប់យើងផង ហើយអាចទទួលបាននូវកិច្ចសហប្រតិបត្តិការជាមួយគ្នាបានល្អផង រវាងខាងអង្គការសង្គមស៊ីវិលនិងខាងក្រសួងព័ត៌មាន»។
ទោះយ៉ាងណាក៏ដោយ លោក ណុប វី បង្ហាញក្តីបារម្ភលើការធ្វើការងារសហការជាមួយស្ថាប័នរដ្ឋ ពីព្រោះកន្លងមក ខេមបូចា តែងតែប្រកាសតាមបណ្តាញសង្គម និងវេបសាយរបស់ខ្លួន ដើម្បីឱ្យអ្នកសារព័ត៌មាន យុវជន និងអង្គភាពសារព័ត៌មាននានា ចូលរួមវគ្គបណ្តុះបណ្តាលដែរ ប៉ុន្តែស្ថាប័នរដ្ឋមិនសូវមានការចូលរួមជាមួយវគ្គបណ្តុះបណ្តាលនោះទេ។
ប្រធានក្លឹបអ្នកកាសែតកម្ពុជា លោក ប៉ែន បូណា មានប្រសាសន៍ថា កន្លងមក ស្ថាប័ននេះ មុននឹងបើកវគ្គបណ្តុះបណ្តាលដល់អ្នកសារព័ត៌មាន តែងតែជូនដំណឹងទៅក្រសួងសាម៉ី និងអញ្ជើញវាគ្មិនពីក្រសួងព័ត៌មាន និងអ្នកឯករាជ្យចូលរួម ដើម្បីធ្វើបទបង្ហាញឱ្យអ្នកចូលរួមសិក្សាបានយល់កាន់តែច្បាស់ពីវិជ្ជាជីវៈនិងក្រមសីលធម៌អ្នកសារព័ត៌មាន។
បន្ថែមពីនេះ លោកថា សេចក្តីណែនាំរបស់ក្រសួងព័ត៌មាន បង្ហាញពីផលវិជ្ជមាននិងអវិជ្ជមាន ដោយសារមានអង្គភាពសារព័ត៌មានខ្លះយល់ថាល្អ និងខ្លះថាមានភាពស្មុគស្មាញ ព្រោះត្រូវជូនដំណឹងទៅក្រសួងមុននឹងបើកវគ្គបណ្តុះបណ្តាលនានា។
លោក ប៉ែន បូណា មានប្រសាសន៍ថា៖ «យើងបើកវគ្គបណ្តុះបណ្តាល យើងជូនដំណឹងទៅគាត់[ក្រសួងព័ត៌មាន] សុំគាត់សហការ យើងបើកកម្មវិធីមួយ ហើយយើងអញ្ជើញវាគ្មិនម្នាក់មកពីក្រសួង សូមឱ្យគាត់មកបកស្រាយ ឧទាហរណ៍ច្បាប់ស្តីពីរបបសារព័ត៌មាន អំពីគោលការណ៍របស់ក្រសួងព័ត៌មាននៅក្នុងប្រទេសកម្ពុជា។ អវិជ្ជមាន គឺអាចអង្គការ សមាគមខ្លះ គាត់យល់ថា ពីមុន ហើយឥលូវម៉េចមានអាហ្នឹង ឥលូវម៉េចក៏មាន វាអាចថា ជាការលូកដៃរបស់ក្រសួង យើងអាចបកស្រាយថាអញ្ចឹង»។
អ្នកសារព័ត៌មានជើងចាស់ និងបច្ចុប្បន្នជាមន្ត្រីគម្រោងបណ្តុះបណ្តាលអ្នកសារព័ត៌មានពលរដ្ឋនៃអង្គការអន្តរជាតិមួយ លោក ម៉ៃ ទិត្យថារ៉ា មានប្រសាសន៍ថា បើសិនជាក្រសួងព័ត៌មានពិតគោរពតាមសេចក្តីណែនាំរបស់ខ្លួនមែន លោកថានឹងធ្វើឱ្យវិស័យសារព័ត៌មានកាន់តែរីកចម្រើន ហើយអ្នកដែលចូលរួមសិក្សាកាន់តែធ្វើការប្រកបដោយក្រមសីលធម៌ល្អនិងមានវិជ្ជាជីវៈ។
ផ្ទុយទៅវិញ លោកបង្ហាញក្តីបារម្ភថា បើសិនជាអង្គការ សមាគម និងអង្គភាពសារព័ត៌មាន ផ្ញើប្រធានបទដែលត្រូវយកទៅបណ្តុះបណ្តាល ហើយត្រូវបានក្រសួងកំណត់ឱ្យធ្វើតាមខ្លួនវិញនោះ នឹងធ្វើឱ្យវិស័យសារព័ត៌មានដើរថយក្រោយ។
លោកមានប្រសាសន៍ថា៖ «បើសិនជាគាត់ [ក្រសួង] កំណត់ថា អ្នកមានសេរីភាព [បណ្តុះបណ្តាល] បានត្រឹមប៉ុណ្ណេះ អ្នកឯងមិនអាចធ្វើអ្វីដែលលើសពីក្រសួងបានកំណត់ វាមិនខុសពីវាស់ដីឱ្យដើរទេ ចង់ឬមិនចង់ វាបាត់អស់ហើយសេរីភាពមួយចំនួនរបស់យើង»៕