រដ្ឋាភិបាលបានដាក់ពង្រាយកម្លាំងនគរបាលនៅតាមខ្សែបន្ទាត់ព្រំដែនបន្ថែម ដើម្បីទប់ស្កាត់អ្នកឆ្លងដែនខុសច្បាប់ និងទប់ស្កាត់ការឆ្លងរីករាលដាលនៃជំងឺកូវីដ១៩ ក្រោយពីអាជ្ញាធរនៅតាមបណ្តាខេត្តជាប់ព្រំដែន បានឃាត់ខ្លួនមនុស្សប្រមាណ៦០០នាក់ឱ្យទៅធ្វើចត្តាឡីស័កជាបន្តបន្ទាប់។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន មានប្រសាសន៍នៅថ្ងៃសុក្រនេះថា ចាប់ពីថ្ងៃទី១៣ ដល់ថ្ងៃទី២៤ ខែកុម្ភៈ ឆ្នាំ២០២១នេះ សមត្ថកិច្ចនៅតាមបណ្តាខេត្តជាប់ព្រំដែនកម្ពុជា-ថៃនិងវៀតណាម បានឃាត់ខ្លួនមនុស្សប្រមាណ៦០០នាក់ បញ្ជូនទៅកាន់មណ្ឌលចត្តាឡីស័កជាបន្តបន្ទាប់ ដើម្បីតាមដានសុខភាព។
លោកបន្តថា ដើម្បីទប់ស្កាត់ កុំឱ្យមានអ្នកឆ្លងដែនចូលកម្ពុជាទាំងមិនបានតាមដានសុខភាពនិងធ្វើចត្តាឡីស័ក និងដើម្បីបញ្ចៀសហានិភ័យនៃការឆ្លងរាលដាលនៃជំងឺកូវីដ១៩ក្នុងសហគមន៍ រដ្ឋាភិបាលបានសម្រេចដាក់ពង្រាយកងកម្លាំងនគរបាលព្រំដែនបន្ថែមនៅតាមបន្ទាត់ព្រំដែន។
លោកថា៖ «នគរបាលការពារព្រំដែនបានពង្រាយកម្លាំងបន្ថែម បោះតង់បោះអីច្រើន គ្រប់ចំណុចដែលយើងសង្ស័យថា គាត់អាចគេចវេះបាន គឺយើងឆ្ការព្រៃចូល ដើម្បីបោះតង់ចាំឃាត់គាត់ ដើម្បីយកទៅធ្វើចត្តាឡីស័ក ដោយបារម្ភខ្លាចគាត់មកដល់ភូមិឃុំ គាត់ចម្លងដល់គេ បើគាត់មានកូវីដ»។
អភិបាលខេត្តបាត់ដំបង លោក ងួន រតនៈ មានប្រសាសន៍ថា លំហូរពលករចំណាកស្រុកពីប្រទេសថៃចូលកម្ពុជាវិញ តាមច្រកព្រំដែនក្នុងខេត្តនេះ បានកើនឡើងដល់ទៅ៣ដងក្នុងរយៈពេលប៉ុន្មានថ្ងៃចុងក្រោយនេះ គឺចន្លោះពី១០០នាក់ទៅ៣០០នាក់ក្នុងមួយថ្ងៃ។
លោកបន្តថា បច្ចុប្បន្ន ទីតាំងចត្តាឡីស័កដែលបានត្រៀមទុកពេញអស់ហើយ ដែលធ្វើឱ្យអ្នកចំណាកស្រុកខ្លះត្រូវនៅក្រោមតង់កៅស៊ូបណ្តោះអាសន្ន។
លោកថា៖ «យើងមានតង់សម្តេចតេជោលោកឱ្យ ឯកឧត្តម ខេង សាម៉េត គាត់មកធ្វើបន្ថែមសម្រាប់ស្នាក់នៅ១យប់២យប់ ទម្រាំអ្នកនៅក្នុងមណ្ឌលដល់ថ្ងៃចេញ យើងបញ្ចូលថ្មីមកវិញ។ គេដាក់៦០តង់! ឯកឧត្តម ខេង សាម៉េត មកដាក់ ឥលូវមាន៩០តង់ច្រើនដែរ មួយតង់ដាក់បាន១០នាក់ គាត់មកម៉ាវ៉ុលគ្នាគាត់ យើងដាក់ម៉ាវ៉ុលៗអ៊ីចឹងទៅ»។
ទោះយ៉ាងណា លោកថា បច្ចុប្បន្ន ការប្រមូលពលករចំណាកស្រុកចូលមណ្ឌលចត្តាឡីស័ក ងាយស្រួលជាងមុន ដោយសារអាជ្ញាធរថៃមួយរយៈចុងក្រោយនេះ បានជួយដឹកកម្មករមកទុកនៅច្រកព្រំដែនស្របច្បាប់ ដោយមិនទុកចោលតាមព្រំដែនដែលធ្វើឱ្យពួកគេអាចប្រឈមនឹងការចាញ់បោកមេខ្យល់ដូចមុន។
កាលពីថ្ងៃទី២០ ខែវិច្ឆិកា រដ្ឋាភិបាលបានប្រកាសពីការផ្ទុះឡើងនូវការឆ្លងជំងឺកូវីដ១៩ក្នុងសហគមន៍ជាថ្មី ដែលផ្តើមចេញពីក្លឹបកម្សាន្តមួយកន្លែងនៅរាជធានីភ្នំពេញ ក្រោយពីសន្តិសុខម្នាក់បានជួយឱ្យស្ត្រីជនជាតិចិន២នាក់ចេញពីកន្លែងធ្វើចត្តាឡីស័ក ដោយមិនគោរពតាមឱ្យបានត្រឹមត្រូវតាមសេចក្តីណែនាំរបស់ក្រសួងសុខាភិបាលកម្ពុជា។ ក្រោយមក ស្រ្តីជនជាតិចិនទាំងពីរនោះត្រូវបានធ្វើតេស្តថា វិជ្ជមានវីរុសកូវីដ១៩។
នាយកប្រតិបត្តិអង្គការតម្លាភាពកម្ពុជា ដែលឃ្លាំមើលបញ្ហាអំពើពុករលួយ លោក ប៉ិច ពិសី ផ្តល់យោបល់ថា ដើម្បីបញ្ចៀសផលប៉ះពាល់ធ្ងន់ធ្ងរដល់សង្គមជាតិ និងប្រជាពលរដ្ឋ រួមទាំងធានាដល់ប្រសិទ្ធភាពនៃការទប់ស្កាត់ការឆ្លងជំងឺកូវីដ១៩ចូលសហគមន៍ អាជ្ញាធរពាក់ព័ន្ធត្រូវទប់ស្កាត់កុំឱ្យមានការទទួលសំណូកពីអ្នកកំពុងតាមដានសុខភាពអំឡុងធ្វើចត្តាឡីស័ក។
លោកថា៖ «មើលទាំងអស់ មើលទាំងការចេញចូល ដោយអត់មានការអនុញ្ញាត ការអនុវត្តធ្វើចត្តាឡីស័កជាក់លាក់ ហើយបើសិនជាមានការស៊ីសំណូកសូកប៉ាន់ អាហ្នឹងត្រូវមានយន្តការត្រួតពិនិត្យមើលជាក់លាក់ កុំឱ្យមានការហ្នឹងកើតឡើង»។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា មានប្រសាសន៍ថា កម្លាំងនគរបាលបានពង្រឹងសន្តិសុខនិងសណ្តាប់ធ្នាប់នៅកន្លែងធ្វើចត្តាឡីស័ក ២៤ម៉ោងលើ២៤ម៉ោង ចាប់តាំងពីកម្ពុជាផ្ទុះជំងឺនេះក្នុងព្រឹត្តិការណ៍៣វិច្ឆិកា រហូតព្រឹត្តិការណ៍សហគមន៍២០កុម្ភៈនេះ។
លោកថា បច្ចុប្បន្ន កម្លាំងនគរបាលសរុបជាង៦០០នាក់ត្រូវបានដាក់ពង្រាយតាមគោលដៅក្នុងរាជធានីភ្នំពេញ ហើយថា កងកម្លាំងណាដែលអនុវត្តផ្ទុយពីច្បាប់ នឹងត្រូវផ្តន្ទាទោស។
លោកបញ្ជាក់ថា៖ «បើសិនជាមានករណីហ្នឹងកើតឡើង ហើយបើយើងរកឃើញការពិត យើងដឹងថាគាត់ប្រព្រឹត្តអ៊ីចឹងមែន យើងនឹងអនុវត្តតាមច្បាប់ អនុក្រឹត្យថ្មីមានហើយ អ៊ីចឹងយើងអនុវត្តតាមអនុក្រឹត្យហ្នឹង»។
តាមអនុក្រឹត្យថ្មី អ្នកដែលគេចវេះនិងអ្នកគេចចេញពីកន្លែងធ្វើចត្តាឡីស័ក ត្រូវពិន័យប្រាក់ពី១ ០០០ ០០០រៀល ដល់៥ ០០០ ០០០រៀល ខណៈអ្នកដែលនាំអ្នកដទៃគេចវេះពីការធ្វើចត្តាឡីស័ក នឹងត្រូវពិន័យពី១០ ០០០ ០០០រៀល ដល់៥០ ០០០ ០០០រៀល៕