អង្គការ-សមាគមអ្នកសារព័ត៌មានចំនួន៣ បានអំពាវនាវឱ្យព្រះរាជអាជ្ញាខេត្តរតនគិរី ពិចារណាក្នុងការទម្លាក់ចោលបទចោទទៅលើអតីតអ្នកកាសែត ឌឹ ខេមបូឌាដេលី ចំនួន២រូប។
លោក អូន ភាព និងលោក Zsombor Peter អតីតអ្នកកាសែត ឌឹ ខេមបូឌាដេលី ត្រូវបានតុលាការខេត្តរតនគិរី ចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» កាលពីចុងឆ្នាំ២០១៧ ប៉ុន្តែនៅខែវិច្ឆិកា ឆ្នាំ២០២០ តុលាការបានសម្រេចទម្លាក់ចោលបទចោទប្រកាន់ទៅលើពួកគេវិញ បន្ទាប់ពីភាគីដើមបណ្ដឹងបានដកពាក្យបណ្ដឹង។ តែយ៉ាងណា ព្រះរាជអាជ្ញាខេត្តនេះបានប្តឹងជំទាស់លើសេចក្តីសម្រេចរបស់តុលាការខេត្ត ទៅសាលាឧទ្ធរណ៍។
ក្នុងសេចក្តីថ្លែងការណ៍រួមរបស់អង្គការ-សមាគមអ្នកសារព័ត៌មានចំនួន ៣ រួមមាន មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) សមាគមសម្ព័ន្ធអ្នកសារព័ត៌មានកម្ពុជា (CamboJA) និងក្លឹបអ្នកសារព័ត៌មានបរទេសនៃកម្ពុជា (CPCC) នៅថ្ងៃនេះ បានអំពាវនាវឱ្យតុលាការកម្ពុជាពន្លឿនដំណើរការក្តីករណីរបស់អតីតអ្នកកាសែត ឌឹ ខេមបូឌាដេលី ពីរនាក់ រួមមាន លោក អូន ភាព និងលោក Zsombor Peter។
សេចក្តីថ្លែងការណ៍ដដែលក៏បានស្នើដល់ព្រះរាជអាជ្ញាបង្ហាញភស្តុតាងដែលអាចបញ្ជាក់ថា អតីតអ្នកកាសែតទាំងពីរនាក់នេះមានពិរុទ្ធភាពក្នុងបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ឬមិនដូច្នេះទេ ពួកគេស្នើឱ្យព្រះរាជអាជ្ញាទម្លាក់ចោលពាក្យបណ្តឹងរបស់ខ្លួននៅឯសាលាឧទ្ធរណ៍ដែលឱ្យបន្តរឿងក្តីមួយនេះ។
តាមរយៈសេចក្តីថ្លែងការណ៍រួមរបស់អង្គការ-សមាគមទាំង ៣ បានលើកឡើងថា៖ «ចាប់តាំងពីមានពាក្យបណ្ដឹងទៅលើអតីតអ្នកកាសែតទាំងពីរនាក់ជាងបីឆ្នាំកន្លងមក តុលាការនៅមិនមានភស្ដុតាងណាមួយដែលបញ្ជាក់ថា ពួកគេទាំងពីរមានកំហុសឬពិរុទ្ធភាពនោះទេ […] ការអូសបន្លាយនេះ គឺជាគោលដៅនៃយុទ្ធនាការនៃការយាយី និងការបំភិតបំភ័យតាមផ្លូវតុលាការ ដែលមិនមានការបង្ហាញភស្ដុតាងផ្លូវច្បាប់ត្រឹមត្រូវឡើយ»។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក គឹម សន្តិភាព បានបដិសេធអត្ថាធិប្បាយ ដោយប្រាប់ថាជាប់រវល់។
ប៉ុន្តែលោកបានបញ្ចេញប្រតិកម្មតាមរយៈគណនីហ្វេសប៊ុករបស់លោក នៅព្រឹកថ្ងៃទី២៥ ខែកុម្ភៈនេះ ដោយបានចាត់ទុកសេចក្តីថ្លែងការណ៍នោះ ថាជាទម្រង់មួយនៃការប៉ុនប៉ងជ្រៀតជ្រែកចូលក្នុងកិច្ចការរបស់តុលាការដែលជាស្ថាប័នឯករាជ្យរបស់កម្ពុជា។
លោកបានចោទជាសំណួរត្រលប់ទៅវិញថា «តើនៅស្រុកណាដែលព្រះរាជអាជ្ញាត្រូវយកភស្តុតាងនៃសំណុំរឿង មកបង្ហាញមុននឹងដំណើរការចោទប្រកាន់ ឬត្រូវរាយការណ៍ពីដំណើរការនីតិវិធី?»
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី បានថ្លែងបន្ថែមលើសេចក្តីថ្លែងការណ៍នេះថា ការប្តឹងឧទ្ធរណ៍នេះ ជាផ្នែកមួយទៀតនៃការដាក់បន្ទុកលើអ្នកកាសែតទាំងពីរនាក់ និងជាផ្នែកមួយនៃការបង្ហាញពីស្ថានភាពនៃសេរីភាពសារព័ត៌មាននៅកម្ពុជា។
លោកបន្តថា សេចក្តីថ្លែងការណ៍របស់អង្គការ និងសម្ព័ន្ធអ្នកសារព័ត៌មានកម្ពុជានេះ មិនមែនជាការជ្រៀតជ្រែកកិច្ចការរបស់តុលាការនោះទេ តែវាជាតួនាទីរបស់អង្គការនិងសមាគម ដើម្បីលើកកម្ពស់សេរីភាពសារព័ត៌មាននៅកម្ពុជា។
លោកមានប្រសាសន៍ដូច្នេះថា៖ «លោក [គឹម សន្តិភាព] លើកឡើងពីការជ្រៀតជ្រែកនេះ តាមពិតអង្គការសមាគមយើងធ្វើការដើម្បីការពារ ដើម្បីលើកកម្ពស់ សេរីភាព វិជ្ជាជីវៈរបស់អ្នកសារព័ត៌មាន។ ខ្ញុំគិតថា យើងធ្វើការទៅតាមតួនាទីរបស់ពួកយើង ដើម្បីទទូចដល់ភាគីពាក់ព័ន្ធ រួមជាមួយនឹងតុលាការ ពិចារណាដោយផ្អែកទៅលើច្បាប់ឬគោលការណ៍ច្បាប់អន្តរជាតិផ្សេងៗ ហើយជាពិសេស យើងតែងទទូចឱ្យប្រើប្រាស់ច្បាប់ស្តីពីរបបសារព័ត៌មាន»។
គួររំឭកថា អតីតអ្នកកាសែត ឌឹ ខេមបូឌាដេលី លោក អូន ភាព និងលោក Zsombor Peter ត្រូវបានតុលាការខេត្តរតនគីរី ចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» បន្ទាប់ពីពួកគេបានសម្ភាសជាមួយពលរដ្ឋអំពីការបោះឆ្នោតនៅឆ្នាំ២០១៧។ ការចោទប្រកាន់នេះត្រូវបានអង្គការ-សមាគមទាំង៣នេះចាត់ទុកថា ជាការវាយប្រហារទៅលើអ្នកកាសែតដែលបានឈ្នះពានរង្វាន់ទាំងពីរនាក់ និងទៅលើវិជ្ជាជីវៈរបស់អ្នកកាសែត ក៏ដូចជាសេរីភាពសារព័ត៌មាននៅកម្ពុជា ក្រោមការអះអាងថាជាការអនុវត្តច្បាប់៕