ក្រសួងមហាផ្ទៃ នឹងបញ្ជូននាយកសារព័ត៌មាន Angkor Today ជាជនជាតិចិន ទៅប្រទេសចិនវិញ នៅយប់ថ្ងៃព្រហស្បតិ៍នេះ ក្រោយពីនាយកអង្គភាពសារព័ត៌មានមួយនេះបានផ្សព្វផ្សាយព័ត៌មានមួយនៅលើគេហទំព័ររបស់ខ្លួនថា «កម្ពុជាលក់វ៉ាក់សាំងការពារកូវីដ១៩ របស់ចិនក្នុងតម្លៃ១២០ដុល្លារ» ។
ការសម្រេចរបស់ក្រសួងបានធ្វើឡើងក្រោយពីក្រសួងសុខាភិបាលបានប្រតិកម្មនិងច្រានចោលការចុះផ្សាយរបស់សារព័ត៌មាន Angkor Today ដែលពីមុនដាក់ឈ្មោះថា Angkor Times បានផ្សព្វផ្សាយថា កម្ពុជាលក់ថ្នាំវ៉ាក់សាំងប្រឆាំងកូវីដ១៩ ដែលជាជំនួយរបស់ចិន នៅមន្ទីរពេទ្យកាល់ម៉ែត្រ។ ករណីនេះ ក្រសួងសុខាភិបាលក៏បានស្នើឱ្យអាជ្ញាធរមានសមត្ថកិច្ច ចាត់វិធានការផ្លូវច្បាប់ទៅលើការផ្សាយព័ត៌មានដែលប្រាសចាកពីការពិតនេះ។
ស្នងការនគរបាលខេត្តសៀមរាប លោក ទិត្យ ណារ៉ុង ប្រាប់ វីអូឌី ថា សមត្ថកិច្ចខេត្តបានចាប់ខ្លួនជនជាតិចិន លោក SHEN KAIDONG ដែលជានាយកសារព័ត៌មាន Angkor Today កាលពីល្ងាចថ្ងៃទី២៤ ខែកុម្ភៈ ឆ្នាំ២០២១ នៅខេត្តសៀមរាប បន្ទាប់មក បញ្ជូនបុគ្គលនោះទៅភ្នំពេញ ដើម្បីចាត់វិធានការបន្តតាមនីតិវិធីច្បាប់។ តែយ៉ាងណា លោកបដិសេធឆ្លើយលម្អិតជុំវិញការចាប់ខ្លួននេះ។
យោងតាមប្រកាស ស្តីពី ការបណ្តេញជនបរទេសចេញពីព្រះរាជាណាចក្រកម្ពុជា របស់ក្រសួងមហាផ្ទៃ នៅថ្ងៃទី២៥ ខែកុម្ភៈ ឆ្នាំ២០២១នេះ បានសម្រេចបណ្តេញជនជាតិចិន ឈ្មោះ SHEN KAI DONG ដែលជានាយកសារព័ត៌មាន Angkor Today ចេញពីកម្ពុជាទៅប្រទេសដើមវិញ និងហាមឃាត់ការចូលប្រទេសកម្ពុជាជាថ្មី ពាក់ព័ន្ធនឹងការប្រព្រឹត្តបទល្មើសផ្សាយព័ត៌មានមិនពិត ដែលថា «កម្ពុជាលក់វ៉ាក់សាំងការពារកូវីដ១៩ របស់ចិន ក្នុងតម្លៃ១២០ដុល្លារ»។
ប្រកាសដដែលបញ្ជាក់ថា អគ្គលេខាដ្ឋានអន្តោប្រវេសន៍មានភារកិច្ចបណ្តេញជនបរទេសរូបនោះ ចេញពីកម្ពុជា ក្នុងរយៈពេល៧ថ្ងៃយ៉ាងយូរ ដោយគិតចាប់ពីថ្ងៃចេញប្រកាសនេះ។
វីអូឌី មិនអាចសុំការបញ្ជាក់ពីអ្នកនាំពាក្យក្រសួងមហាផ្ទៃ លោក ខៀវ សុភ័គ និងលោក ផាត សុផានិត បានទេនៅថ្ងៃនេះ។
អគ្គនាយករងនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក កៅ វណ្ណថន មានប្រសាសន៍ថា មន្ត្រីជំនាញកំពុងរៀបចំឯកសារ និងត្រៀមបញ្ជូនលោក SHEN KAIDONG នាយកសារព័ត៌មាន Angkor Today ទៅប្រទេសចិនវិញ នៅយប់ថ្ងៃព្រហស្បតិ៍នេះ និងឈប់ឱ្យបុគ្គលរូបនេះមកកម្ពុជា ដោយសារគាត់ប្រព្រឹត្តខុសច្បាប់អន្តោប្រវេសន៍។
លោកមានប្រសាសន៍ថា៖ «នៅក្នុងច្បាប់អន្តោប្រវេសន៍ ជនបរទេសដែលផ្សព្វផ្សាយព័ត៌មានមិនពិត ធ្វើឱ្យប៉ះពាល់ដល់សន្តិសុខជាតិ ក្នុងច្បាប់អន្តោប្រវេសន៍ចង្អុលថា រដ្ឋមន្ត្រីក្រសួងមហាផ្ទៃ ត្រូវបណ្តេញចេញជនបរទេសទាំងឡាយណាដែលប្រព្រឹត្តបទល្មើសនៅកម្ពុជា ពាក់ព័ន្ធនឹងសន្តិសុខជាតិ អញ្ចឹងរដ្ឋមន្ត្រីគាត់មានសិទ្ធិចេញសេចក្តីប្រកាសបណ្តេញចេញ អាហ្នឹងហើយជាការអនុវត្តច្បាប់»។
នៅពេលសួរថា ហេតុអ្វីបានជាអាជ្ញាធរមិនយកច្បាប់ស្តីពីរបបសារព័ត៌មានមកអនុវត្តលើរឿងនេះ លោក កៅ វណ្ណថន បកស្រាយយ៉ាងខ្លីថា លោកធ្វើតាមបញ្ជារបស់ថ្នាក់លើតែប៉ុណ្ណោះ។
ពាក់ព័ន្ធនឹងករណីនេះ ក្រសួងព័ត៌មានក៏បានសម្រេចលុបចោលអាជ្ញាបណ្ណ សារព័ត៌មាន Angkor Today នេះដែរ ដោយលើកហេតុផលថា ម្ចាស់អាជ្ញាបណ្ណបានផ្សព្វផ្សាយព័ត៌មានបំភ្លៃការពិត និងមានចេតនាទុច្ចរិត ធ្វើឱ្យអន្តរាយដល់សុខភាពសាធារណៈ បង្កភាពច្របូកច្របល់ និងចលាចលនៅក្នុងសង្គម ដែលអាចប៉ះពាល់សន្តិសុខជាតិ និងប៉ះពាល់ដល់កិត្យានុភាពរដ្ឋាភិបាល ហើយបំពានយ៉ាងធ្ងន់ធ្ងរលើវិជ្ជាជីវៈ និងកិច្ចសន្យាដែលសាម៉ីខ្លួនបានតម្កល់នៅក្រសួងព័ត៌មាន។ នេះបើតាមប្រកាសរបស់ក្រសួងដែលផ្សព្វផ្សាយនៅថ្ងៃព្រហស្បតិ៍នេះ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី ជំរុញទៅអាជ្ញាធរពាក់ព័ន្ធធ្វើការស្រាវជ្រាវជុំវិញព័ត៌មានដែលជនជាតិចិនផ្សព្វផ្សាយថា កម្ពុជាលក់វ៉ាក់សាំងការពារកូវីដ១៩របស់ចិននេះឱ្យបានច្បាស់លាស់ជាមុនសិន មុននឹងមានវិធានការតាមផ្លូវច្បាប់។
លោកបន្តថា បើសិនជាអាជ្ញាធររកឃើញថាជនជាតិចិននោះបានផ្សព្វផ្សាយព័ត៌មានមិនពិតមែន អាជ្ញាធរត្រូវយកច្បាប់ស្តីពីរបបសារព័ត៌មានមកអនុវត្ត ជាជាងយកក្រមព្រហ្មទណ្ឌទៅអនុវត្ត ដើម្បីកុំឱ្យប៉ះពាល់ដល់សេរីភាពអ្នកសារព័ត៌មាន។
លោកមានប្រសាសន៍ថា៖ «យើងទទូចឱ្យមានការសិក្សាស្រាវជ្រាវឱ្យបានច្បាស់លាស់ ស៊ើបអង្កេតឱ្យបានច្បាស់លាស់ មុនពេលដែលយើងធ្វើការចោទប្រកាន់ទី១។ ទី២ អំពាវនាវឱ្យមានការប្រើប្រាស់ច្បាប់ស្តីពីរបបសារព័ត៌មាន ដើម្បីចាត់វិធានការ ជាជាងយើងប្រើប្រាស់ច្បាប់ស្តីពីក្រមព្រហ្មទណ្ឌ យកទៅចាប់ខ្លួនគាត់ឬក៏ដកអាជ្ញាបណ្ណឆាប់រហ័សពេក វាធ្វើឱ្យប៉ះពាល់ដល់សេរីភាពរបស់អ្នកសារព័ត៌មាននៅក្នុងប្រទេសកម្ពុជា»។
គួរបញ្ជាក់ថា សារព័ត៌មាន Angkor Today នេះ មានឈ្មោះពីមុនជា Angkor Times ដែលស្ថិតក្រោមការគ្រប់គ្រងម្ចាស់ដែលជាជនជាតិចិនតែម្នាក់ ឈ្មោះ លោក SHEN KAIDONG ហើយបច្ចុប្បន្នមានទីស្នាក់ការអចិន្ត្រៃយិ៍នៅខេត្តសៀមរាប។
បើតាមទំព័រហ្វេសប៊ុករបស់ក្រសួងសុខាភិបាលកម្ពុជា កាលពីថ្ងៃម្សិលមិញ ស្ថានទូតសាធារណរដ្ឋប្រជាមានិតចិនប្រចាំនៅកម្ពុជា ក៏បានក្រើនរំឭកដល់ពលរដ្ឋចិនដែលកំពុងរស់នៅកម្ពុជា ឱ្យមានការប្រុងប្រយ័ត្នខ្ពស់ពីការផ្សាយបោកប្រាស់អំពីការលក់វ៉ាក់សាំងកូវីដ១៩ នាពេលថ្មីៗនេះផងដែរ។
ស្ថានទូតចិនបន្តថា ខ្លួនបានទទួលព័ត៌មានពីពលរដ្ឋចិនដែលកំពុងរស់នៅប្រទេសកម្ពុជាថា មានការផ្ញើសារជាភាសាចិនតាមរយៈទូរសព្ទ ដែលសរសេរថា «ចំណាយប្រាក់ត្រឹមតែ ១២០ ដុល្លារអាមេរិកប៉ុណ្ណោះ នឹងអាចទទួលបានការចាក់វ៉ាក់សាំងបង្ការជំងឺកូវីដ១៩ នៅក្នុងប្រទេសកម្ពុជា» ហើយមានមនុស្សមួយចំនួនទៀតបានផ្សព្វផ្សាយជាសាធារណៈតាមបណ្តាញសង្គម «លក់វ៉ាក់សាំងកូវីដរបស់ប្រទេសចិន ក្នុងតម្លៃ ៤៥០ដុល្លារ» ផងដែរ។
ស្ថានទូតចិនបានបញ្ជាក់ថា វ៉ាក់សាំងកូវីដ១៩ ដែលជាជំនួយរបស់ចិននេះ ត្រូវបានរដ្ឋាភិបាលកម្ពុជាគ្រប់គ្រងបានល្អ និងមិនមានវ៉ាក់សាំងហូរចូលក្នុងទីផ្សារឡើយ ខណៈការរក្សាទុកឬការដឹកជញ្ជូនវ៉ាក់សាំងនេះ តម្រូវឱ្យមានការប្រយ័ត្នប្រយែងនិងគ្រប់គ្រងយ៉ាងតឹងរ៉ឹងបំផុត។
ស្ថានទូតនេះបន្ថែមថា ចំពោះការចាក់វ៉ាក់សាំងវិញ ក៏ត្រូវតែអនុវត្តដោយអ្នកជំនាញផងដែរ ហើយរាល់ការទទួលបានវ៉ាក់សាំងណាមួយតាមរយៈបណ្តាញក្រៅផ្លូវការ និងការចាក់វ៉ាក់សាំងដោយអ្នកមិនមានជំនាញ អាចបណ្តាលឱ្យមានគ្រោះថ្នាក់ដល់សុខភាពនិងសុវត្ថិភាព និងត្រូវទទួលខុសត្រូវចំពោះមុខច្បាប់៕