ក្រសួងសុខាភិបាលត្រៀមបញ្ជូនអ្នកជំងឺកូវីដ១៩ ទៅមន្ទីរពេទ្យនិងមណ្ឌលសុខភាពនៅជាយក្រុងនិងខេត្តមួយចំនួនជាប់រាជធានីភ្នំពេញ ខណៈបន្ទប់នៅមន្ទីរពេទ្យក្នុងរាជធានីភ្នំពេញដែលព្យាបាលអ្នកជំងឺកូវីដ១៩ ពេញអស់ ដោយសារអត្រាអ្នកឆ្លងកើនឡើងលឿន។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់ វីអូឌី នៅថ្ងៃពុធនេះថា អ្នកជំងឺកូវីដ១៩ ដែលឆ្លងក្នុងព្រឹត្តិការណ៍សហគមន៍២០កុម្ភៈ មានការកើនឡើងច្រើន ដែលធ្វើឱ្យបន្ទប់ព្យាបាលរបស់មន្ទីរពេទ្យនៅរាជធានីភ្នំពេញ ពេញអស់ មិនមានបន្ទប់សម្រាប់ព្យាបាលទេ។
ករណីនេះ លោកស្រីថា ក្រសួងបានសម្រេចបញ្ជូនអ្នកជំងឺមួយចំនួនទៅកាន់មន្ទីរពេទ្យបង្អែកជ័យជំនះ ខេត្តកណ្តាល និងត្រៀមមន្ទីរពេទ្យនៅខេត្តកំពង់ស្ពឺបន្ថែមទៀត សម្រាប់អ្នកជំងឺកូវីដ១៩។
លោកស្រីថា៖ «វាពេញហើយ បានយកទៅតាខ្មៅ រំលែកទៅនោះខ្លះ មន្ទីរពេទ្យជ័យជំនះ ខេត្តកណ្ដាល ។ ឥលូវយើងកំពុងត្រៀមហើយ នៅខាងកំពង់ស្ពឺ បើសិននៅនោះពេញ [មន្ទីរពេទ្យជ័យជំនះ ខេត្តកណ្តាល] យើងនឹងបញ្ជូនមកកំពង់ស្ពឺខ្លះ បើសិនជាកំពង់ស្ពឺម៉េចៗទៀត គេកំពុងរកកន្លែងផ្សេងៗទៀត»។
បើតាមសេចក្ដីប្រកាសព័ត៌មានរបស់ក្រសួងសុខភិបាល ចេញផ្សាយនៅថ្ងៃពុធ ទី២៥ ខែកុម្ភៈនេះ ឱ្យដឹងថា អ្នកជំងឺកូវីដ១៩ បានកើនឡើងដល់១៤២នាក់ដែលកំពុងសម្រាកព្យាបាលនៅមន្ទីរពេទ្យចំនួន ៥ រាជធានី-ខេត្ត។
ក្រសួងបន្តថា មន្ទីរពេទ្យដែលអ្នកជំងឺកំពុងសម្រាកព្យាបាលនោះមានដូចជា មន្ទីរពេទ្យមិត្តភាពខ្មែរ-សូវៀត ចំនួន៤៣នាក់ មណ្ឌលសុខភាពចាក់អង្រែ ចំនួន៣៥នាក់ មជ្ឈមណ្ឌលជាតិកំចាត់រោគរបេង និងហង់សិន ចំនួន៤៩នាក់ និងមន្ទីរពេទ្យបង្អែកជ័យជំនះ ខេត្តកណ្ដាល ចំនួន៩នាក់ រួមនឹងសាលារក្សាសន្តិភាពពហុសាស្ត្រកំពង់ស្ពឺ ចំនួន២នាក់។
នាយករងមន្ទីរពេទ្យមិត្តភាពខ្មែរ-សូវៀត លោក ចាន់ វិចិត្រ មានប្រសាសន៍ថា នៅមន្ទីរពេទ្យនេះ មិនអាចទទួលអ្នកជំងឺកូវីដ១៩បានទៀតទេ ព្រោះបន្ទប់សម្រាប់ព្យាបាលពេញអស់ហើយ។
លោកថា៖ «ពេញហើយ អត់មានសល់គ្រែទេ ព្រោះសល់ យើងទុកសម្រាប់សង្គ្រោះបន្ទាន់។ នៅថ្ងៃនេះ គេមិនទាន់ផ្ញើតួលេខអ្នកជំងឺមកឱ្យខ្ញុំទេ ប៉ុន្តែនៅថ្ងៃមុន ជាង៤០នាក់។ កន្លងមក យើងដាក់អ្នកជំងឺបានតែជាង១០នាក់ទេ ដោយព្រឹត្តិការណ៍២០កុម្ភៈ យើងដកអគារមួយសម្រាប់ដាក់បន្ថែមទៀត»។
ចំណែកប្រធានមជ្ឈមណ្ឌលជាតិកំចាត់រោគរបេង និងហង់សិន លោក ហួត ចាន់យុដា មានប្រសាសន៍ថា មន្ទីរពេទ្យរបស់លោកអាចដាក់អ្នកជំងឺកូវីដ១៩ បានចំនួន៥៤នាក់តែប៉ុណ្ណោះ ខណៈបច្ចុប្បន្ន អ្នកជំងឺដែលកំពុងសម្រាកព្យាបាលមានចំនួនដល់ទៅ៥០នាក់ហើយ។
លោកថា៖ «យើងមិនអាចទទួលបានទៀតទេ ដោយសារវាពេញ។ អ៊ីចឹងបើសិនជាមានអ្នកជំងឺណាដែលចេញ យើងអាចទទួលបាន ដើម្បីបង្គ្រប់គ្រែដែលនៅសល់ហ្នឹង»។
គិតត្រឹមថ្ងៃទី២៤ ខែកុម្ភៈ ឆ្នាំ២០២១នេះ កម្ពុជារកឃើញអ្នកឆ្លងជំងឺកូវីដ១៩ ចំនួន៦៣៣នាក់ ក្នុងនោះអ្នកជាសះស្បើយ ចំនួន៤៧៦នាក់ និង អ្នកជំងឺ១៤២នាក់កំពុងសម្រាកព្យាបាលនៅមន្ទីរពេទ្យ។ ក្នុងចំណោមអ្នកជំងឺទាំង៦៣៣នាក់ អ្នកឆ្លងព្រឹត្តិការណ៍សហគមន៍២០កុម្ភៈ ចំនួន១៣៧នាក់៕
