រដ្ឋាភិបាលប្តេជ្ញាប្រយុទ្ធប្រឆាំងគ្រឿងញៀនខុសច្បាប់លើកទី៦ រយៈពេល១ឆ្នាំ ដែលអនុវត្តចាប់ពីដើមខែមករា ដល់ចុងខែធ្នូ ឆ្នាំ២០២១ ដើម្បីកាត់បន្ថយបទល្មើស ការពារសុខភាពសាធារណៈ និងសុវត្ថិភាពសង្គម។
ក្នុងផែនការស្តីពីការប្រយុទ្ធប្រឆាំងគ្រឿងញៀនរបស់រាជរដ្ឋាភិបាល ចុះថ្ងៃទី១៩ ខែកុម្ភៈនេះ បានឱ្យដឹងថា ក្នុងស្ថានភាពពិភពលោកទាំងមូលទទួលរងការវាយប្រហារយ៉ាងធ្ងន់ធ្ងរ ដោយសារការឆ្លងរីករាលដាលនៃជំងឺកូវីដ១៩ ធ្វើឱ្យសកម្មភាពវិនិយោគ ពាណិជ្ជកម្ម ឧស្សាហកម្ម កសិកម្ម សេវាកម្ម និងវប្បធម៌ ជួបវិបត្តិផងដែរ។
ចំណែកស្ថានភាពបទល្មើសគ្រឿងញៀនវិញ រដ្ឋាភិបាលបញ្ជាក់ថា មិនមានសញ្ញាថមថយនៅឡើយ ជាពិសេសកំណើនគ្រឿងញៀនសំយោគ ដូចជា មេតំហ្វេតាមីន អុិចស្តាស៊ី និង រកតាមីន ដែលប្រភេទសារធាតុញៀនទាំងនេះ គឺជាគោលដៅងាយស្រួលក្នុងការលួចលាក់ផលិតកែច្នៃ។
រដ្ឋាភិបាលបន្តថា ពួកឈ្មួញទុច្ចរិតងាយជួញដូរ និងមានទីផ្សារទូលំទូលាយក្នុងពេលបច្ចុប្បន្ន ទាំងក្នុងប្រទេសកម្ពុជា និងឆ្លងកាត់ទៅលក់នៅប្រទេសដទៃជាដើម។
ករណីនេះ លោកនាយករដ្ឋមន្ត្រី ហ៊ុន សែន សម្រេចដាក់ចេញផែនការស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់នេះ ដើម្បីកាត់បន្ថយបទល្មើស រក្សាសណ្តាប់ធ្នាក់សាធារណៈ សុវត្ថិភាពសង្គម លើកកម្ពស់ការអភិវឌ្ឍធនធានយុវជន ជាដើម។
ផែនការរបស់រដ្ឋាភិបាលដែលបានដាក់ចេញនោះ រួមមាន បង្កើនការផ្សព្វផ្សាយអប់រំពលរដ្ឋទូទៅ ជាពិសេសមុខសញ្ញារងគ្រោះនិងងាយរងគ្រោះ រៀបចំវេទិកាជួបជាមួយវិស័យឯកជននិងសប្បុរសជន ជាពិសេសម្ចាស់ឬអ្នកគ្រប់គ្រងអាជីវកម្មដែលងាយរងហានិភ័យនឹងគ្រឿងញៀន និងបង្កើនការស្រាវជ្រាវ ស៊ើបអង្កេត បង្ការនិងទប់ស្កាត់ និងបង្ក្រាបការនាំចូលឆ្លងកាត់ជួញដូរឆ្លងដែនជាមួយប្រទេសជិតខាង រួមទាំងការស្វែងរកទីតាំងលួចលាក់ ដាំដុះ ផលិត កែច្នៃសារធាតុញៀននៅក្នុងប្រទេស ជាពិសេសស្វែងរកឧក្រិដ្ឋជនជួញដូរគ្រឿងញៀនធំៗ។
ផែនការដដែលនោះក៏នឹងលើកកម្ពស់សមត្ថភាពមន្ត្រីអនុវត្តច្បាប់ ពង្រីកកិច្ចសហប្រតិបត្តិការអន្តរជាតិ និងបង្ក្រាបគ្រឿងញៀនខុសច្បាប់ ឱ្យកាន់តែមានប្រសិទ្ធភាពខ្ពស់ជាដើម។
វីអូឌី មិនអាចសុំការបញ្ជាក់ពីអគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ បានទេ។
ចំណែកអគ្គស្នងការរងនគរបាលជាតិទទួលផែនប្រឆាំងគ្រឿងញៀន លោក ម៉ក់ ជីតូ សុំមិនធ្វើការបកស្រាយទេ ដោយថា ជាប់រវល់ប្រជុំ។
ប្រធានសមាគមសង្គ្រោះជនរងគ្រោះដោយគ្រឿងញៀនកម្ពុជា ហៅកាត់ថា DARAC លោក មាស សុវណ្ណ គាំទ្រនឹងវិធានការរបស់រដ្ឋាភិបាល ប៉ុន្តែលោកថា ការទប់ស្កាត់បទល្មើសគ្រឿងញៀនបាន លុះត្រាតែរដ្ឋាភិបាលជំរុញទៅស្ថាប័នពាក់ព័ន្ធស្វែងរកចាប់មេខ្លោង និងពង្រឹងការអនុវត្តច្បាប់ដោយស្មើភាព។
លោកមានប្រសាសន៍ថា៖ «អត់ចាប់បានមេខ្លោង វាគ្រាន់តែជាការវែកចកឱ្យវាវាល គ្រាន់តែធ្វើផ្លូវដើរ។ បើយើងចាប់បានមេខ្លោង បានឃើញថាវាថយចុះខ្លាំង។ ចាប់បានមេខ្លោងទៅ វាអត់មានអ្នកធ្វើផែនការជួញដូរ [គ្រឿងញៀន] ហ្នឹងទៀតទេ»។
តាមរបាយការណ៍របស់រាជរដ្ឋាភិបាល ចុះផ្សាយកាលពីថ្ងៃទី១៩ ខែកុម្ភៈ ឆ្នាំ២០២១នេះ បានបញ្ជាក់ថា ការអនុវត្តផែនការយុទ្ធនាការលើកទី៥ កាលពីឆ្នាំ២០២០ សមត្ថកិច្ចពាក់ព័ន្ធបានបើកប្រតិបត្តិការយ៉ាងសកម្ម ដោយបង្ក្រាបបានចំនួន ១០ ៤៦១ ករណី ឃាត់ខ្លួនជនសង្ស័យចំនួន ២១ ៥៦៦ នាក់ ចាប់យកសារធាតុញៀនគ្រប់ប្រភេទសរុបទម្ងន់ ៣ ៨៧៥,៩០ គីឡូក្រាម និងសារធាតុគីមីផ្សំសរុបទម្ងន់ ៤ ៤២៥ គីឡូក្រាម រួមទាំងមធ្យោបាយ សម្ភារ និងវត្ថុតាងមួយចំនួនធំ ដែលក្នុងនោះ ករណីជួញដូរគ្រឿងញៀនធំៗមានចំនួន ៧៧ ករណី (មេខ្លោង ៣១ នាក់ និងខ្សែរយៈបណ្តាញ ១២៤ នាក់)៕
