កូនប្រុស២នាក់របស់អតីតយោធាថ្នាក់ឧត្តមសេនីយ៍ត្រីម្នាក់ បានប្ដឹងទៅរដ្ឋមន្ត្រីការពារជាតិ ទាមទារដីកេរឪពុករបស់ខ្លួន ដោយចោទប្រកាន់គ្រូទាហាន៣នាក់ និងនាយរងមណ្ឌលទ័ពថ្មើរជើងម្នាក់នៃមជ្ឈមណ្ឌលហ្វឹកហ្វឺនកងទ័ពជើងគោកថាបានរំលោភយកដីរបស់ពួកគេ។
លិខិតមួយច្បាប់ផ្ញើជូនរដ្ឋមន្ត្រីក្រសួងការពារជាតិ កាលពីថ្ងៃទី១៥ ខែកុម្ភៈនេះ បានឱ្យដឹងថា ដើមបណ្ដឹងឈ្មោះ លាវ វ៉ិនដា និង លាវ វ៉ិនដេយ៍ ជាកូនរបស់អតីតយោធាថ្នាក់ឧត្តមសេនីយ៍ត្រីម្នាក់ បានប្ដឹងបុគ្គលមន្ត្រីយោធា៤នាក់ រួមមាន ឈ្មោះ សេក ប៊ុណ្ណា, នី សុភ័ក្រ, សឿង យ៉ាន និង កើត វាសនា ថាបានគំរាមកំហែងនិងរំលោភយកដីរបស់ពួកគេទំហំជាង២ហិកតា ស្ថិតនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
លិខិតដដែលបន្តថា ដីនោះគឺជាមរតកដែលបន្សល់ពីឈ្មោះ លាវ ហ៊ត ជាអតីតមន្ត្រីយោធា ទុកឱ្យកូនរបស់ខ្លួន។
កូនអតីតយោធាម្នាក់ លោក លាវ វ៉ិនដា បានឱ្យដឹងកាលពីថ្ងៃទី២២ ខែកុម្ភៈថា មន្ត្រីយោធាទាំង៤នាក់នោះ បានរំលោភយកដីនិងសង់ផ្ទះលើដីឪពុករបស់លោក តាំងពីឆ្នាំ២០១៨មក។
លោកបន្តថា អំឡុងពេលនោះ លោកក៏បានដាក់ពាក្យបណ្ដឹងទៅរដ្ឋបាលស្រុក រដ្ឋបាលខេត្ត និងតុលាការខេត្តកំពង់ស្ពឺ ដើម្បីទាមទាររកយុត្តិធម៌ផងដែរ ប៉ុន្តែមិនមានដំណោះស្រាយអ្វីឡើយ ទើបលោកសម្រេចចិត្តប្ដឹងទៅរដ្ឋមន្ត្រីក្រសួងការពារជាតិ ឱ្យជួយរកដំណោះស្រាយ។
លោកមានប្រសាសន៍ថា៖ «[ឪពុកខ្ញុំ] ពីមុន គាត់ជាយោធា ម្ចាស់ដីចាស់ [ក៏ជាអតីតយោធា] ទិញដីនោះក្នុងតម្លៃ១០០ដុល្លារ។ ប្ដឹងគ្រាន់តែចង់បានដីរបស់ខ្ញុំទាំងអស់មកវិញ»។
លោក លាវ វ៉ិនដា បន្ថែមថា លោកបានធ្វើប្លង់កម្មសិទ្ធិដីនោះតាំងពីឆ្នាំ២០០៦មកម៉្លេះ ខណៈមន្ត្រីយោធាទាំងបួននោះក៏មានប្លង់កាន់កាប់ដូចគ្នា ប៉ុន្តែធ្វើក្នុងឆ្នាំ២០១៨។
ចំណែកអតីតម្ចាស់ដី លោក សូ លី ជាអតីតអ្នកចាត់ការទូទៅនៃមជ្ឈមណ្ឌលហ្វឹកហ្វឺនកងទ័ពជើងគោក បានឱ្យដឹងថា ដីនោះ លោកបានប្រគល់ឱ្យទៅលោក លាវ ហ៊ត នៅឆ្នាំ២០០២ ជាថ្នូរនឹងប្រាក់មួយចំនួន ប៉ុន្តែលោកមិនបានចាំច្បាស់នោះទេ។
លោកបញ្ជាក់ថា៖ «កាលហ្នឹងអត់មានប្លង់ទេ។ ចាប់នៅរៀងៗខ្លួន [ប្រគល់ឱ្យ] ឆ្នាំ២០០២»។
ទោះជាយ៉ាងណា លោក ឈុន ឆេង នាយសេនាធិការរង នាយកមជ្ឈមណ្ឌលហ្វឹកហ្វឺនកងទ័ពជើងគោក មានប្រសាសន៍ថា ករណីនេះជារឿងវិវាទរវាងបុគ្គលនិងបុគ្គល ហើយលោកមិនដឹងលម្អិតអំពីរឿងនេះនោះទេ។
លោកថា៖ «ពាក់ព័ន្ធកិច្ចការហ្នឹង ខ្ញុំអត់មានចូលជ្រៅរឿងនេះទេ ព្រោះជារឿងបុគ្គល កាន់កាប់រៀងខ្លួន។ ខាងទាហានគេថារបស់គេ បុគ្គលដែលប្ដឹងគេថារបស់គេ អ៊ីចឹងខ្ញុំអត់ដឹងខាងណា ខ្ញុំក្ដោបអត់បាន ខ្ញុំនិយាយអត់កើត»។
អ្នកនាំពាក្យក្រសួងការពារជាតិ លោក ឈុំ សុជាតិ បានអះអាងថា លោកមិនទាន់ដឹងដំណើររឿងនេះនៅឡើយ ប៉ុន្តែលោកនឹងចាត់ក្រុមការងារឱ្យចុះស្រាវជ្រាវ។
លោកមានប្រសាសន៍ថា៖ «អត់ដឹងទេ! រឿងប្ដឹងផ្ដល់ ដល់សួរតុលាការយោធា។ ចាំមើលផុតការងារបន្តិច ព្រោះឥលូវរវល់រឿងកូវីដ ចាំខ្ញុំស្រាវជ្រាវឱ្យ បែបនៅខុទ្ធកាល័យ មិនទាន់ដល់រដ្ឋមន្ត្រីទេ ចាំឱ្យគេស្រាវជ្រាវឱ្យ។ រឿងបុគ្គលគាត់ ខ្ញុំអត់ដឹងទេ យល់យ៉ាងណា ចាំមើលឯកសារសិន»៕
