ក្រសួងសុខាភិបាល និងអង្គការសុខភាពពិភពលោក បានព្រមានថា កូវីដ១៩បំប្លែងថ្មីដែលទើបត្រូវបានរកឃើញក្នុងប្រទេសកម្ពុជានាប៉ុន្មានថ្ងៃមកនេះ អាចនឹងធ្វើឱ្យអ្នកជំងឺស្លាប់បាន បើមានការធ្វេសប្រហែស ដោយសារតែការចម្លងរបស់វាមានល្បឿនលឿនជាងមុនជិត២ដង ហើយថែមទាំងពិបាកព្យាបាលទៀតផង។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ថ្លែងក្នុងសន្និសីទសារព័ត៌មានក្នុងរាជធានីភ្នំពេញ នាថ្ងៃនេះថា ប៉ុន្មានសប្តាហ៍មុន ក្រសួងរកឃើញអ្នកធ្វើដំណើរមកកម្ពុជា៣នាក់ មានផ្ទុកកូវីដ១៩ដែលបំប្លែងថ្មីនេះ លើជនជាតិឥណ្ឌាពីរនាក់ និងជនជាតិចិនម្នាក់។
លោកស្រីបន្តថា ព្រឹត្តិការណ៍«២០កុម្ភៈ»នេះ ក្រសួងរកឃើញអ្នកឆ្លងកូវីដ១៩បំប្លែងថ្មី ដែលថាលទ្ធផលទទួលបានពីវិទ្យាស្ថានប៉ាស្ទ័រកម្ពុជា កាលពីល្ងាចម្សិលមិញ ដែលលោកស្រីថា នេះជាការព្រួយបារម្ភមួយ សូម្បីតែនាយករដ្ឋមន្ត្រីក៏មិនបានសម្រាកដែរ។
លោកស្រីថា៖ «កុំមើលស្រាលទៅលើការវាយលុករបស់វីរុសកូវីដ១៩ ជាពិសេសអាប្រភេទអាបំប្លែងថ្មីនេះ វានឹងអាចធ្វើឱ្យអ្នកជំងឺវិវត្តទៅរកសេចក្តីស្លាប់បាន ប្រសិនបើបុគ្គលនោះមិនទទួលបាននូវការពិនិត្យព្យាបាលទាន់ពេលវេលា ហើយមានការព្យាបាលត្រឹមត្រូវពីក្រុមគ្រូពេទ្យរបស់យើងទេនោះ»។
លោកស្រី ឱ វណ្ណឌីន គូសបញ្ជាក់ថា វីរុសបំប្លែងថ្មីនេះឆ្លងក្នុងល្បឿនលឿនជិតពីរដង បើធៀបនឹងវីរុសបច្ចុប្បន្ន ហើយថា ការព្យាបាលក៏ពិបាកដូចគ្នា។
លោកស្រីថា៖ «ឧទាហរណ៍ថា បើវីរុសបច្ចុប្បន្ននេះ វាឆ្លង៤នាក់ឬ៥នាក់ ដែលម្នាក់មានចម្លង៤នាក់៥នាក់ក្នុងពេលតែមួយ។ ដល់ទៅអាបំប្លែងថ្មីនេះ វាឆ្លងពី៧ទៅ៨នាក់ក្នុងពេលតែមួយ វាខុសគ្នាអ៊ីចឹង ហើយកម្លាំងវាក៏ខ្លាំងដែរ ហើយដោយសារអាស្បែកប្រូតេអ៊ីនវាក្រាស់ ការព្យាបាលក៏រាងយ៉ាប់ដែរ ដោយសារវាអត់ងាយចាញ់ ហើយវាជាប់នៅក្នុងកោសិកាយើងហ្នឹងខ្លាំង»។
តំណាងអង្គការសុខភាពពិភពលោកប្រចាំកម្ពុជា លោកស្រីវេជ្ជបណ្ឌិត លី អាយលែន មានប្រសាសន៍ក្នុងសន្និសីទនោះដែរថា អង្គការសុខភាពពិភពលោកមានការព្រួយបារម្ភថា វាអាចជាហានិភ័យសុខភាពសាធារណៈ ដែលតម្រូវឱ្យគ្រប់គ្នាចូលរួមទប់ស្កាត់នូវសេណារីយ៉ូអាក្រក់បំផុត កុំឱ្យវាកើតឡើង ដោយថា ការកើតឡើងនូវទ្រង់ទ្រាយធំ វានឹងប៉ះពាល់ដល់សុខភាពទាំងផ្នែកសង្គម និងសេដ្ឋកិច្ច។
លោកស្រីថា៖ «ឥលូវនេះយើងកំពុងតែប្រឈមមុខនឹងការកើតឡើងជាចង្កោមទ្រង់ទ្រាយតូចនៅក្នុងស្រុក។ ប៉ុន្តែនាងខ្ញុំចង់បញ្ជាក់ឱ្យច្បាស់ថា យើងកំពុងតែប្រឈមនឹងហានិភ័យចំពោះហេតុការណ៍ដែលបានកើតឡើងជាទ្រង់ទ្រាយធំនៅក្នុងសហគមន៍»។
លោកស្រី លី អាយលែន ព្រមានថា បើមានការផ្ទុះឡើងនូវករណីធ្ងន់ធ្ងរនឹងបណ្តាលឱ្យមានមនុស្សស្លាប់ មន្ទីរពេទ្យទទួលបន្ទុកធ្ងន់ធ្ងរដែលអ្នកកើតកូវីដ១៩ក៏មិនអាចព្យាបាលបានត្រឹមត្រូវ ហើយអ្នកជំងឺផ្សេងទៀតក៏មិនអាចទួលបាននូវសេវាសំខាន់ៗដែលពួកគេត្រូវទទួលដែរ។
អ្នកវិភាគសង្គម លោកបណ្ឌិត សេង សារី មានប្រសាសន៍ថា កត្តាចម្បងនៃការផ្ទុះការឆ្លងរាលដាលក្នុងសហគមន៍ពេលនេះ លោកថា មិនមែនខ្លាំងមកពីមេរោគកូវីដ១៩ទេ តែថា វាបណ្តាលមកពីភាពខ្វះចន្លោះនៃការពង្រឹងវិធានចត្តាឡីស័ក ហើយរដ្ឋាភិបាលប្រើវិធីសាស្ត្រព្យាបាលច្រើនជាងប្រើវិធានពង្រឹងប្រសិទ្ធភាពការពារ។
លោកថា៖ «ភាពធ្វេសប្រហែលរបស់សន្តិសុខ រួមទាំងអាជ្ញាធរហ្នឹង វាជាផ្នែកមួយនៃការធ្វេសប្រហែសទាំងមូល […] បើទោះបីយ៉ាងណា [២០កុម្ភៈ] វាកើតឡើងទៅហើយ មានតែពលរដ្ឋនិងរដ្ឋាភិបាល ត្រូវតែមានការប្រុងប្រយ័ត្នខ្ពស់ក្នុងកិច្ចការហ្នឹង»។
ការឆ្លងកូវីដ១៩ ក្នុងសហគមន៍ជាលើកទី៣ ត្រូវក្រសួងប្រកាសឱ្យដឹងថា បានផ្តើមចេញពីក្លឹបកម្សាន្តមួយនៅភ្នំពេញ នាយប់ថ្ងៃទី២០ ខែកុម្ភៈ ដែលរដ្ឋាភិបាលដាក់ឈ្មោះថាជា«ព្រឹត្តិការណ៍សហគមន៍២០កុម្ភៈ»។
៤ថ្ងៃមកនេះ ក្រសួងរកឃើញអ្នកឆ្លង៩៩នាក់ ហើយទីតាំង៤៧នៅរាជធានីភ្នំពេញ និងខេត្តកណ្តាល ត្រូវបានអាជ្ញាធរផ្អាកធ្វើអាជីវកម្មបណ្តោះអាសន្ន ដើម្បីស្វែងរកអ្នកពាក់ព័ន្ធឱ្យទៅពិនិត្យសុខភាព ដើម្បីទប់ស្កាត់ការឆ្លងរាលដាល។
តែយ៉ាងណា ក្នុងសន្និសីទនោះ ក្រសួងសុខាភិបាលនៅតែបន្តអំពាវនាវឱ្យមានការស្ម័គ្រចិត្តទៅចាក់វ៉ាក់សាំង ដើម្បីកាត់បន្ថយបញ្ហាប្រឈមដែលវាយលុកដោយជំងឺកូវីដ១៩នេះ ខណៈក្រសួងចាប់ផ្តើមយុទ្ធនាការចាក់វ៉ាក់សាំងនេះចាប់ពីថ្ងៃទី១០ ខែកុម្ភៈ សម្រាប់គ្រូពេទ្យ ឥស្សរជននយោបាយ និងអ្នកសារព័ត៌មាន ជាដើម៕
